Өнгөрсөн сард Тагнуулын ерөнхий газрын Сөрөх тагнуулын газрынхан Сүхбаатар дүүргийн нутаг дэвсгэрт орших “Голомт” хотхоны “С” байранд тусгай ажиллагаа явуулсан билээ. Уг ажиллагаан хүрээнд гадаадын иргэнийг саатуулсан юм. Нийслэлийн Прокурорын газраас М, А, В нарыг Эрүүгийн хуулийн 19.10 дугаар зүйлийн 1-д зааснаар гадаадын иргэн харьяалалгүй хүн Монгол Улсын нутаг дэвсгэрт тагнуул хийсэн бол 12-20 жил хүртэл хугацаагаар хорих ял шийтгэнэ гэсэн үндэслэлээр яллагдагчаар татаж, улмаар шүүх тэдэнд цагдан хорих таслан сэргийлэх арга хэмжээ авсан. Тэгвэл эх сурвалжийн мэдээлснээр, уг хэрэгт холбогдсон манай улсын хоёр иргэн нь төрийн албан тушаалтан бөгөөд хоёр жил орчим хугацаанд гадаадын иргэнд мэдээлэл дамжуулж байсан нь тодорхой болжээ. Тэдний мэдээллийг хүлээн авч цааш дамжуулдаг байсан Вон овогт нь Тайванийн тусгай албаны хүн болох нь ч мөн батлагджээ.