Төмрийн хүдрийн нийлүүлэлт өссөнөөр үнэ нь буураад байна. Өнгөрсөн долоо хоногт Австрали болон Бразилын нийлүүлэлт 26.1 сая тонн хүрснийг “MySteel” мэдээллээ.
Энэ нь өмнөх долоо хоногоос 1.1 сая тонноор өссөн дүн юм. Далянийн Таваарын биржид төмрийн хүдрийн фьючерс үнэ 1.5 хувиар буурч, тонн нь 1198 юань болоод байна.
БНХАУ-д ган үйлдвэрлэл нь эрчимжсэнээр төмрийн хүдрийн эрэлт өсөөд байгаа аж. Өнгөрсөн сард тус улсын гангийн гарц 99.45 сая тонн буюу дээд хэмжээндээ хүрсэн байна. Хэдий тийм боловч цаашид агаарын бохирдол, хүлэмжийн хийн ялгаруулалтын асуудалтай холбоотойгоор БНХАУ ган үйлдвэрлэлийг хязгаарлаж, төмрийн хүдрийн эрэлт буурах магадлалтай гэж “Sinosteel Futures”-ийн шинжээч онцоллоо.
Эх сурвалж: BloombergTV