Улаанбаатарын Төв цэвэрлэх байгууламж ачааллаа дийлэхээ больж хотын баруун бүсийн иргэдийг багагүй бухимдуулаад байгаа билээ. Тэгвэл тус цэвэрлэх байгууламжийн засварын ажлыг өнгөрсөн хавар эхлүүлсэн бөгөөд ирэх есдүгээр сар гэхэд дуусгана гэж Ус сувгийн удирдах газраас мэдээллээ.
Улаанбаатарыг өмхийрүүлэх гол эх үүсвэр болсон олон жил хуримтлагдсан лагийг био идэвхжүүлэгч ашиглан боловсруулж байгаа юм байна. Шинээр гарч байгаа лагийг хэт авианы төхөөрөмжүүд ашиглан хоргүй, үнэргүй, халдваргүй болгохоор болжээ.
Байгууламжийн цэвэрлэгээний түвшинг сайжруулахын тулд хуучирсан бетон хийц, тусгай зориулалтын тоног төхөөрөмж, шугам хоолойг засах ажлуудыг хийж байгаа аж. Мөн Туул гол хүртэлх далан сувгийг засч, шинээр барих нуур цөөрмийн бохирдлыг арилгах ажлуудыг эхлүүлжээ.