“Өдрийн сонин”-ы 2017.06.14-ний Лхагва гаригийн №133(5700) дугаараас авч нийтлэв.
-БҮСГҮЙН ҮХЭЛД “СОХО МЕБЕЛЬ” КОМПАНИЙН ЗАХИРАЛ Б.ЖАДАМБАА ОГТ ХАМААРАЛГҮЙ ГЭЖ ЦАГДАА НАР ҮЗЭЖ БАЙГАА ГЭНЭ-
“Сохо мебель” компанийн ерөнхий захирал Б.Жадамбаагийн туслахаар ажиллаж байсан 22 настай С.Жавхаа гэх эмэгтэй амь насаа алдсан хэрэг энэ сарын 5-нд гарсан билээ. Талийгаач С.Жавхаа Баянгол дүүргийн III хорооны нутаг дэвсгэр “Нарны хороолол” хотхоны 22 дугаар давхрын салхивчаар унаж амиа алдсан байдаг. Талийгаач эмэгтэйн үхэлд “Соха мебель” компанийн ерөнхий захирал Б. Жадамбаа буруутай хэмээн ар гэрийнхэн нь үзэж байгаа тухай хэвлэл мэдээллийн хэрэгслээр гараад байгаа. Хэргийг Хан-Уул дүүргийн цагдаагийн хэлтэс, Эрүүгийн цагдаагийн газар, Мөрдөн байцаах газрын Онц хүнд гэмт хэрэгтэй тэмцэх хэлтсийнхэн хамтран шалгаж байна. Одоогоор хэрэг мөрдөн байцаалтын шатандаа байгаа. Албаны эх сурвалжаас авсан мэдээллээр талийгаач С.Жавхаагийн ар гэрийнхний цагдаад өгсөн мэдүүлгээр “Талийгаач 2017 оны тавдугаар сарын 30-нд гэртээ оройтож ирсэн. Захирал ажил дээр хүмүүстэй архи уусан. Тэгээд оройтчихлоо гэж хэлсэн. Маргааш нь өглөө ажилдаа явсан. Удалгүй захирал намайг зодчихлоо. Дэд захирал н.Сэлэнгээтэй цагдаа руу явж байна. Цагдаа нар захирлыг ирээд аваад явсан гэж хэлсэн. Тавдугаар сарын 31-ний 10.00 цагийн үед ажил дээрээ очиход захирал гэртээ харьж хоноогүй бололтой согтуу байсан. Цээж нүцгэн өрөөндөө сууж байсан. Наад ширээгээ цэвэрлэ. Чи намайг өчигдөр орой орхиод явдаг хэн бэ” гээд уурласан гэсэн. Нимгэн хар даашинзтай очсон байсан бөгөөд хормойг нь сөхөөд байсан.
Үүнийхээ дараа намайг зодсон гэж ярьсан” хэмээн мэдүүлэг өгсөн байна. Талийгаач эмэгтэй эгчдээ захиралдаа зодуулсан талаар хэлж, нүүр нь хавдсан зургаа явуулсан байдаг. иймд хэргийг шалгаж байгаа цагдаа нар “сохо мебель” компанийн ерөнхий захирал Б.Жадамбаад бусдыг зодож танхайрсан, амь насыг нь онц хэрцгийгээр хөнөөсөн байж болзошгүй гэх үндэслэлээр эрүүгийн хэрэг үүсгэн шалгаж байна. Тухайн үед ямар асуудал болж өнгөрсөн, талийгаач эмэгтэйг захирал нь зодож, бэлгийн дарамт үзүүлсэн үү. Янаг амрагийн холбоо байсан эсэх, хэрэг гарах үед юу болсон. Талийгаач гадны нөлөөтэй амь насаа алдсан уу гэдгийг шалгаж тогтоох ажиллагаа хийгдэж байна.
ТУСЛАХ ЭМЭГТЭЙН АМЬ НАСЫГ ХӨНӨӨСӨН ГЭГДЭЭД БАЙГАА Б.ЖАДАМБАА ГЭЖ ХЭН БЭ?
“Сохо мебель” компанийн ерөнхий захирал Б.Жадамбаа гэж хэн бэ. “Эх монгол” группийн эзэн бөгөөд тус группийн салбар дэлгүүр болох “Сохо мебель” тавилгын дэлгүүрээрээ олон нийтэд танил болсон нэгэн. 1979 онд төрсөн, загвар өмсөгч Монголмаа эхнэр нь бөгөөд тэд дөрвөн хүүхэдтэй гэх мэдээлэл байна. Түүний найз нөхдийн хэлж байгаагаар ямар нэгэн зүйл зарж худалдаалахдаа их сэргэлэн. Ямар ч хүний арга эвийг олоод ажлаа бүтээж чаддаг. Мөн найзуудтайгаа нийлж архи, дарс уудаг. Агсан тавьж, зодоон цохион хийж байсан тохиолдол ч байдаг гэнэ. Б.Жадамбаагийн туслахаар ажиллаж байсан эмэгтэйчүүд хэдэн сар болоод л ажлаасаа гарцгаадаг гэх мэдээлэл байна. Ер нь туслах нарийн бичгийн ажилд эмэгтэйчүүд удаан ажиллаж байгаагүй гэх. Цалинг нь тогтмол өгдөг ч бүсгүйчүүд ямар нэгэн тодорхой шалтгаан хэлээд л ажлаасаа гарах өргөдлөө өгдөг аж. Эх сурвалжаас авсан мэдээллээр туслахуудаа загнаж хэл амаар доромжилдог гэнэ. Ер нь нэлээд ширүүн ааш араншинтай нэгэн гэдгийг түүний ойр байдаг хүмүүс онцолж байсан юм. Мөн охид, бүсгүйчүүдтэй танилцаад мөнгө төгрөгөөр ивээн тэтгэнэ хэмээн утсаар ярьдаг, мессэж бичдэг нь олон нийтэд ил болоод байгаа.
ТАЛИЙГААЧ С.ЖАВХАА ГЭЖ ХЭН БЭ
Баянгол дүүргийн III хорооны нутаг дэвсгэр “Нарны хороолол” хотхоны 22 дугаар давхрын салхивчаар унаж амиа алдсан эмэгтэйг Санжсүрэн овогтой Жавхаа гэдэг юм байна. 1995 онд төрсөн бөгөөд дээрээ ганц ахтай гэнэ. Түүнийг есөн настай байхад нь аав нь амиа алдсан бол 11 настай байхад нь мөн л ээж нь бурхан болсон байна. 11 настайгаасаа эхлэн нагац эгч Б.нарангэрэлийнд амьдрах болжээ. 2011 онд ерөнхий боловсролын сургуулиа төгсөөд 2015 онд ХААис-ийн Газар тариалан үйлдвэрлэлийн менежментийн ангийг дүүргэсэн байна. Талийгаач эмэгтэйн талаар найзуудтай нь холбогдож ямар ааш араншинтай хүн байсан гэдгийг асууж тодруулахад “ Их сэргэлэн. Ямар ч хүнтэй арга эвээ олоод найзалж чаддаг. Бусдын зовлонг сайн ойлгож чаддаг. найзуудад нь ямар нэгэн асуудал гарахаар байнга тусалж дэмждэг байсан. Бага байхаасаа хичээлдээ сайн сурдаг. Бүр бие дааж англи хэл сурч байсан. Хүмүүс үл тоож муухай харилцаа үүсгэхийг үзэж чаддаггүй. Ямар ч хүнд өөрийнхөө үзэл бодлыг шууд илэрхийлчихдэг зантай. Амархан уурладаг байсан. Бусад хүүхэд шиг сэтгэл санаагаар унах, дорой байдал огт гаргадаггүй. Цоглог, инээж явдаг хүүхэд, их олон найз нөхөдтэй байсан” хэмээн ярьж байв.
“ТАЛИЙГААЧ СЭТГЭЛ САНААНЫ ДАРАМТТАЙ БАЙГААГАА ФЭЙСБҮҮК ХАЯГААРАА БИЧИХ БОЛСОН” ГЭВ
Талийгаач С.Жавхаагийн их сургуулийн ангийн найз, нэрээ нууцлахыг хүссэн эмэгтэйгээс цөөн асуултад хариулт авсан юм.
-Талийгаач С.Жавхаа-гийн талаар мэдээлэл авах гэсэн юм?
-Миний найз өөрийнхөө амийг хөнөөх хүн биш. Хэн нэгэн амийг нь хөнөөсөн гэж бодож байна. Маш их сэтгэл санааны дарамт шахалт байсан байх гэж дүгнэж байгаа. Олон нийтийн ажил зохион байгуулах чадвар маш сайтай хүүхэд байсан. Хүнийг баян хоосон гэж ялгаварлаж харьцахгүй. Их өрөвч зөөлөн зантай хүүхэд. Өмнө нь “Оргил” худалдааны төвд ажиллаж байсан. Ажлынхан нь ажлаа сайн хийдэг гээд байнга магтдаг байсан. Бүр менежер болтлоо дэвшиж ажиллаж чадсан. Менежерийн ажлаасаа гарсан шалтгаан нь дээшээ дэвшиж ажиллах сонирхолтой байсан байх. Түүнээс өөр ямар нэгэн шалтгаан байхгүй.
-Амиа алдахаасаа өмнө сэтгэл санааны хувьд ямар байдалтай байсан бэ?
-“Сохо мебель” ком-панийн ерөнхий захирал Б.Жадамбаагийн туслахаар ажиллаж байгаа гэж надад өнгөрсөн хоёрдугаар сард хэлсэн. Тухайн үед “Цэвэрхэн газар ажиллах гоё юм байна. Хүмүүсийн харилцаа нь давгүй, цалин боломжийн ажил хийж байгаа. Хэлнийхээ мэдлэгийг ч дээшлүүлэх боломжтой” гэж ярьж байсан. Харин дөрөвдүгээр сараас эхлээд өөрийнхөө фэйсбүүк хаягаар “Хэцүү байна. загнууллаа” гээд л бичээд эхэлсэн. Ер нь байнга л бусдад загнуулж байгаагаа бичих болсон. Энэ үеэс эхлээд захирал нь дарамталж эхэлсэн байхыг үгүйсгэхгүй. Цагдаа нар найзын маань амьтай холбоотой хэргийг үнэн зөв шалгаж гэм буруутай этгээдүүдэд зохих ял шийтгэлийг нь өгөөсэй” гэв.
Албаны эх сурвалжаас авсан мэдээллээр хэргийг шалгаж байгаа цагдаа нар “сохо мебель” компанийн ерөнхий захирал Б.Жадамбааг талийгаач охины амь насаа алдсан хэрэгт холбоогүй хэмээн үзэж байгаа гэх мэдээлэл ирэв. Мөн прокурорт холбогдох хэргийг нь хэрэгсэхгүй болгох саналыг удахгүй хүргүүлэх гэж байгаа гэнэ. Талийгаач эмэгтэй захирлаа дарамталж мөнгө авах гэж хэд хэдэн удаа оролдсон. Хан-Уул дүүргийн цагдаад өргөдөл гомдол гаргасан шалтгаан нь үүнтэй холбоотой. Мөн ар гэрийнхэндээ худлаа ярьж байсан гэх яриа цагдаа нарын дунд гарчээ. Цэл залуухан бүсгүй бусдын гарт амиа алдав уу, эсвэл амиа хорлосон уу гэдэг удахгүй үнэн зөвөөрөө тодрох биз ээ.
Э.БААТАР