Баянзүрх дүүргийн нутаг дэвсгэрт цагдаагийн албан хаагчийн машин, хүн дайрч амь насыг нь хохироосон хэрэг өнөө өглөө 07 цагийн үед гарлаа.
Тухайлбал Цагдаагийн ерөнхий газрын (ЦЕГ) авто баазийн харьяанд байдаг, шуурхай албаны үйлчилгээнд явдаг автомашин ажил үүргээ гүйцэтгэж байхдаа энэхүү зам тээврийн ослыг гаргажээ.
Энэ талаар ЦЕГ-ын хэвлэл мэдээллийн төвийн дарга, дэд хурандаа Б.Баатархүү: “Яг одоо тээврийн цагдаагийн албанаас хэргийн газар үзлэг, мөрдөн шалгалт хийгдэж байгаа. Одоогийн байдлаар 52 настай иргэн хохирсон гэх мэдээлэл ирсэн. Мөн ЦЕГ-аас ямар нэг байдлаар цагдаагийн ажилтан гэж хамгаалж хаацайлж, нуусан зүйл байхгүй. Монгол улсад мөрдөгдөж байгаа хууль тогтоомжийн хүрээнд шалгалтын ажлыг хийх болно. Тухайн нас барсан иргэний ар гэрийнхэнд эмгэнэл илэрхийлж байна” гэв.
Харин албан бус эх сурвалжийн хэлж буйгаар ЦЕГ-ын дэд дарга бөгөөд Нийслэлийн цагдаагийн дарга Д.Ядамдоржийн жолооч даргыгаа гэрээс нь авчрах гэж яваад уг осол гарсныг хэлж буй юм.
М.САЙНЗАЯА