Өнөө өглөө үүрийн 6 цаг орчимд 100 айлын автобусны буудлын баруун талд байрлах “Нарлаг” цайны газрын хажууд хүн буудсан хэрэг гарсан. Энэ талаар ЦЕГ-ын Хэвлэл мэдээллийн төвийн дарга Б.Баатархүү мэдээлэл өгсөн юм. Тэрээр, “Хэргийн газарт жижүүрийн шуурхай бүрэлдэхүүн хэргийн газрын үзлэг хийн ажиллаж байна. Одоогоор хэргийн газрын үзлэг дуусаагүй байна. Амиа алдсан иргэн буудуулсан байж болзошгүй. Эцсийн хариуг задлан шинжилгээгээр тогтооно. Хэргийн газарт үзлэг хийгдэж дуусаагүй байгаа учраас дууссаны дараа тодорхой мэдээлэл өгөх боломжтой. Үзлэгийг чанартай болгохын тулд хэргийн газар ажиллаж байна. Гэмт хэрэг үйлдсэн этгээдийг харсан гэрч байгаа бол цагдаагийн байгууллагад яаралтай мэдэгдэж, гэмт хэргийг илрүүлэхэд дэмжлэг үзүүлэхийг хүсч байна. Шүүхийн эмнэлэгийн задлан шинжилгээний хариу эцсийн хариу 21 хоногийн дотор гарна. Хэргийн газрын ойр орчмын газруудын камеруудыг шүүж үзэх гэх мэт боломжтой бүхий л ажлуудыг авч хэрэгжүүлнэ” гэсэн юм.