–Өнөөдөр УИХ-ын дэд дарга Ц.Нямдорж хэвлэлийн хурал зарлаж Эрдэнэт үйлдвэртэй холбоотой хоёр гэрээг олон түмэнд танилцууллаа. Энэхүү гэрээнд дурдагдаж байгаа мөнгөн дүн нь нийтдээ 100 тэрбум болж байгаа аж. Энэ нь түүний татварт төлөх ёстой мөнгө алга болчихлоо гээд яриад байсны учир гэнэ. Ингээд түүний ярьсныг хүргэе.
Ц.Нямдорж: Хоёр гэрээ байгуулагдсан байна. Наймдугаар сарын 25-д Эрдэнэт үйлдвэр Хөтөлийн цемент шохойн үйлдвэрийн хооронд нэгэн гэрээ байгуулагдсан байна. 2017-2021 он хүртэл таван жил шохой нийлүүлнэ гэсэн гэрээ байна. Энэ гэрээний 4-р зүйлийн 2-т нь нэг сонин заалт орсон. Урьдчилгаа төлбөртэй байна. Тэр нь 15 тэр бум 258 сая төгрөг байна. Энэ төлбөрийг жил бүрийн эхний сард хийнэ гэж байна. Хоёрдугаарт Эрдэнэт үйлдвэр Дарханы төмөрлөгийн үйлдвэр хоёрын хооронд бас наймдугаар сарын 25-д байгуулагдсан худалдах худалдан авах гэрээ байна. 40 хувийн урьдчилгаа төлбөр төлнө. Тэр нь 87 тэрбум 119 сая төгрөг байна гэжээ. Энэ гэрээ байгуулагдсанаас хойш ажлын таван хоногийн дотор шилжүүлнэ гэсэн байна. Ингээд нийт дүнгээрээ 100 тэрбум төгрөг болж байна. Дарханы төмөрлөгийн гэрээнд Даваацэрэн, Шинэбаатар, санхүүгийн орлогч Ж.Эрдэнэбилэг гэдэг гурван хүн гарын үсэг зурсан байна. Нөгөө талаас Шоовдор, Уранчимэг, Тунгалаг, Алтантогос гэсэн хүмүүс зурсан байна. Нөгөө гэрээнд нь Батжавхлан,Энхчулуун, Тогоо гэсэн гурван хүн гарын үсэг зуржээ.
Миний нөгөө татварт төлөх ёстой мөнгө алга болчихлоо гэж яриад байсан учир чинь энэ гэрээ л дээ. Наймдугаар сарын 25-д энэ гэрээг хийсэн байна.Тэгэхээр гэрээ хийснээс хойш 40-өөд хоног болж байна. Хөтөл, Хар төмөрлөг хоёр Худалдаа хөгжлийн банкны мэдэлд очсон. Энэ хоёр Эрдэнэтийн мөнгийг хөөж гаргах ажлыг зохион байгуулсан. Нийт 400 тэрбум төгрөг. Ийм мэдээлэл та бүхэнд хэлэх гэсэн юм. Гэрээг нь ширээн дээр тавчихъя. Гарын үсэг нь байж байна. Та нар татаж аваад олон нийтэд хүргэнэ биз дээ.
О.ӨНӨР