Дэлхийн хэд хэдэн улс орны нэр нөлөө бүхий улс төрчдийн оффшор дансыг ил болгосон Панамын “Panama Papers” энэ удаа “Paradise Papers” гэх шинэ баримтууд дэлгэжээ. 2016 оны 5 сард дэлхийн нөлөө бүхий улс төрчдийн нууц дансны мэдээллүүдийг ил болгож дэлхий дахиныг шуугиулж байсан цаг саяхан. Энэ удаад ч гэсэн дэлхийн нэр нөлөө бүхий хүмүүсийн тэр дундаа АНУ-ын ерөнхийлөгч Дональд Трамп, Английн хатан хаан, Канадын Ерөнхий сайд Жастин Трудо нарын нэр холбогдсон оффшор дансыг дэлхий нийтэд зарласан талаар BBC тэргүүтэй дэлхийн томоохон хэвлэлүүд мэдээлжээ. Эдгээр баримтуудыг ил болгохын тулд 380 гаруй сэтгүүлч 70 жилийн архив, мэдээллийн сан ухаж баримтуудыг нэхэн гаргаж ирсэн байна.
-АНГЛИЙН ХАТАН ХААНЫ 10 САЯ ФУНТЫН ОФФШОР ИЛЭРЧЭЭ-
Олон Улсын Эрэн Сурвалжлах Сэтгүүлчдийн Консерциум өчигдөр орой цахим хуудастаа Британийн захиргаанд байдаг Каймэний арлууд, Бермуд, Бритиш Виржин, Айзл оф Мэн, Жерси зэрэг оффшор бүсэд хадгалагдаж байгаа нууц хөрөнгийн тухай “Paradise Papers” гэх баримтууд дэлгээд байна. Үүнд Английн хатан хааны 10 сая фунт оффшор бүсэд байгаа нь илэрчээ.
“Bright House” гэх газар нь 6000 орчим хүнийг ажлын байраар хангадаг, жилийн 17.5 сая фунтын татвар төлдөг газар бөгөөд ядуус болон эмзэг давхаргийнханд туслах зорилготой боловч уг газарт Хатан хааны хөрөнгө оруулдаг мөнгө нь жижиглэн худалдаа эрхлэгчдэд очсон байж болзошгүй гэж үзжээ.
-ПУТИН, ТРАМП НАРЫН ОЙРЫН ХОЛБОО БОЛООД МӨНГӨНИЙ АСУУДЛУУД ДЭЛГЭГДЭВ-
Дональд Трампын кабинетын гишүүн, АНУ-ын худалдааны нарийн бичгийн дарга Уилбур Россын компанид ОХУ-ын ерөнхийлөгч Владимир Путины хүргэний эзэмшдэг компаниас төлбөр төлсөн баримт нь ил болов. Тэд бизнесийн нарийн холбоотой түншүүд гэдэг нь тодорхой бөгөөд ОХУ-д хамтран усан онгоцны тээвэрлэлтийн бизнес хийдэг аж. Уилбур “Навигатор” компанийн хувьцааг эзэмшдэг болохыг гинжин хэлхээгээр тайлбарлан харуулжээ. Тус компани нь ОХУ-ын байгалийн хийн “Сибур” компанитай хамтран ажилладаг бөгөөд энэ компани нь Путины охин Екатрина Путины нөхөр Крилл Шамаловын компани аж.
Мөн ОХУ-ын ерөнхийлөгч Путины ойрын холбоотой гэгддэг Оросын төрийн мэдлийн хоёр ч томоохон банк фэйсбүүк, твиттер компаниудын дансанд Трампын хүргэний дансаар дамжуулан хийсэн болох нь баримтаар ил болжээ.
-NIKE, APPLE КОМПАНИЙН ТАТВАРААС ЗАЙЛХИЙСЭН ХӨРӨНГӨ ИЛ БОЛОВ-
Канадын ерөнхий сайд Жастин Трюдогийн гол санхүүжүүлэгчийн татвараас зугтуулсан хөрөнгө мөн ил болоод зогсохгүй дэлхийн томоохон брэнд компаниуд болох Nike, Apple зэрэг компаниудын татвараас зайлсхийсэн хөрөнгө ил болоод байна.
Мөн дуучин Мадонна, Майкрософтын үүсгэн байгуулагчдын нэг Пол Аллен, Колумын Ерөнхийлөгч болон Нигерийн сенатын тэргүүн зэрэг 20 гаруй хүний холбогдсон оффшор дансны мэдээллийг ил болгожээ.