Гүржийн гал тогоо нь соусаараа алдартай. Төрөл бүрийн соусаар хоолыг огт өөр амттай болгон өөрчилдөг байна. Хамгийн түгээмэл нь улаан лоолийн соус бөгөөд өтгөн болтол нь чанаж, амтлагч ногоонууд болон жижиглэсэн сармисаар амталдаг. Гүржүүд төрөл бүрийн жимсний шүүсээр натурал соус бэлтгэдэг. Ингээд ногоогоор амталсан жигнэсэн тахианы махтай хоол хэрхэн бэлтгэхийг оруулъя.
Орц: Бүтэн тахианы мах
Нимбэг- нэг ширхэг
Улаан лооль- дөрвөн ширхэг
Кабачки буюу нарийн хулуу- хоёр ширхэг
Сармис
Амтлагч (өөрийн дуртай)
Розмарин
Лаврын навч
Давс, перец
Хийх арга: Тахианы махаа угааж, жижиглэн хэрчээд шарах шүүгээний листэн дээр тавина. Махны жижиг хэсэг бүрт завсар гарган зүсээд голд нь нунтагласан сармис хийгээрэй. Махан дээрээ нимбэгний шүүс жигдхэн асгаж давс, перец, амтлагчаа үрнэ. Бэлдсэн махны дэргэд дугуй хэлбэртэй хэрчсэн хулуу болон улаан лоолио тавина. Листээ бүхэлд нь мөнгөлөг цаасаар бүрээд 200 хэмд 50 минут жигнэнэ. Дараа нь мөнгөлөг цаасаа аваад жижигхэн хэрчсэн розмарин болон лаврын навчаа нэмж хутгаад махаа шаргал өнгөтэй болтол нь шарна.
Элгэн торт
Малын элэг нь хүний биед хэрэгтэй амин дэмээр баялгаас гадна үнэ хямд. “Дэнжийн мянга”, “Хүчит шонхор” зэрэг худалдааны төвүүдэд хонь, ямааны элэг ширхэг нь 500, үхрийн элэг 2000 төгрөгийн ханштай байна. Хүнсний бүтээгдэхүүн үнэтэй энэ үед хямд төсөр материалаар нэгэн амттан хийхийг зааж өгье. Орц: 4-5 хүн
Малын элэг-600гр (хонь,ямааны нэг ширхэг элэг байхад бараг болно, бас тахианы элгээр хийж ч болно.
сүү-250гр
өндөг- нэг ширхэг
гурил- гурван а/ха
лууван- гурван ширхэг
сонгино- гурван ширхэг
масло- хоёр а/х
сода- нэг ц/х
Помидор- хоёр ширхэг
давс
хар перец
Сүмсэнд:
майонез-100гр
цөцгий-150гр
сармис- нэг хумс
Хийх арга:
Элгээ цэвэрлээд хүйтэн усаар угааж жижиглээд бутлагчид хийж зутан болгоно. Үүн дээрээ нэг ширхэг өндөг, хуурай гурил, сүүгээ хийж сода, давс, хар перецээр амтлаад сайтар хольж өгнө. Хар перец, давсаа өөрсдийн амтлах хэмжээгээр хийнэ. Луувангаа зороод, сонгиноо нарийн хэрчээд хоёр халбага масло хийж хуурч болгоно.
Сүмс бэлдэх: Сармисаа маш нарийн жижиглэж хэрчээд майонез, цөцгийтэйгөө холино. Хайруулын тавгандаа бага зэрэг тос хийгээд амталсан элгээ блинчиктэй адил хайрч болгоно. Хайрсан элгэн дээрээ сүмсээ тарааж асгаад дээр нь жигнэсэн лууван сонгинын холимгоо тараана. Энэ мэтчилэн үлдсэн элэг, сүмсээ үелүүлэн тавьж өрнө. Хамгийн дээр нь сүмсээ түрхээд өргөст хэмх, улаан лооль, мөөгөө гурвалжин хэрчиж чимэглэнэ. Чимэглэлээ өөрийн хүссэнээр яаж ч хийж болох юм. Тоортоо халуунаар нь зүсч таваглаад идвэл бүр амттай бөгөөд өег байх болно.