Тамхины иш гудамжинд хаявал 200 ам.доллараар торгох гэнэ. Холбогдох журмыг Бельгийн нийслэл Брюссель хотын захиргаанаас гаргажээ. Улмаар шинэ дүрэм журмыг ирэх оны нэгдүгээр сараас мөрдөж эхлэх юм байна. Үүний зэрэгцээ олон нийтийн газруудад 100 гаруй хогийн сав байршуулах ажлыг эхлүүлжээ. Бельги улсад нийтийн газар тамхи татахыг хуулиараа хориглосон байдаг. Зөрчсөн тохиолдолд таван мянган ам.долларын торгууль ногдуулах заалттай. Хэдийгээр хууль хэрэгжээд багагүй хугацаа өнгөрсөн ч шөнийн цэнгээний таван газар тутмын нэгт хууль зөрчигдсөөр байгаа гэнэ.
Брюссель хотын олон нийтийн үйлчилгээний газрын дарга Зоубида Желлаб “Хүмүүс одоо ч гудамжинд тамхины ишээ хаясаар байна. Байнга цэвэрлэх нь амаргүй л дээ. Бид олон нийтийн хандлагыг өөрчлөх үүднээс кампанит ажлыг өрнүүлээд буй.
Энэ ажлын хүрээнд “Тамхины иш хаяж болохгүй” гэх бичээс бүхий зурагт хуудсыг хаа сайгүй түгээж байгаа” гэв. Мөн хотын захиргаа нь уг асуудлаар “WeCircular” гэх дахин боловсруулах үйл ажиллагаа эрхэлдэг старт-аппс компанитай хамтрахаар тохиролцжээ.