Унгарын нийслэл Будапешт хотноо болж буй бөхийн чөлөөт барилдааны дэлхийн аварга шалгаруулах тэмцээний 61, 74, 86, 125 кг-ын жингийн медалийн төлөөх барилдаанууд өнгөрсөн шөнө боллоо. Манай тамирчдаас энэ өдөр 61 кг-ын жинд барилдсан ОУХМ Түмэнбилэгийн Түвшинтулга хүрэл медалийн төлөө Гүржийн бөх Бека Ломтадзетай барилдаж 6:3-аар хожиж, Монголын багийн анхны медалийг хүртлээ.
Өнөөдөр 57, 65, 79, 92 кг-ын жингийн медалийн төлөө барилдаанууд болох бөгөөд манай багаас 65 кг-ын жинд ОУХМ Т.Тулга, 92 кг-ын жинд ОУХМ Л.Төртогтох нар дагаж барилдана.
ОУХМ Т.Тулга өчигдөр Словак, Польшийн бөхийг оноогоор цэвэр ялж наймд үлдээд Энэтхэгийн Бажранг Бажрангд 3:5-аар хожигдсон. Өнөөдөр Унгар, БНСУ-ын бөхчүүдийн ялсантай торгуулийн тойрогт барилдаж, ялбал Кубын Алехандро Тобьертай хүрэл медалийн төлөө барилдана.
ОУХМ Л.Төртулга Казахстаны Нургали Нургайпулиг ялж наймд үлдээд Беларусийн Иван Янковскид хожигдсон юм. Беларусь бөх аваргын төлөө гарч ирсэн учир манай бөх өнөөдөр дагаж барилдана. Манай бөх БНСУ-ын Жон Ху Литай барилдаад ялбалЯпоны Ацуши Мацумотой хүрэл медалийн төлбөө барилдана.