Нийслэлийн Засаг даргын захирамжаар нийт 10 сургуулийн захирлыг ажлаас нь чөлөөлсөн тухай ЕБС-ийн захирлууд мэдээлэл хийлээ. Ерөнхий боловсролын 1, 9, 13, 29, 67, 105, 107 дугаар сургуулийн захирлуудыг үндэслэлгүй ажлаас халсан гэж үзэж буйгаа хуралд оролцогчид хэлэв.
Тухайлбал, СХД-ийн есдүгээр сургуулийн захирал асан А.Батжаргал “Миний хувьд Нийслэлийн Засаг даргын захирамжаар 2017 оны дөрөвдүгээр сарын 14-нд ажлаас халагдсан. Бага ангийн 14 кабинетад эцэг, эхийн хандив тусламжаар 2015-2016 оны хичээлийн жилд 14 телевизор авахуулж тавьсан. Үүгээр шалтаглаж намайг ажлаас халсан. Боловсролын тухай хуулинд багш мэргэжилтэн багшлах эрхтэй байна гэж заасан байдаг. Гэтэл миний оронд томилогдсон хүн 1997 онд боловсролын сургууль төгсөөд түүнээс хойш 20 гаруй жил багшаар ажиллаагүй хүн тавигдсан байгаа” хэмээв.
Мөн ХУД-ийн 18 дугаар сургуулийн захирал асан А.Чинбат: Би дөрөвдүгээр сарын 14-ний өдөр ажлаасаа чөлөөлөгдсөн. Ажлаасаа чөлөөлөгдөх болсон шалтгаан нь спорт заалаа түрээсэлдэг гэсэн нотлогдоогүй баримтгүйгээр ажлаас халсан. Ажлаас чөлөөлөх захирамжуудыг харахад дандаа 2012 оноос хойш томилогдсон хүмүүс байсан. Боловсролын байгууллагын ажилчдыг хоморголон халж байгаа нь улс төрийн явуулгатай гэж үзэж байна. Гэтэл бидэн дотор улс төрийн агуулгатай буюу намын харьяалалтай хүн нэг ч байхгүй. 2012 оноос хойш томилогдсоноороо бид хэлмэгдэж байна.” гэв