Хүүхдийн мөнгө авалгүй өнөөдрийг хүрсэн бүх хүүхдэд сар бүр өгдөг 20 мянган төгрөгийн нөхөн олгох шийдвэрийг Засгийн газраас гаргасан. Түрүү жилийн наадмаас хойш хүүхдийг мөнгийг хязгаартайгаараа олгох болсон билээ. Засгийн газрын шийдвэрээр 502.567-гоос дээш оноотой өрхийн хүүхдүүдэд мөнгийг нь нөхөж олгохоор болсон ч анхаарах хэд хэдэн зүйл байгаа гэж Хөдөлмөр халамжийн үйлчилгээний ерөнхий газраас мэдээлж байна. Нэгдүгээрт, 2013 болон 2017 онд явуулсан өрхийн амьжиргааны түвшин тогтоох судалгааны аль нэгэнд хамрагдсан бол хүүхдийн мөнгөө үргэлжлүүлэн болон нөхөн авах юм байна. Хоёрдугаарт, хэрэв уг санд хамрагдаагүй бол харьяа сум, дүүрэг, хорооныхоо Хөдөлмөр, халамжийн ажилтанд хандаж өргөдөл гарган, судалгаанд хамрагдсаны дараа мөнгөө авч эхлэх аж. Хөдөлмөр халамж үйлчилгээний ерөнхий газар өнөөдөртөө багтаж айл өрхүүдийн 0-18 хүртэл насны нийт хүүхдээс хэд нь өрхийн амьжиргаа тогтоох судалгаанд хамрагдсаныг тогтоож Сангийн яаманд илгээхээр болжээ. Үүний дагуу Сангийн яамнаас халамжийн мөнгө олгодог 13 банкинд санхүүжилт олгох юм байна. 2017 оны гуравдугаар сарын 10-наас хойш шинээр төрсөн хүүхдийн өргөдлийг харъяа аймаг, дүүргийн газар, хэлтсүүдэд хүлээн авч, өрхийн амьжиргааны судалгааны оноог нь бодсоны дараа тухайн өрх дээр бүртгэж, өргөдөл өгсөн сараас нь тэтгэмж нөхөж олгогдоно гэж Хөдөлмөр халамжийн үйлчилгээний ерөнхий газраас мэдээллээ.