Улсын хэмжээнд энэ долоо хоногт бүртгэгдсэн зам тээврийн осол, хэргийн нөхцөл байдлын талаарх мэдээллийг хүргэе. Энэ ажлын өдрүүд буюу арванхоёрдугаар сарын 24-28-нд Тээврийн цагдаагийн албанд зам тээврийн осолтой холбоотой нийт 1421 дуудлага мэдээлэл бүртгэгджээ. Ослын улмаас нийслэлд хоёр хүний амь нас хохирч 30 хүн хүнд, хөнгөвтөр байдлаар гэмтсэнээс тав нь бага насны хүүхэд байсан аж. Мөн согтууруулах ундаа хэрэглэсэн есөн жолоочид хэрэг нээсэн байна.
Тодруулбал, Баянзүрх дүүргийн нутаг Алтан-Өлгийн гудамж, Приус маркийн автомашины ард ачаа ачиж байсан явган зорчигч Х-г Приус маркийн автомашин мөргөж, явган зорчигч 22 настай, Х-н амь нас хохирсон хэрэг гарчээ. Түүнчлэн Сонгинохайрхан дүүргийн нутаг Баянголын 32-р гудамж Приус маркийн автомашины жолооч нь явган зорчигч 33 настай, эмэгтэй Ц-г мөргөж амь насыг нь хохироосон хэргийг шалгаж байна.
Мөн цагдаагийн байгууллагаас гудамж замд хийсэн хяналт шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон 168 зөрчлийг илрүүлж хариуцлага тооцжээ. Энэ долоо хоногт согтуугаар тээврийн хэрэгсэл жолоодох зөрчил 40 хувиар өссөн байна.