Сүпер дээд лигийн хүрэл медалийг “Blue Dragon” хүртлээ
Монголын Үндэсний Сагсанбөмбөгийн Холбоо болон Монголын Сагсанбөмбөгийн Холбоо хамтран зохиосон супер дээд лигийн аварга шалгаруулах тэмцээний хүрэл медалын төлөөх тоглолт Монголын Үйлдвэрчний Эвлэлийн Соёлын Төв Ордонд боллоо. Хожигдох эрхгүй энэ тоглолтод Улаанбаатар Blue Dragon баг, Баянгол дүүрэг Mongolians багийг 88-74-өөр буулган авсан байна. Тоглолтын эхнээсээ сонирхолтой өрнөж хоёр баг 21 удаа тэргүүллээ солилцож есөн удаа тэнцсэн байна. Гэхдээ шийдвэрлэх мөчүүдэд Blue Dragon баг илүү байж анх удаагаа супер дээд лигийн хүрэл медалийг хүртсэн юм. Blue Dragon баг хамгийн ихдээ 20 оноогоор тэргүүлсэн бол Баянгол дүүрэг Mongolians баг эхний үед 20-15-аар таван оноогоор тэргүүлж байсан байна. Энэ тоглолтод С.Эрдэнэдалай багаа хожилд хүргэхэд үнэтэй хувь нэмэр оруулж 27 оноо,10 самбар, 5 оновчтой дамжуулалт өгч багаа тэргүүлсэн бол З.Энхтөр 18 оноо, 9 самбар авсан аж. Харин эсрэг багаас Б.Дамдинсүрэн 21 оноо, 18 самбар, Н.Бат-Оргил 21 оноо, 7 самбар, Б.Жанжийжаваалий 15 оноо авлаа.
Ховд Шонхорхууд баг аваргаллаа
Сүпер дээд лигийн аваргийн төлөө Ховд Шонхорууд болон СХД Тэнүүн Өлзий багууд учраа тааран тоглов. Ингээд Ховд Шонхорууд баг аваргын цувралд илүүрхэж супер лигийн цомыг хоёр дахь удаагаа хүртсэн. Харин СХД Тэнүүн Өлзий баг супер лигийн анхны медалиа хүртлээ. Аваргийн төлөөх шийдвэрлэх тоглолтод 110-90-ээр Ховд Шонхорууд хожсон юм. Тус тоглолтод Г.Цэнгүүнбаяр 24 оноо, 9 самбар авч багаа тэргүүллээ. Шонхорууд холын шидэлтийг илүү гүйцэтгэж хурдан довтолгоонд илүү санаачлагатай байсан нь аваргын тоглолтод хожих гол хүчин зүйл болсон. Энэ тоглолтод Рикардо Максвелл 23 оноо, 9 самбар, 6 оновчтой дамжуулалт, Ц.Отгонжаргал 22 оноо, 12 самбар, Э.Дөлгөөн 15 оноо, 15 самбар авсан юм. Харин Өрсөлдөгч багаас ОУХМ Д.Дэлгэрням 25 оноо, 7 самбар, А.Гансүх 16 оноо, 10 самбар авч багаа манлайлжээ. Шонхорууд 48 минутын турш онооны давамгай байдалтай тоглосон бол Тэнүүн Өлзий баг нэгдүгээр үед долоон оноогоор хожиж байжээ. Мөн тус тэмцээний “Үнэ цэнэтэй тоглогчоор Г.Цэнгүүнбаяр тодорсон байна.