Японы ерөнхий сайдын ирэх 26 наас Хавайн арлуудад хийх айлчлалд олон улсын хэвлэлүүд анхаарлаа хандуулж байна. энэ айлчлалынхаа үеэр Ерөнхийлөгч Барак Обаматай яриа хэлэлцээ хийхээр төлөвлөж байгаагаа Японы Ерөнхий сайд Шинзо Абэ зарласан даруйд Перл Харборт очиж албан ёсоор уучлал гуйх нь гэдэг асуудал барууны хэвлэлүүдээр хөндөгдөж эхэлсэн юм. Хоёр орны төр засгийн тэргүүн нар Перл Харборт очиж 75 жилийн өмнөх Япончуудын агаарын цохилтод өртөж амиа алдсан хүмүүсийн дурсгалыг хүндэтгэх юм байна.
Тэр үеийн Японы армийн халдлагын уршгаар олон мянган хүн амиа алдсаны ихэнх нь Америкийн цэргүүд байсан юм. мөн энэ тулаан Номхон далай дахь дайны эхлэл болсон билээ. Тэгвэл тэр үйл явдлаас хойш 75 жилийн дараа Японы Ерөнхий сайд анх удаагаа Перл Харборт зочлох гэж байна. тэрээр энэ тухайгаа сэтгүүлчдэд мэдэгдэх үеэрээ түүний айлчлал нь Япон, АНУ нөхөрхөг харилцаагаа сэргээсний чухлыг тодотгон харуулах боломж хэмээн үнэлж байгаагаа илэрхийлсэн юм.