Баянзүрх дүүргийн III хороонд байрлах “Амгалан” буюу гуравдугаар амаржих газар өнөөдөр шинэ байрандаа орж байна. Нийслэлийн хамгийн олон хүн амтай буюу 330 мянга гаруй хүн амтай тус дүүрэгт харъяалагдах гуравдугаар амаржих газар өмнө нь 45 ортой төрөх эмнэлэгт эхчүүдээ хүлээн авдаг байв. Харин энэхүү шинэ амаржих газар нь 9000 ам метр талбайд 412 өрөө, 150 ортой үйл ажиллагаагаа эхлүүлж байна. Ачаалал ихтэй үед орны тоогоо 100-аар нэмэгдүүлэх боломжтой аж. Долоон давхар өндөр төрөх эмнэлэгийг Японы засгийн газрын 1.5 сая ам долларын буцалтгүй тусламжаар орчин үеийн тоног төхөөрөмж, аппаратаар тохижуулжээ. Энд зөвхөн амаржих эмч гэлтгүй эмэгтэйчүүдийн бүх төрлийн өвчнийг эмчилж оншлох аж. Хуучин төрөх эмнэлэгүүдээс ялгарах бас нэг онцлог нь төрж буй эхийг ар гэрийнхэн нь төрөх өрөөний цонхоор харж болох юм.
“Амгалан” амаржих газар шинэ байрандаа орсноор хүчин чадал нь гурав дахин нэмэдэх талаар эмчилгээ эрхэлсэн орлогч дарга С.Ганболд хэлжээ. Тус төрөх эмнэлэг жилдээ дүүргийнхээ 28 хорооны 6000 гаруй хүн төрж, 10 мянга гаруй хүн хэвтэн эмчлүүлдэг юм.