Ардын хувьсгалын 98 жилийн ойн баяр наадмаар нэг харваачаас хоритой бодис буюу допинг илэрсэн талаар Баяр наадмын комиссоос мэдээлсэн. Тэрхүү харваач нь Х.Даваа гэх эмэгтэй харваач бөгөөд энэ жилийн баяр наадмаар дөрөвдүгээр байр эзэлсэн амжилт үзүүлсэн байна. Түүнд Сурын холбооноос зохих хариуцлагыг хүлээлгэж ёс зүйн хороогоор авч хэлэлцээд, шагналыг нь буцааж, нэг жилээр харвах эрхийг нь хасчээ. Х.Даваа нь тухайн үед ханиадны төрлийн эм бэлдмэл хэрэглэснээс сэргээшийн шинжилгээний хариу эерэг гарсан талаар мэдээлсэн байна. Дашрамд дурдахад, сэргээшийн шинжилгээ авч эхэлснээс хойш анх удаа харваачаас допинг илэрсэн нь энэ аж.