Өндөр хадан хавцал, ангал, 180 метрийн өндөр байшин, өндөр уул нуруудын оройд гарч селфи зураг авах явцдаа санамсаргүй байдлаар сүүлийн гурван жилд амиа алдсан хүний тоо эрс өсчээ. Зөвхөн селфи зураг авах гэж байгаад санамсар болгоомжгүй байдлаасаа болж амиа алдагсдын тоо 2016 онд 98 байсан бол 2017 онд 93 байв.
Гэтэл одоогоос долоохон жилийн өмнө буюу 2011 онд дэлхийн дахинаа ердөө 3-н ийм төрлийн тохиолдол бүртгэгдэж байсан аж. Энэтхэгийн анагаахын шинжлэх ухааны байгууллагаас гаргасан судалгаагаар, энэ төрлийн золгүй ослоор амиа алдсан хүмүүсийн 90 гаруй хувь нь 30-аас доош насныхан, харин хүйсээр нь авч үзвэл тэдний зөвхөн 72 хувь нь эрэгтэйчүүд байгаа гэнэ. Мөн энэ төрлийн ихэнх ослын тохиолдол Энэтхэг, Орос, АНУ болон Пакистан зэрэг улсуудад хамгийн олон бүртгэгджээ.
Зөвхөн өндөр байшин барилга, уул хад гэлтгүйгээр галт тэрэгний хажууд зогсож байхдаа, мөн араатан амьтны хажууд зураг авахуулах үедээ амиа алдах, далайн усан доор селфидэх гэж байгаад живэх, автомашин жолоодож байх үедээ селфи зураг авах гэж байгаад осолд орох тохиолдол цөөнгүй байна.
Иймээс эрдэмтэн судлаачид болон Америкийн үндэсний номын сангийн анагаах ухааны салбарын эрдэмтэн, мэргэжилтнүүд “селфигүй бүс” байгуулахыг санал болгожээ. Ялангуяа, аялал жуулчлалын бүсэд энэ төрлийн анхааруулга, сэрэмжлүүлэг байгуулах нь селфи зураг авах явцдаа амиа алдах эрсдлийг хоёр дахин бууруулах боломжтой гэж тэд үзэж байна.