2021 оны наймдугаар сарын 23-ны өдрийн байдлаар Сэлэнгэ мөрөн Орхон голын эх болон дунд хэсэг, Хөвсгөлийн уулсаас эхтэй Дэлгэрмөрөн, Эг, Бэлтэс, Бүгсий, Үүр, Хэнтий нурууны баруун хажуугийн Тэрэлж, Хараа голын нийт уртын дагууд усны түвшин өмнөх өдрийнхөөс 10-50 см нэмэгдэж, Эг, Бэлтэс, Бүгсий, Сэлэнгэ, Орхон, Идэр, Байдраг, Чигж, Хархираа, Тэс, Буянт, Төгрөг, Онон зэрэг голууд үерийн түвшинг 30-105 см, Дэлгэрмөрөн, Үүр, Халх, Улз болон Сэлэнгэ мөрөн Орхон голын дундуур үерийн аюултай түвшинг 10-25 см даван тус тус хүчтэй үерлэж байна.
Маргааш буюу наймдугаар сарын 24-ний өдөр Сэлэнгэ мөрний нийт уртын дагууд болон Орхон голын адгаар усны түвшин 10-30 см, Эг гол Хантай баг Туул гол Улаанбаатар хот орчимд 10-25 см нэмэгдэж, Сэлэнгэ мөрний нийт уртын дагууд үерийн аюултай түвшинд 10-20 см дөхөн үерлэх хандлагатай байна.
Иймд дээрх голууд болон гол мөрний сав дагуу суурьшиж, нутаглаж буй малчид, ард иргэдийг үерийн аюулаас болгоомжтой байхыг онцгойлон анхааруулж байна.