Өчигдөр АНУ-ын Тээврийн департмент, Холбооны Агаарын Тээврийн Захиргаа (FAA) болон хэд хэдэн нислэгийн компаниуд хамтран Самсунг компанийн Galaxy Note 7 гар утсыг ямар ч онгоцонд, ямар ч хэлбэрээр тээвэрлэхийг хориглолоо. Үүнд анхны хувилбар болон сүүлд шинэчилсэн хувилбар аль аль нь багтаж байна.
Зорчигчид биедээ авч явахаас гадна онгоцны карго, ачаанд өгөхийг хориглож байна. Тэдний мэдэгдэл дурдахдаа зорчигчдын аялалд түвэг учруулж байгаадаа уучлал гуйгаад “нэг удаагийн осол тохиолдсон ч маш олон хүний амь насыг эрсдэлд оруулах тул ийм алхам хийхээс өөр аргагүй боллоо” гэжээ.
Онгоцонд Note 7 утсыг авч орох гэж оролдсон зорчигч торгууль хүлээх ба зарим тохиолдолд гэмт хэрэгт сэжиглэгдэн шалгагдах боломжтой болсон гэнэ.
Самсунг компани “дэлбэрдэг гар утас” үйлдвэрлэснийхээ төлөө $2.3 тэрбумын алдагдалд ороод байгаа юм.