“Сайншанд Салхин Парк” ХХК нь эрчим хүчний дэд станц болон 25 ширхэг салхин турбин генераторуудын суурилуулалтын ажлыг 2018 оны наймдугаар сарын 21-ний өдөр хийж дуусгасан байна. Тус компани нь нийт 120 сая ам долларын хөрөнгө оруулалттай 55 МВт-ын хүчин чадал бүхий салхин цахилгаан станцын бүтээн байгуулалтын ажлыг 2017 оны наймдугаар сард эхлүүлж байсан билээ. Төслийн байршил нь Дорноговь аймгийн Сайншанд сумаас зүүн урагш 15 км-т байрладаг бөгөөд 100 мянган айл өрхийн цахилгааны хэрэглээг хангахуйц эрчим хүч үйлдвэрлэх юм.
Салхин паркийн барилга угсралтын ажил дуусгавар болсноор цахилгааны холболтыг Монгол Улсын нэгдсэн цахилгаан шугам сүлжээнд холбох нь төслийг дараагийн шатанд оруулж буй гол үйл явдал юм. Ойрын өдрүүдэд “Сайншанд Салхин Парк” ХХК нь холбогдох төрийн байгууллагуудтай (ЭХЯ, СЭХҮТ, ДҮТ, ЦДҮС…) хамтран ажиллаж, тавигдсан бүх шаардлага, стандартуудыг хангах ажлууд хийх юм байна. Техникийн комисс ажилласны дараа энэ оны есдүгээр сараас эхлэн сүлжээнд холбох ажил хийгдэх аж.
Энэхүү холболт нь “Сайншанд Салхин Парк” ХХК-ийн хувьд Монгол Улсын цахилгаан эрчим хүчний системд ес болон аравдугаар саруудад шат дараалалтай эрчим хүч нийлүүлэх боломжийг бүрдүүлэх ач холбогдолтой. Энэ оны аравдугаар сарын сүүлээр цахилгаан станцыг ашиглалтад оруулж, бүрэн хүчин чадлаар эрчим хүч үйлдвэрлэж эхлүүлэх төлөвлөгөөтэй ажиллаж байгаа бөгөөд цаашид 26 жилийн турш тасралтгүй эрчим хүч үйлдвэрлэх юм.