Ардчилсан хувьсгалын анхны удирдагчдын нэг, МоАХ-ны ерөнхий зохицуулагч Санжаасүрэнгийн Зориг агсны мэндэлсний 55 жилийн ой өнөөдөр тохиож байна. Түүний төрсөн өдрийг тохиолдуулан Монголын үндэсний музей, “Зориг сан”-тай хамтран “Санжаасүрэнгийн Зориг агсны мэндэлсний 55 жилийн ойн үзэсгэлэн” зохион байгуулж, олон нийтийн хүртээл болгож байгаа билээ.
Үзэсгэлэнд түүний гэрэл зураг болон эдэлж хэрэглэж байсан эд өлгийн зүйлсээс түүвэрлэн 100 гаруй үзмэрийг дэлгэн үзүүлж байна. Тухайлбал, Ардчилсан хувьсгалын тэмцлийн халуун өдрүүдийг өгүүлсэн түүхэн гэрэл зургууд, МоАХ-ны ерөнхий зохицуулагч Санжаасүрэнгийн Зориг агсны шатар, УИХ-ын гишүүн асан дүү С.Оюундаа бичсэн захидал, түүний өмсөж байсан хослол, цүнх зэргийг тус үзэсгэлэнд онцлон харуулжээ. Түүний “Би монгол хүний саруул ухаанд итгэдэг” гэх алдарт үгээ дүү С.Оюундаа зориулсан захидалдаа бичсэн гэдэг. Энэ захиаг мөн үзэсгэлэнгийн үеэр олонд үзүүлэх гэнэ.
Санжаасүрэнгийн Зориг агсны мэндэлсний 55 жилийн ойн үзэсгэлэнгийн албан ёсны нээлт өнөөдөр 12:00 цагт Монголын үндэсний музейд болохбөгөөд энэ сарын 28-ныг дуустал үзэгчдийн хүртээл болно.