УИХ-ын гишүүн С.Ганбаатар даваа гаригаас Сүхбаатарын талбай дээр “МАН-ыг Рио Тинтогийн барьцаанаас чөлөөлж, алдагдсан Оюутолгойгоо буцаан авах өлсгөлөн” нэртэй суулт, нойтон өлсгөлөнг зарласан билээ. Тэгвэл дөнгөж сая МАН-ын бүлгийн гишүүд С.Ганбаатар гишүүнтэй төв талбай дээр очиж уулзаж, Рио Тинтогийн эсрэг нэхэмжлэлийг олон улсын шүүхэд дахин гаргаж, хамтран ажиллахаа мэдэгдсэн юм. Үүний дараа тэд МАН-ын бүлгийн дарга Д.Тогтохсүрэнгийн өрөөнд цугларч, Нью-Йоркийн шүүхэд нэхэмжлэх гаргах тухай ярилцаж байгаа юм. С.Ганбаатар гишүүн МАН-ын бүлгийн даргын өрөөнд хэлэлцээр хийх болсон учраас өлсгөлөнгөө зогсоох болно гэдгээ мэдэгдсэн.
Энэ талаар УИХ-ын гишүүн С.Ганбаатар “МАН-ын бүлгийн гишүүдтэй уулзсаны үр дүнд буюу Рио Тинтогийн эсрэг нэхэмжлэлийг Нью Иоркийн хотын шүүхэд албан ёсоор явуулсны дараа өлсгөлөнгөө зогсооно. Та бүхэн намайг ойлгож, миний эрүүл мэндэд анхаарч, хүндэтгэлтэй хандсанд баярлалаа” хэмээсэн бол билээ.
Тэгвэл өнөө өглөө УИХ-ын гишүүн С.Ганбаатар “Өлсгөлөнгөө тав дахь өдрөө үргэлжлүүлж байна. Бие минь сайн байна” гэж пэйж хуудсаараа мэдэгдлээ.
