“Эрдэнэс Таван толгой” ХК-ийн “ТиТиЖиВиСиӨү” ХХК-тай байгуулсан тэгш бус гэрээний алдагдлын талаар “Эрдэнэс таван толгой” ХК-ийн Үйлдвэрчний эвлэлийн дарга С.Эрдэнэ өнөөдөр мэдээлэл хийлээ.
Тэрээр мэдээллийн эхэнд ярихдаа “Эрдэнэс Таван толгой” ХК-ийн “ТиТиЖиВиСиӨү” ХХК-тай байгуулсан гэрээний талаарх зарим бодит баримтыг нийгэмд танилцуулж судлуулахыг хүссэн юм. “Эрдэнэт таван толгой” компанийн Үйлдвэрчний эвлэлийн байгууллага гишүүдийнхээ өмнөөс төлөөлөн ажилчдаа эрүүл, аюулгүй байдал хангагдсан орчин нөхцөлд ажиллуулахын тулд энэ асуудалд оролцож байгаа юм. “Эрдэнэс таван толгой” компанийн “ТиТиЖиВиСиӨү” компанитай байгуулсан гэрээний хүлээсэн үүрэгт үйлдвэрлэлийн үйл ажиллагааг аюулгүй байдлаар хангасан орчин нөхцөлд гүйцэтгэн явуулах хамаарал бүхий заалт байгаа. Уг үүргийг эс биелүүлсэн, аюулыг арилгаагүй тохиолдолд гэрээг шууд цуцлах хүртэл арга хэмжээ авах заалтыг компанийн удирдлагууд ашиглахыг шаардаж байна. “Эрдэнэс таван толгой”компанийн үйлдвэрлэлийн талбайд гарсан ослын тохиолдол 2016 онд 68 удаа, 2017 онд 34 удаа бүртгэгдсэн байгаа юм. Үүнд туслан гүйцэтгэгчээр ажиллаж байгаа “ТиТиЖиВиСиӨү” компанид гэрээний үүргийн хэмжээнд дүгнэлт хийж хангалттай хариуцлага тооцоогүй. Тэгш бус гэрээний нөхцөлөөс болж “Эрдэнэс таван толгой” компани болон нийт ажилчид, хувьцаа эзэмшигчид төдийгүй Монгол Улсын гурван сая иргэн хохирч байна. Зүүн цанхид ажиллаж буй Хятад даргатай, Сингапур улсын иргэний хөрөнгө оруулалттай “ТиТиЖиВиСиӨү” компанийн 1м3 уулын ажил хөдөлгөх үнийг 11750-иас 7350 төгрөг болгон бууруулж, Баруун цанхийн уурхайд ажиллаж буй Монгол компанийн үнэлгээг 6450-иас 7350 төгрөг болгон нэмэгдүүлж хоёр уурхайн үнэлгээг тэгш болгох хэрэгтэй. Ингэснээр жилд 115 тэрбум төгрөг хэмнэх боломжтой бөгөөд нэг иргэнд жилд 38000 мянган төгрөг ноогдоно гэв.
Мөн тэрээр хэвлэлийн хурлын төгсгөлд хэлэхдээ “ТиТиЖиВиСиӨү” компанитай байгуулсан гэрээг өнөөдөр хүртэл олон улсын гэрээ гэж ташаа ойлголтоор төөрөгдүүлэн, тендерийн болон санхүүгийн хууль зөрчсөн нь “Эрдэнэс таван толгой” компанид эдийн засгийн алдагдал учруулах санааг агуулж байна. Энэ нь зохион байгуулалттайгаар хууль бусаар орлого олох гэмт бүлэглэлийн үйлдэл, шинж байгаад мэргэжлийн байгууллагууд, үндэсний аюулгүй байдлын үүднээс хандаж анхаарлаа хандуулна гэж итгэж байна хэмээн онцлон хэлж байв.
Б.ҮРЖИГ
ГЭРЭЛ ЗУРГИЙГ Г.БАЗАРРАГЧАА