Ерөнхийлөгчийн сонгуульд Ардчилсан намаас нэр дэвшигч Х.Баттулгын “Мил хаус” компанийн эзэмшлийн улсын дугаартай хар өнгийн жийп машин их хэмжээний мөнгө ачиж явсныг Говь-Алтай аймагт саатуулан шалгаж байна гэх мэдээлэл гарсан.
Тэгвэл Ардчилсан намын сонгуулийн штабаас дөнгөж сая мэдээлэл хийлээ. Намын удирдлагууд нь сонгуулийн хаалтын үйл ажиллагаандаа оролцчихоод дээрх асуудалтай холбогдуулан мэдээлэл өгсөн юм. Уг хуралд АН-аас намын дарга С.Эрдэнэ болон Нийсэлийн засаг дарга асан Э.Бат-Үүл тэргүүтэй хүмүүс оролцлоо.
Энэ үеэр С.Эрдэнэ ярихдаа “Дөнгөж сая манай Ардчилсан нам сонгуулийн хаалтын үйл ажилагаагаа хийлээ. Яг энэ үеэр бидэнд нэгэн ноцтой мэдээлэл ирлээ. Монгол Улсын хэмжээнд намуудын зарцуулж болох санхүүгийн нийт зардлыг тогтоож өгсөн. Ардчилсан нам хуульд заасан хэмжээнд санхүүжилт олгоод сурталчилгаагаа хийж, хүмүүсийг ажиллуулж байгаа. Өнөөдөр хагас сайн өдөр маргааш бүтэн сайн. Энэ үед банкууд амардаг. Тиймээс бид сонгуулийн сурталчилгаанд ажилласан ажилчдын мөнгийг гаргаад баруун аймгууд руу өгч явуулсан. Гэтэл эдгээр хүмүүсийг маань саатуулж, намын өмч хөрөнгийг хураасан байна. Тэнд казак хэл дээр гаргасан сурталчилгааны материал, CD, ажилчдын цалин зэргийг авч явсан юм. Говь-Алтай аймгийн цагдаагийн газраас уг асуудлыг лавлахад “шалгаад явуулна” гэдэг хариу өгч байсан бол өнөөдөр ийн улстөржүүлж, ноцтой алдаа мэтээр нийгмийн шуугиан болгож байгаад бид цочирдож байна. Ардчилсан намаас санал худалдан авах зардлыг авч явсан байна хэмээн зарлаж байгаа нь Монгол улсын хууль тогтоомжийг ноцтой зөрчсөн үйл явдал болж байна. Аливаа асуудлыг шалгаж байхад буруутай нь шүүхээр л тогтоогдоогүй бол олон нийтэд зарлах эрх хэнд ч байхгүй. Цагдаагийнхан нийгмийн амгалан тайван байдлыг хангах хэв журмыг сахиулах үүрэгтэй. Гэтэл машинд нь дур мэдэн үзлэг хийгээд, зардал мөнгийг хураагаад, олон нийтэд худал мэдээлэл түгээж байгаа нь хэт улстөржсөн цагдаагийн байгууллагатай улс болжээ гэж харагдаж байна. Тиймээс үүнд бид эрс хатуу няцаалт өгч байна.
Н.ГАНЧИМЭГ