ОХУ-ын Саранск хотын “Мордовия арена” цэнгэлдэх хүрээлэнд урд шөнө хөлбөмбөгийн ДАШТ-ий “В” хэсгийн Иран-Португалын гуравдугаар тойргийн тоглолт болж, 1:1-ээр тэнцлээ.
Хоёр багийн тоглолт тэнцээгээр өндөрлөсөн нь Португалд ашигтай хувилбар байж, хэсэгтээ хоёроор гарлаа. Энэ тоглолтын 45 дахь минутад Португалын тоглогч Рекардо Күарезма эхний гоолыг оруулснаар португалчууд тэргүүлж эхэлсэн.
Улмаар 54 дахь минутад К.Роналдо 11 метрээс хийсэн торгуулийн цохилтыг хаалгач амжилттай хаасан юм. Роналдо тоглолтын 83 дахь минутад шар хуудас авлаа. Иранчууд гоол оруулах гэж нэлээд хүчин чармайлт гаргасны дүнд 93 дахь минутад Карим Ансарифард тэнцээний гоолыг оруулж чадлаа. Харин Ираны шигшээ баг энэ удаа талбайд заавал хожих даалгавартай ч ийнхүү Португалтай тэнцэж, шөвгийн 16-д үлдэж чадсангүй.
Мөн энэ цаг мөчид Калининград хотноо “Калининград” цэнгэлдэх хүрээлэнд Испани, Мороккогийн тоглолт болж, 2:2-оор тэнцлээ. /Иско 19, Яго Аспас 90+2, Халид Бутаиб 14, Юссеф Эн-Несири 81/.
Ийнхүү “В” хэсгийг Испани тэргүүлж, Португал удаалж Иран дөрвөн оноогоор гуравт бичигдэв. Харин Морокко нэг оноо авснаар энэ удаагийн дэлхийн аваргын тоглолтоо өндөрлүүлэв.
Хөлбөмбөгийн 21 дэх удаагийн буюу 2018 оны ДАШТ-ий шөвгийн 16-д өрсөлдөх эхний дөрвөн баг ийнхүү тодорлоо.
ДАШТ-ий “А” хэсгийн тэргүүн баг Уругвай, Португалын шигшээ багтай зургадугаар сарын 30-нд тоглох бол “В” хэсгийн тэргүүн баг Испани ОХУ-ын шигшээ багтай долдугаар сарын 1-нд тоглох юм.
Харин ирэх шөнө “С” хэсгийн Дани-Франц, Австрали-Перу, “D” хэсгийн Нигери-Аргентин, Исланд-Хорватын тоглолтууд болно.