Швейцарийн Лозаннь хотноо өчигдөр болсон Олон улсын сонирхогчдын боксын холбооны (AIBA) ээлжит бус хурлаар Мэргэжлийн боксын тамирчдыг “РИО 2016” олимпийн их наадамд оролцох асуудлыг хэлэлцээд оролцуулах шийдвэр гаргасан байна. Энэ хуралд ОУСБХ-ны 88 гишүүн орноос 84 улс энэхүү шийдвэрийг гаргахад санал нэгтэй дэмжжээ.
ОУСБХ-ны 2013 оны шийдвэрээр мэргэжлийн боксын рингэнд 15-аас доош тоглолт хийсэн, богино хугацааны гэрээтэй тамирчин олимпод оролцож болно гэсэн хязгаарласан заалт гаргаж байв. Харин шинэ дүрмийн өөрчлөлтөөр ямар ч мэргэжлийн тамирчин нас, туршлага хамаарахгүйгээр олимпод оролцох эрхтэй боллоо.
Мэргэжлийн тамирчид “РИО 2016” олимпийн эрхийн төлөө хамгийн сүүлчийн эрхийн тэмцээнд Венесуэлийн Варгас хотноо 7 сарын 3-наас 8-нд тоглож эрхээ авна. Энэ тэмцээнээс олимпийн 26 эрх олгох юм. Венесуэлд болох уг тэмцээнд Монгол Улсын гавьяат тамирчин, “Лондон-2012” олимпийн наадмын мөнгөн медальт Н.Төгсцогт оролцох юм байна.