Шийдлийн Засгийн газар байгуулагдсан даруйд парламентад суудалгүй намууд эвсч Сүүдрийн Засгийн газар байгуулахаа мэдэгдлээ. Монголын Ногоон нам, Иргэний хөдөлгөөний нам, Хамаг Монгол Хөдөлмөрийн нам хамтран нийгмийн нүд чих болж ажиллая хэмээн бусдыгаа уриалжээ. Уриалгад “АН засаг, төр удирдан жолоодох чадваргүй гэсэн нэрийн дор УИХ-ыг сөрөг хүчингүй болгох зорилт тавин парламентад суудалтай бүх намын төлөөллийг хамарсан “Шуурхай” Ерөнхий сайдтай, “Шийдлийн” гэх Засгийн газрыг байгууллаа” хэмээн онцлоод ийм үед парламентад; суудалгүй улстөрийн хүчнүүд улс орон, нийгмийнхээ өмнө хүлээсэн үүргээ гүнээ ухамсарлаж, төр засагт хөндлөнгийн хяналт тавих, эх орноо зөв голдрилд оруулах чадвар, чадавхи болон боломжоо харуулах хариуцлагатай үе ирсэн тул хамтарч ажиллахыг санал болгожээ.
“Сүүдрийн” Засгийн газрын хууль эрхзүйн баримт бичгийн төсөлд Иргэний хөдөлгөөний намын дарга Ж.Сүхжаргалмаа, дэд дарга Ж.Занаа нар ажиллаж байна. Ингэхдээ Английн жишгээр, тодруулбал Эзэн хааны доор Засгийн газрын хоёрын танхим ажилладагаас санаа авч үзэл баримтлалаа боловсруулж буй сурагтай. Монголын Ногоон намаас Сүүдрийн Засгийн газар танхимын бүтцээр ажиллахгүй, тиймээс Ерөнхий сайдгүй байх гэнэ. Харин намууд өөр, өөрсдийн чиглэлээр асуудал хариуцаж хяналт тавьж ажиллах санал дэвшүүлсэн бол цөөнгүй улстөрийн хүчин энэ эрчээрээ 2016 онд эвсэл болж оролцоё гэсэн байр суурь илэрхийлжээ. Монголд “Сүүдрийн” Засгийн газар байгуулж ажилласан жишиг бий. Тухайлбал, Иргэний Зориг нам сөрөг хүчний үүрэг гүйцэтгэж, “Сүүдэр”-ийн засаг байгуулан танхимын бүтцээр ажиллаж байсан удаатай. Гэхдээ тэр нь сонгуульд чиглэгдэж байв. Тэгвэл, энэ удаагийн эвсэл ч гэсэн 2016 оныг угтсан шоу байх магадлалтай ч эвсэлд нэгдсэн Ногоон нам, Хамаг Монгол Хөдөлмөний намын дарга нар үгүйсгэж байна. Тус эвслийг Хөгжлийн хөтөлбөрийг хэрэгжүүлэгч нам болон БНН дэмжиж байгаа бол, МУНН сөрөг хүчин байх ёстой гэдэг үүднээс дэмжиж байгаа ч үйл ажиллагаанд оролцохгүй гэсэн байна.