DNN

Дэлхийн эдийн засгийн нэгээ­хэн
хүндрэлийн үе л дээ. Эрх баригч Английн Хөдөлмөрийн намынхан улс орныг төдийгүй
дэлхийг түгшээж байгаа энэ асууд­лаас хэрхэн гарах талаар хэлэл­цүүлэг явуулж.
Тэр үед Ерөнхий сайд асан Тони Блэйр “Эдийн засгийн хямрал ч яахав. Үүнээс
хэцүүтэй нь лидерийн хямрал болоод байна” гэсэн гэдэг. Түүний­хээр лидергүйдэл
нүүрлэж, салбар салбараа зохицуулаад аваад явах толгой ховордож, эдийн засгийн
уналт гаарчээ. Зөв онош. Дэлхийн улстөрч тэрбээр дэлхийд лиде­рийн залгамжлал
тасалдсанд зовнисноо ийн илэрхийлжээ.

Хүн төрөлхтөнд уур амьсгалын
өөрчлөлт, уул уурхайн олборлолт, хүнсний хомсдлоос эхлээд нийтлэг эрх ашигт
ноцсон асуудлууд зөндөө. Харин энэ бүгдэд нь зүг чиг болж түүчээлэн дагуулах
лидер алга болжээ.

Дэлхий, түүний нэгж улс орны
хэмжээнд ч лидерээр гачигдсаныг нэрлэж байна. Германыг гэхэд хэдийнэ лидерийн
хямралтанд тооцжээ. Бод л доо. Ангела Меркель канцеллор болж, саяхан гэхэд
ердөө сарын өмнө вьетнам гаралтай залуу дэд канцеллороор сонгогдлоо. Манайхны
төлөг гэлцдэг вьетнам шүү дээ. Гэтэл германчууд үндэстнээ эрхэмлэн дээдэлдэг
үзлээр ямар улсууд билээ. Палестины газар нутагт оршин суудаг байсан хоёр,
гуравхан омгийн жүүдүүд дэлхий­гээр нэг тарж, хөрөнгө мөнгөтэй болж аваад
Германы эдийн засгийг гартаа атгах нь гэсэн эсэргүүцэл, эгдүүцэл сүүлдээ ямар
аймшигтай хядлагад хүргэснийг бид мэднэ. Германчууд бол ийм л үндэстэн байсан.
Яах аргагүй он цагийнхаа лидер бай­сан Адольф Гитлерийн еврей үндэстэнд хандсан
хандлага, харгис­лалыг зөвтгөхийн аргагүй. Оюун санааны лидер Жавхарлал Неру
“Аливаа омголон, онгироо үндэстэн үргэлж мөнхөд шаналж явах учиртай” гээд
үргэлж Йерус­лимийг мөрөөдсөн ийм нэгэн үндэс­тэн орон гэр ч үгүй дэлхийгээр
зовж явах юм даа хэмээн 1933 онд бичсэн номондоо дурдсан байдаг билээ. Олныг
нуршиж, төөрөөд яахав. Ямартай ч дэлхийн их гүрэн Герман лидерийн хомсдолд
орсон нь Ангела Меркель (жендэрийн тэгш байдлыг хангасан гэдгээрээ биш шүү)
гэдэг канцеллортой болж, орлогчоор нь вьетнам хүн сонгосноор батлагдаж байна.

АНУ ч гэсэн цэвэр лидерийн
удирдлага, лидерт итгэх итгэл үнэмшлээр урагшилж ирсэн орон. Ерөнхийлөгчийн
засаглал нь ч иймийг илүү хурцаар шаарддаг. Гэхдээ 2007 онд Барак Обамаг нэр
дэвших тухайгаа зарлахад Ерөн­хийлөгчөөр сонгогдоно гэж итгэсэн хүмүүс цөөхөн.
Богино хугацаанд хамгийн их мөнгө босгочихоод байхад нь ч шүү. Барак Обама
гайхалтай лидер байж болно. Гэхдээ индиануудыг мулгуу халта­рууд гэж бодож
ирсэн, харуудыг цагаан арьстантай нэг ангид хамт суралцаж нэг автобусанд суух ч
эрхгүй байлгаж ирсэн, домогт дууч Майкл Жексоныг хүртэл арьсны өнгөө солиход
хүргэсэн Америкт тэрхүү ханыг нэвтэлж зөвшөө­рөгдөнө гэдэг ямар ч лидерт хэцүү.
Үүнийг манлайллаас бус лидер­гүйд­лээс гэж тайлбарлавал илүү үнэмшилтэй.

Одоо ч гэсэн  Ойрхи Дорнодод Израилийн алагдсан Ерөнхий
сайд И.Рабин ч юм уу, эсвэл эрээн алчуурт Ясир Арафат шиг лиде­рүүд гарч
ирэхгүй л байна шүү дээ. Газар нутгийн маргаан нь дууссан уу гэвэл үгүй. Хэрүүл
тэмцэл нь үргэлжилсээр байгаа ч тэдэн шиг танигдсан хүмүүс харагдахгүй л байна.

Дэлхийд асуудал үүсгээд байгаа
лидерийн хямрал манайд хэрхэж байгаа вэ. Лидерүүд хаа сайгүй байна уу, лидер
огт алга уу.

Улс төрийн ажиглагчид Мон­голд
лидер алга гэх болов. Алга болчихсон уу, ерөөсөө төрөхгүй байна уу, байгаагаа
бид хүлээн зөвшөөрөхгүй байна уу. Хэсэг бүлэг хүмүүсийг нийтлэг эрх ашигт  хөтөлж, удирдан зохион байгуулж чадах хүнийг
лидер гэнэ гэсэн онолын өгүүлбэр байдаг. Эртний гүн ухаанч Плато лидерийн мөн
чанарыг тодорхойлохоор оролд­соныг одоо ч эрдэмтэд үргэлж­лүүлж  байгаа.

Зарим судлаач лидер төрдөг гэдэг
бол зарим нь цаг үе лидерийг төрүүлдэг ч гэдэг. Хятадын эдийн засгийн
өөрчлөлтийг хийсэн Дэн Сяопинь, хогондоо дарагдсан хөгийн хотыг хөгжлийн
өндөрлөгт хүргэсэн Сингапурын Ли Куан Юу, Английг социалист зам руу халти­ра­хаас
нь өмнө татан авч эдийн засгийн хувьд хүчирхэг болгосон Маргарет Тетчерийг ч
цаг үе л төрүүлсэн гэх. Тэдэн дээр Мартин Лютер Кинг, Махатма Ганди, Нельсон
Манделла, Хенри Киссин­жерийг ч нэмдэг. Бас лидерийг бэлтгэдэг гэх бөгөөд үүн
дээр хятадууд нарийн чанд дэг сургуу­лийг бий болгоод ч байгаа гэх юм.

Монголд хэн лидер вэ. Энэ талаар
хамтдаа сонжих гээд үзье. Лидер хүн судалгаагаар 40-өөс доошгүй хувийн санал
авч, нийг­мийн сэтгэл зүйг дагуулдаг гэдэг нь батлагдах ёстой гэдэг юм билээ.
Харин манайд дээд талынх нь 20-25 хувь. Тэртээ 2000-2004 онд үндэсний их
удирдагчаар тодорч байх үедээ Н.Энхбаярын чансаа 40 хувьд хүрч байсан гэсэн
яриа бий. Гэхдээ тухайн үеийн нөхцөл бай­дал, судалгааны байгууллагуудын
зулгуйдал хэт их байсан учраас үүнийг бодит гэхэд бас эргэлзээтэй.

Судалгаануудад нэр нь байнга
тогтмол орж ирдэг тэр эрхмүүдийн талаар хамтдаа тогтож үзье. Өөрөөр хэлбэл
лидер гэж тооцог­дож болох тэр хүмүүсийн тухайд саатаж сонжиж байгаа явдал юм.

  Н.Энхбаяр:

Хэдийгээр 40 хувийн бодит эсэхийг
нь хардаж байгаа ч манайдаа хамгийн өндөр хувийг авч, нийгмийг дагуулж байсан
баримтыг нь харгалзаж үзэх ёстой. Бас МАХН-ыг 2000 оны сонгуульд удирдан авч
орж, үнэмлэхүй ялалт байгуулсан нь түүнд манлайллын чадвар байсныг шууд
харуулдаг. Дээрээс нь 2004 оны сонгуулийг ч дурдахаас аргагүй. Түүнийг Намбарын
бус самбарын Энхбаяр боллоо гэдэг нь 
түүнээс өөр хэнтэй зураг авахуулах билээ гэсэн итгэл үнэмшилд
дагуулсан  бодит байдлаас үүдэлтэй. Бүх
намаараа дагаад ард олон түүнд итгэхээс өөр замгүй байсан үе бий. Энэ он жилүүд
маш удаан үргэлжилсэн гэдгийг санах.

  С.Баяр:

Тавиад оныхны төлөөл­лөөс бас л
хошуучлагчдын нэгд байсан гэхээс өөр аргагүй. Тиймээс ч сонгууль болоход ердөө
зургаахан сар үлдээд байхад эрх баригч намын эрх мэдлийг авч ялалтын төлөө
зүтгэсэн. Өөрийнх нь мөнхийн хөрзгөр царайнд зохиогүй гэмээр инээмсэглэсэн
зураг авахуулсаар нэр дэвшигчдээ дэмжсэн. Бас Засгийн эрхийг дангаар байгуулах
боломжтой атлаа долдугаар сарын 1-ний хэл амыг намжаахаар Стандарт бус Засгийн
газрыг байгуулна хэмээн зарлаж үүндээ намынхнаа, бас ард түмнийг ч дагуулж
чадсаныг анзаарч санах хэрэгтэй байх. Түүнчлэн Оюу толгойн гэрээг бай­гуулна гэж
зүтгэж, Таван толгойн хувьцаа эзэмшигчдийн хувийг нь төрд өгүүлж, дараагийн
холио солио хийсэн баримтуудыг ч хар­галзаж үзэх ёстой байх. Хамгийн гол нь тэр
Ерөнхий сайдын албаа өгч чадсан. Орост гэхэд л В.Путин энэ алхмыг хийж чадахгүй
л байгаа.

М.Энхболд:

Түүний багийг маш хүчтэй гэдгийг
улс төрийн хүрээнийхэн байнга ярьдаг. Хотын фракц нь эрх барьдаг МАН-д хамгийн
хүчтэй гэдгийг нь өрсөлдөгч фракцынхан ч хүлээн зөвшөөрдөг. Аж ахуйн ажлыг сайн
хийдэг, хүмүүсийг ажиллуулж, бас хэзээ зандарч хэзээ хайрлах вэ гэдгээ сайн
мэддэг учраас түүний хүмүүс үнэнч. Тэрбээр ярьж чад­даггүй нь түүний гол
дутагдал. Өөрөө үүнийгээ эерүүлэхээр “Ярих биш хийх нь чухал” гэх ч ард олон
популизмыг үл ялган сайхан яриагаар итгэл үнэмшлээ хийж урагшилдаг нь дэлхийн
түүхээр батлагдсан явдал. Ер нь лидерийн мөн чанар популизм хийх явдал гэдэг.

Cү.Батболд:

Магадгүй тэр хүнийхээ хувьд сайн
хүн, бас боловсролтой ч байж болох. Гэхдээ ард түмний итгэж дагадаг тэр хүн нь
амьдралын хар борыг ч мэддэг байх нь чухал байдаг. Бидэнтэй адилхан, бидний
асуудлыг мэддэг хүн шүү гэсэн итгэл үнэмшлээр хүмүүс дагадаг. Харин нөгөө хүн
нь бидний өдөр тутмын амьдралаас хол гэдгийг тэд мэддэг бол дагах нь
эргэлзээтэй.

У.Хүрэлсүх:

Сү.Батболдын нөгөө тал нь гэж
болно. Хөрсөн дээрээ ойрхон бууж, намын аппаратаасаа эхлээд хүмүү­сээ араасаа
дагуулаад явж чаддаг ч…

Яагаад лидерийн тухай асуу­дал
амьдрал мэддэг бас боловс­ролтой байхыг шаарддаг юм бол.

Ц.Элбэгдорж:

Ерөнхийлөгчийн алба нь на­мын
гишүүнчлэлээс нь түдгэлзүүлс­нээр нам төвтэй манай тогтолцоонд шатрын өргөөс
холдуулаад байгаа. Хорин жилийн өмнө хийсэн ардчилсан хувьсгалыг нь эртнийх гэж
үзлээ гэхэд түүний шинэ санааны машин, хүмүүсийг итгэн үнэмшүүлж дагуулж
чаддаг, тэр нь популизм байсан ч хамаагүй дагуулж чаддаг чанарыг нь онцлох
хэрэгтэй. Өөрөө газар ухаж, шороо зөөхөөс илүүтэй олон түмний ашиг сонирхлыг
нэгтгэн гаргаж ирж туг эргүүлдэг лидерийн чанар түүнд бий гэж хүмүүс онцолдог.
Түүний сүүлийн үед ярих болсон хууль эрх зүйн шинэтгэл, архинд нэвчигсдээс
салах, модыг тайрах бус ургуулдаг болох тухай зарлиг нь хүмүүст их хүрч байгаа.
 
Н.Алтанхуяг:

МАН-тай дүйхүйц том намын дарга
учраас тэр яах аргагүй анхаарлын төвд байж таарна. Гэхдээ МАН-ыг дагаж Засгийн
газар байгуулж, тэгээд Шадар сайдаар ажиллах болсон нь хүчтэй сөрөг хүчний
намын дарга байж том харагдах боломжоос нь авто­ма­таар холдуулсан. Бас Ерөнхий
сайдыг мэдээлэл хийх бүрийд дэргэд нь байж баталгаажуулж байгаа нь түүнд сөрөг
талыг авчир­даг гэж үздэг. Нөгөө талаас том эрх ашгийн төлөө нэгдсэн хэмээн
тайл­барладаг ч нам тогтолцоотой Монголд сонгогчид үүнийг өршөөн үзэх нь юу л
бол.

Монголд лидер байгаа үгүй эсэх
дээр өөр, өөрийнхөө дүгнэлтийг хийгээрэй. Гэхдээ дэлхий даяараа лидерийн
хомсдолд орсон нь нэг талаас батлагдаж, Монгол ч дэлхийн нэг орны хувьд
үндэсний лидерээр цангасан хэвээр байгаа. Харин үндэсний хэмжээний, дэл­хийн
хэмжээний лидертэй болохын тулд яах ёстой вэ. Байгаа хэдийгээ дэмжиж, үзэл
санааны хувьд нь дэмнэх ёстой юу. Эсвэл ирж яваа цагаа, шинэ үеийнхнийг
төрүүлэх ёстой юу. Ямар ч улс, ямар ч дэлхий ертөнц лидерийн үзлээр, лидерийн
дагууллаар, лидерийн популизмаар, лидерийн хөглөлөөр урагшилдаг нь тодорхой
болсон. Түүх үүнийг тодорхойлсон. Хаашаа явж байгаагаа мэдэхгүй хөлөг онгоцын
дарвуулыг ямар ч хүчтэй аясын салхи үлээлээ ч нэмэр үгүй гэдэг шиг лидертэй
байхын чухлыг мэдрэхгүй тохиолдолд улс үндэстэн хөгжихгүй билээ.

Д.Кёкүшюүзан Батбаяр, Т.Баясгалан, Б.Элбэгбаяр гурав.

Монгол Улсын гавьяат жүжигчин,
дуучин Түвшинжаргалын Баясгалантай ярилцлаа.

-Гэр бүл зохиож, шинэ хүнтэй болоод
уран бүтээлийн хэсэг завсарлага авсан дуучин Т.Баяс­галанг хэзээ шинэ дуугаа хү­мүүст
хүргэх бол гэж хүлээж байгаа хүмүүс цөөнгүй. Гэтэл дуучин маань шинэ дуугаар бус
кинонд тоглоод гараад ирлээ. Юу болж байгаа нь энэ вэ гэж асуу­маар байна?

-Би хэсэг хугацаанд уран бүтээ­лийн
завсарлага авсан нь үнэн. Гэхдээ сүүлийн үед зүгээр суусан­гүй. Шинэ уран бүтээлүүдээ
хийж эхлээд байгаа. Удахгүй үзэгч, сонсогч олондоо уран бүтээлээ хүргэх болно. Одоо
гэхэд Монголын анхны 3D клипийг үзэгчдэдээ хүргэ­хээр төлөвлөөд ажиллаж байна.

Киноны хувьд одоогоос гурван сарын
өмнө “Рашаантын 18” киноны уран бүтээлчид надад хандсан юм. “Хэцүү анги” киноны
захирал, багш нарын дүрээр нь хүмүүс андахгүй жүжигчин Навчаа, Сараа эгч нар энэ
кинон дээр хамтран ажиллаж, ивээн тэтгэж өгөөч ээ гээд орж ирсэн л дээ. Урьд нь
кинонууд дээр хамтран ажиллах санал ирдэг байсан ч дуунаас сэдэвлэж кино хийх гэж
байгаа гэдэг нь надад содон санагдсан. Биднийг бага байхад орцонд “Рашаантын
18” гэдэг дуу хаа сайгүй хангинаж, хүмүүс дагаж дуулдаг байсан даа. Ардын дууны
хэмжээнд хүртэл түгж чадсан энэ дуунаас сэдэвлэж кино хийнэ гэдэг нь, нөгөө талаас
хүмүүсийн хайр хүндэтгэлийг хүлээсэн жүжигчид хамтраад нэг баг болж байгаа нь надад
таалагдсан. Харин багийн­хан маань энэ кинонд нэг дүр бүтээчихээч гэсэн учраас сүүлд
нь нэг нүдний эмчийн дүрийг бүтээх гэж оролдлоо. Ер нь киноны багийнх­ны нэг сэтгэлээр
нэг цул болж ажилладаг нь надад тун сайхан санагдсан. Нэг нэгийгээ  сайхан энергиэр цэнэглэж, хур­цалж байдаг нь тун
гайхалтай.

-Өөрөө кино шиг л клипүүд хийдэг
байсан даа. Тэгтэл шинэ орчин санагдаагүй байлгүй?

-Чөлөөт уран бүтээлч бол ган­цаараа
бүгдийг хийдэг бол кинон дээр жинхэнэ багаар ажиллахын чухлыг харуулдаг юм билээ.
Нэгнээ өвдчих вий, алдаа гаргачих вий гэж жинхэнэ нэг гэр бүлийнхэн шиг биенээ халамжилж
байдаг.  Нэг нь алдчих юм бол киноны багт
тэр чигт нь нөлөөлж байдаг учраас  хичээ­хээс
аргагүй. Кино маань инээд­мийн кино. Амьдрал дээр өдөр тутамд гарч байдаг тэр үйл
явдлыг хөг­жилтэй хэлбэрээр харуулсан. Би өөрөө инээдмийн кинонд их дуртай л даа.

-Сүүлийн үед бүхий л хүмүүс кино
руу хуйлрах болжээ. Зарим кино тэрбумаар нь ашигтай байдаг гэх юм. Тийм болохоор
л та кино бизнес рүү оржээ дээ?

-Кино хийж байгаа хүн бүр овойж оцойтол
мөнгө олж байгаа гэдэг нь юу л бол.  Олж байгаа
нь ч байна, олохгүй байгаа нь ч нэлээд байна. Сүүлийн үед л энэ талаар судалж байна
л даа. Арваас ганц хоёр нь л ашиг олдог байх. Миний хувьд элдэв ашиг харахаасаа
илүүтэй дуу кино болж байгаа гэдгийг нь олзуурхан дэмжсэн хэрэг л юм.

-Дууны уран бүтээлдээ зү­гээр суугаагүй
гэлээ. Гэвч Баяс­га­лангийн гэсэн тодотголтой шинэ дуу сонсоогүй санагдаад байх
чинь. Яагаад уран бүтээ­лийн тал дээр ийм хойрго байгаад байдаг болов оо?

-Би “Өвөлжих хун” гээд нэг сайхан
бүтээл дээр ажиллаж бай­гаа. Нэгмөсөн дуугаа дүрсжүүлээд хүмүүст хүргэе гэж бодож
байна. Хуучин бас ч сайхан дуунууд дуулж байжээ. Би хэсэг уран бүтээлийн засварлага
авлаа. Тэгэхээр өмнөх дуунууддаа дүйцэхүйц хийгээд давж гарахуйц уран бүтээл хийе
гэж  бодож, хүлээж байна. Үнэнийг хэлэхэд
санаанд хүрсэн сайхан дуунууд ирэхгүй л байна шүү. Санаанд хүрсэн дуу ирвэл өнөөдөр
ч гэсэн дуулахад бэлэн байна.

-Хүмүүсийн танил болж, ал­дар цол
авчихаар хуучин шигээ дэврүүн сэтгэлээр шинэ бүтээ­лээ хүмүүст дор, дор нь хүргэж
чадахгүй хянаад байдаг тал байдаг уу?

-Би үнэндээ тэгж хэцүү талаас нь хүлээж
авдаггүй. Хүн хүн өөр өөр л байдаг байх. Үнэнийг хэлэ­хэд хэсэг уран бүтээлийн завсар­лага
авлаа, нөгөө талаас нэгэнт гавьяат гэдэг цолыг хүртсэн хүний хувьд мэргэжлийн дуучин
хүний чансааг шалгасан, дуучнаас техник шаардсан тийм дууг дуулахсан гэсэн хүлээлт
байна аа. Шинэ залуу дуучид ч олноор гараад ирж, тэдэндээ ч бас боломж олгох нь
зөв байх, тийм үү.

-Шинэ залуу дуучдад боломж олгоно
гэдэгтэй санал нийлэхгүй байна аа. Ер нь хүнийг ид бүтээх үед нь шагнаж, урам өгч
байх нь чухал гэдэг ч уран бүтээлийн хувьд царцааж хөргөчих юм бол хэрэггүй юм биш
үү?

-Бусдадаа боломж олгоно гэдэг нь тэр
газарт миний гэсэн орой зай үгүйлэгдэж байна уу, үгүй юу гэдгийг харж байгаа хэрэг
л дээ. Түүнээс Баясгаланг дуу хуураас холтгон төсөөлөхийн аргагүй. Дуугаа дуулаад
л гараад ирнэ. Би гавьяат цолыг хөл хүнд байхдаа хүртсэн. Хүүгээ төрүүллээ. Хүү
маань одоо ой есөн сартай боллоо. Би жил бүрийн гурав, зургадугаар сард уран бүтээлээ
үзэгч олондоо барьдаг байсан. Уг нь хоёр жил л өнжсөн юм шүү дээ. Гэтэл танаас эхлээд
хатуухан шаардаад эхэлж байна. Одоо уран бүтээлдээ илүүтэй анхаарч, үзэгч олондоо
чамбай сайхан бүтээлүүдээ барьж эхлэх болно.

-Хэзээ?

-Тун удахгүй. Одоо бяр амтагдаж байна
шүү.

-Олимпийн аварга төрдөг өдөр Кёкүшюүзан
та хоёрын хотын гудмаар машинтай дав­хиж байсан зураг энд өлгөөтэй байна. Ингэхэд
та хоёр хэдэн онд танилцсан юм бэ?

-Бид хоёр 2007 онд танилцсан юм. Хуримаа
2009 онд хийсэн.

-Цагаан хоолны ресторан нээсэн
байх аа. Баясгалан маань цагаан хоолтон болчихсон уу?

-Би цагаан хоолтон биш л дээ. Монголчуудаа
цагаан хоолтон бол гэж уриалахгүй. Гэхдээ махны хэрэглээгээ хянаж байгаасай гэж
хүсдэг. Цагаан хоолны “Хайрын зоог” ресторан бол махны хэрэг­лээгээ багасгаж цагаан
хоол идэхийг хүссэн тэр хүмүүст зориул­сан ресторан л даа.

-Сүүлийн үед энергийн ойл­голт,
бясалгалын тухай их ярих боллоо. Өөрөө бага залуугаасаа бурхан шашны дуу дуулдаг
бай­сан. Ямар нэг чиглэлийн  бясал­гал хийдэг
үү?

-Өвөө, эмээ маань бурхны шашин шүтдэг
байсан. Багадаа буурал ааваараа тарни заалгуулж, хааяадаа уншчихдаг хүүхэд бай­лаа.
Тиймдээ өөртөө тэрүүхэндээ итгэлтэй нэгэн байсан, хүүхэд байхаасаа л. Бурхан харж
байгаа, нүгэл үйлдэхгүй, бурхан шүтдэг болохоор сайхан амьдарна гэж л бодож өссөн.
2003 оноос бурхны тарни, буддагийн дуунуудыг дуулж эхэлсэн. 2009 онд хөл хүнд байх­даа
“Баяр баясгалан” гээд бурхны дуунуудаар цомог гаргаж байлаа.

Бясалгалын хувьд 2003 онд Шри шригийн
бясалгалд анх сууж байсан юм. Хүн бага боловч бясал­гаж байх хэрэгтэй. Тэгэхийн
тулд заавал ажил цагаа алдаж бясал­гаад байх хэрэггүй хэсэг хугацаанд сэтгэлээ чөлөө­лөөд
бясалгах нь чухал гэж боддог юм. Машиндаа ч юм уу, унтахынхаа өмнө ч юм уу.  Түүнээс хэт автаад хажуу хавиргын хүмүүсээ үгүйс­гээд,
таарч нийлэхгүй байх нь дэмий юм шиг санагддаг болсон шүү. Бид чинь монгол хүмүүс.  Монгол нүүдэлчин ахуйн амьдрал өөрөө агуу шүү
дээ. Сүүлийн үед би бүр илүүтэйгээр үүнийг ойлгоод байгаа. Заавал Энэтхэгийн аль
нэг шашны урсгалд хэт автах бус нүүдэлчин соёлоо шүтэж амьдрах ёстойг. Бясалга­лаас
авах юм бол бий. Би хэт дэврүүн, омголон байх хорин гурван настайдаа бясалгалд анх
яваад нэг зүйлийг ухаарч ойлгосон нь сэтгэлийн хөөрлөөр асуудалд хандахгүй байж
сурсан явдал юм.

-Баясгаланг эмээ, өвөөгийн охин
гэдгийг нь хүмүүс мэднэ. Хоёр буурайдаа зориулж дуул­сан сайхан дуу ч байдаг. Хөгшид
нь энх тунх байгаа юу?

-Би чинь төрсөн цагаасаа л зуны амралт
болонгуут хоёр хөгшин рүүгээ гүйдэг охин байв. Уг нь би хотод төрсөн хүн ш дээ.
Нийслэлийн 89 дүгээр цэцэрлэгт хүмүүжиж, арван жилийн хоёр­дугаар сургуулийг төгссөн
хүүхэд. Амралт эхлэнгүүт хөдөө явж, хичээл эхлэхээс хэдхэн хоногийн өмнө ирдэг байсан.
Би хоёр хөгшин дээр өссөнийгөө их азтай хэрэг гэж боддог юм. Хөгшдийн өвгөдөөсөө
өвлөж авсан тэр агуу ухааныг боломжийн хэрээрээ шингээж өссөн дөө.

Тоглолт болгондоо хоёр хөгш­нийгөө
хамгийн сайхан суудалд урьж, Юндэн Нансалмаа хоёр маань гэдэг байлаа. Сүүлд хоёр
буурлыгаа өөртэйгөө ойрхон байл­гах гэж Багануурын Гордок тосгонд мал хуйтай нь
авчирч, боломж л олдвол тэдэн рүүгээ гүйдэг байв даа.

Буурал өвөө маань гурван жилийн өмнө
таалал төгссөн. Бас аавын минь аав саяхан бурхан боллоо. Одоо хоёр хөгшин ээж маань
байна даа. Буурал аавыг өнгөрснөөс хойш эмээ маань зундаа Гордоктоо, өвөлдөө ээжтэй
минь хамт өвөлжиж байгаа. Өнөөдөр гэхэд эмээ маань манайд ирчихсэн л байна. Эмээгийнхээ
наадмын дээлийг хийж өгөх гээд л хөл болж байна даа, бид.

-Эмээ зээ охиндоо эрхэлж өгч байна
уу?

-Тэгэлгүй яахав. Эрхэлнэ ш дээ. Би
хоёр буурайдаа “Та хоёр намайг өчүүхэн нялхаас минь алган дээрээ бөмбөрүүлж, айлын
хооронд үүр­дэг байсан. Одоо миний ээлж ирсэн. Надад сайн эрхэл. Одоо би алган дээрээ
бөмбөрүүлж, айлын хооронд үүрнэ” гэж хэлдэг юм. Буурал аав маань охиндоо эрхэл­сээр
ная гараад бурхан болсон доо.

-Баясгалан гэдэг дуучин олны танил
болсон тэр үеийг сөхвөл С.Жавхлан гэдэг дуучин заавал холбог­доно. Та хоёрыг нэг
нэгээс чинь салгах аргагүй. Сүүлийн үед С.Жавхлан дуучин маань уран бүтээл гэхээс
илүү­тэй гал тахиж, улс төр хийгээд, Баясгалан нь бясалгал хийж, айлын гэргий болоод
нам бол­чих­лоо гэж хүмүүс яриад байгаа?

-Ангийн маань анд Жавхлан­гийн сүүлийн
үед хийгээд байгаа алхмуудыг харахад залуу хүний эрч хүч, алдахаас айдаггүй тэр
л сэтгэлээрээ үгээ хэлж, хийж яваа юм шиг санагдсан. Миний хувьд гэр бүлийн аз жаргалыг
эдэлж, гэр бүлдээ цаг заваа илүүтэй гаргаж яваа. Урьд нь дуучин Баясгалан байхад
өөрийнхөө төлөө л амь­дарч явлаа. Өөрийнхөө босно гэсэн цагтаа босч, орно гэсэн
тоглол­тдоо оролцоод явдаг байсан. Харин одоо 
ээж Баясгалан хүүгээ сэрсэн цагт дагаж сэрээд аяар нь байж байна даа.

-Мэдээж, гэр бүлээ гэлгүй яахав.
Эмэгтэй хүн бүр айлын галыг сахиж, ээж болдог. 
Гэхдээ бусдаас уран бүтээлийн авьяас­тай Баясгалан уран бүтээлээ ч хийж,
ар гэртээ ч анхаарлаа тавиад явж болохгүй байгаа юм. Зэрэгцүүлж чадахгүй байна гэж
үү?

-Зэрэгцүүлэхээр үү. Зэрэгцүү­лэхээр…

Гэхдээ зуун хувь урьдынх шигээ байна
гэж байхгүй л дээ. Гэлээ гээд таг болчихгүй. Урьдын адил жилд нэг удаа хийдэг шигээ
уран бүтээлийн тоглолтоо хийгээд л явна.

Үнэндээ урьдынх шиг сайхан бүтээлүүд
ирэхгүй байна аа. Ямартай л би тоглоом шоглоомын дундуур яруу найрагч, хөгжмийн
зохиолч нартаа “Та нарын авьяас билэг чинь шавхагдчихаа юу. Та нар бүтээлээ хийхгүй
байгаагаас би хийхгүй харагдаад байна” гэж гомдоллодог юм. Баясгалан шинэ уран бүтээл
гаргахгүй байна гэх шүүмжлэл байгаа ч энэ нь зөвхөн надаас шалтгаалахгүй байна.
Чаддагсан бол би үгээ бичээд, аялгуу зохиох сон. Даанч, чадахгүй. Нэг хэсэг дууны
бүтээл маш ихээр төрдөг байлаа. Зарим нь хоорон­доо ялгалгүй шахам. Магадгүй нэг
талаас  үзэгчдээ залхаасан байхыг ч үгүйс­гэхгүй.
Ер нь яагаад уран бүтээл хийхгүй байна вэ гэдэг асуултаа хөгжмийн зохиолчид, яруу
найрагч­дад та нар тавих хэрэгтэй байна.

-Өөрөө дуурийн дуулаачаар төгссөн
хүн. Сонгодог дуулах төлөвлөгөө байна уу?

-Байлгүй яахав. Надад сүүлийн үед
поп опера чиглэл их таалаг­даад байдаг болсон. Энэ чиглэлээр дуулна аа.

-Таны нөхөр урьд нь гэр бүл зохиож
байсан хүн. Хоёр ч хүүхэд­тэй. Тэгэхээр гэргийн хувьд илүү ухаан зарах хэрэг гардаг
болов уу?

-Тийм ээ. Хань маань өмнө нь амьдрал
зохиож, хоёр ч сайхан хүүхэдтэй болсон хүн. Яахав, өмнөх амьдрал нь болж бүтээгүй
хоёр тийшээ болсон юм билээ. Ганц бие болоод гурван жил болсных нь дараа бид нийлсэн
гэдгийг зарим­даа онцолмоор санагд­даг юм. Аавгүй өсч байгаа хүүхдүүдийн сэтгэл
эмзэг байдгийг би мэднэ ээ. Би өөрөө ч хойд аавтай өссөн хүүхэд. Хүүхдүүд байнга
аавтайгаа уулзахыг хүсч мөрөөдөж байдаг юм. Тиймээс би өөрийнхөө хувьд энэ асуудал
дээр нээлттэй байхыг хичээдэг. Харин ээж нь хүүхдүүдээ аавтай нь хэр ойр байлгахыг
хүсэх эсэх нь тэр хүний л асуудал шүү дээ.

-Нэг хэсэг хэвлэлээр Кёкүшюү­зан
өмнөх эхнэртээ мөнгө өгөх­гүйн тулд хамаг эд хөрөнгөө Баяс­галангийн нэр дээр шилжүүлсэн
гэнэ, шүүхдэж шүүхдэж 500 сая төг­рөг өгөх болж гэнэ гээд баахан бичсэн учраас ингэж
асууж байна л даа?

-Хоёр хүүхэд болон урьдынхаа эхнэрт
өгөх ёстой юмыг нь хан­галттай өгчихсөн гэж ойлгож болно.

-Өгөхгүй гэж шүүхдээд, бие биенээ
үзэхгүйдээ асуудал хүр­сэн юм уу?

-Тийм айхтар сүртэй юм болоо­гүй.
Манайхан чинь юмыг дэвэргэдэг улсууд шүү дээ. Өгөх л ёстой юм чинь өгөлгүй яахав
дээ.

-Хүүгээ ах, эгч хоёртой нь уулзуулсан
уу?

-Одоохондоо уулзаагүй л байна. Би
хувьдаа нэгэнт ах дүүс улс хойно уулзах хэрэгтэй гэж боддог. Ээж нь ирүүлэх дургүй
байдаг юм аа. Гэхдээ уулзуулах л байлгүй дээ.

-Бас нэг асуух зүйл байна аа. Иймэрхүү
зүйл асуугаад байгаад уучлаарай. Гэхдээ өөртэй чинь уулзсаных гадуур яригддаг зүйлсийг
тодруул­маар байна л даа. Баясгалан
аавын­хаа гэр бүлийн хүн ар­дын жү­жиг­чин Ш.Чимэд­цэеэ­тэй таа­рамж муутай байдаг
гэдэг тухайд юу хэлэх вэ?

-Эмзэглэх юу байх вэ. Би аав­тайгаа
үргэлж холбоотой байдаг.

Саяхан аавын ээж болох буурал ээж
маань хөдөөнөөс ирсэн. Тэр хэдтэйгээ уулзалдаад сайхан л байлаа. Дуучин болох удмын
үүргийг оноосон хүн бол миний аав. Тийм болохоор би дуулж явах үүрэгтэй хүн. Анхны­хаа
ярилцлагыг өгч байхдаа аав минь намайг орхиж явсан ч авьяасыг нь өвлөж авсандаа
баярлаж явдаг гэж хэлж байлаа. Одоо ч түүнийгээ л хэлнэ.

Ш.Чимэдцэеэ эгчийн хувьд би багадаа
түүний бүх дууг нь цээжээр мэддэг байлаа. Ямар царайлаг, яасан ч гоё эгч вэ гэж
бодож, жинхэнэ шүтэн бишрэгч нь байлаа шүү дээ. Харин сүүлд нь аавын маань эхнэр
болсон. Би анхнаасаа аавтайгаа өсөөгүй хүн. Ээжийн минь дараа аав өөр амьдралтай
байсан гэдгийг хүмүүс мэдэх байх. Дараа нь Ш.Чимэдцэеэ эгчтэй амьдрал холбосон.
Ш.Чимэдцэеэ эгчийн хувьд намайг мэддэг ч үгүй байсан биз. Тэд дөнгөж хоёр талаас
нийлж, ааваас маань гадна хоёр хүүхдэд нь анхаарлаа тавьж байхад нь гэнэт том болсон
охин гараад ирэхээр цочирдоо байлгүй дээ.

-Ямар ч аав нар бөх хүргэнд дур­тай.
Дээрээс нь танай аав уртын дууч бас бөхийн засуулч хүн. Кёкүшюүзантай гэр бүл болох
мэдээг хэр хүлээж авсан бол?

-Их сайхан хүлээж авсаан. Манай хүн
аавын хүндэлж, шүтэж явдаг бөх нь байсан.

Би ханийгаа Монголыг Чингэс хаан шиг
дэлхийд сануулж өгсөн хүн гэж боддог ш дээ. Аав маань ч манай хүнээр их бахархдаг.
“Буянтай учрал бэлэглэсэн өвөг дээдэстээ үргэлж залбирч байдаг болохоор удмыг нь
сайхан авч явах хэрэгтэй” гээд уулзахаараа л надад захидаг юм.

Аав минь их ухаантай хүн. Миний ээж
ч бас ухаантай мундаг эмэгтэй. Хамаг залуу насаа миний л төлөө зориулж, миний төлөө
амьдарсан хүн. Одоо охин нь энэ зэрэгт хүрч сайхан амь­дарч байгаад сэтгэл нь амарч
байгаа байх даа гэж боддог.

-Танай Элбэгбаяр хүү чинь хоёр
ой хүрэх гэж байгаа байх. Дахиад төрөх гэж байна гэсэн яриа сонстож байлаа. Бүл
нэмэх төлөвлөгөө юу байна?

-Миний амьдралын нэлээдийг нь хүмүүс
зохиочихдог юм ш дээ. Амны бэлгээс ашдын бэлгэ гэж л боддог юм. Хүүдээ дүү гаргаж
өгөлгүй яахав.

-Дуу дуулаад явдаг Баясгалан телевиз
удирдаж, янз бүрийн бизнес эрхлээд яваа харагдах юм. Бизнес хийх дуу дуулахаас хэр
ялгаатай юм бэ?

-Тун өндөр хариуцлага шаард­даг юм
байна. Алдах эрхгүй л ажил юм даа.

Телевиз бол урлаг. Би өөрөө урлагийн
хүн. Тиймээс надад теле­виз ойрхон санагддаг. Чадал­тай хамт олонтой учраас түүртэх
юм алга аа. Монголд олон телевиз байгаа ч соён гэгээ­рүүлсэн телевиз байдаггүй байв.
Байгуулагдаад жил гаруй болж байгаа ч манай “Эх орон” телевизийг мэдэхгүй хүнгүй
болсон учраас бид баяртай байдаг юм. Гэхдээ судалгааны ажлаас эхлээд анхаарах зүйл
их байдаг юм байна. Телевизийнхээ техник технологийн хувьд ч гэсэн нэлээд шинэчлэлийг
хийж байгаа.

Мөн “Баясгалантай дэлхий” гээд жирэмсэн
эхчүүдийг амраах төв байгуулж ажиллуулж байгаа. Йогийн дасгал, жирэмсэн эхчүү­дийг
ямар нэгэн эм уулгахгүй, стресст оруулах­гүйгээр амар­ тайван байлгаж бай­гаад төрүүлэх
зорилготой сайхан газар бий. Ер нь олон хүнийг удир­даад аваад явна гэдэг амаргүй
ч бас сайхан ажил юм. Би аль болох залуучуудыг дэмжиж ажилд авахыг боддог. Бас ахмадуудаар
хүрээ­лүүлэх дуртай. Тэднийхээ туршлагыг залуу­чууд­даа хүргэх гүүр болно гэж боддог
юм.  Дуулдаг байхдаа зөвхөн өөрийн­хөө ажлыг
зохицуулаад гүйдэг байсан бол одоо зуугаар тоологдох хүмүүсийг ажлын байр­тай болгож,
том баг удирдаж ажиллах үүрэгтэй болсон.

-Танай өрөөгөөр жүжигчин Б.Нэргүй­­баатар,
шог зохиолч Л.Одончимэд гээд аваргууд их хөлхөж байна шүү?

-Манай хэд чинь ажлаа хийнэ бас хажуугаар
нь надад эрхэлнэ ээ эрхэлнэ.

-Анзаараад байхад Кёкүшюү­зан та
хоёрын зан араншин их төстэй бололтой?

-Ер нь төстэй шүү. Манай хүн урлагт
хайртай, хөгжилтэй, нийтэч хүн. Бас л багаасаа амьдралын төлөө зүтгэсэн, тэвчээртэй.
Энэ мэт адилхан талууд бий.

-Амьдрал юм хойно зөрөл­дөх үе
байдаг л биз дээ?

-Бид ямар сэтгэлийн хөөр­лөөр суучихсан
жаахан хүүхдүүд биш. Байгаа амьдралаа бүр илүү сай­хан авч явахын төлөө л явж байгаа.
Нөгөө талаас Монго­лынхоо нүүр царай болсон гэр бүлүүдийн нэгийн хувьд өндөр хариуцлага
үүрч амьдарна шүү дээ.

Ер нь амьдралаа сайхан авч явах эсэх
нь эмэгтэй хүнээс шалт­гаалдаг шиг санагддаг. Аливаа асуудал гарахад 99 хувиар би
буулт хийдэг.

-Яагаад?

-Манай хүн угаасаа асуудалд зөв ханддаг.
Би бүрэн итгэдэг болохоор тэр шүү дээ. Тэгээд ч хэлэх юм байвал сүүлд нь хэлчих
арга бий, бий. (инээв)

-Таныг хадам ээжтэйгээ тун адилхан
гэж ярих хүмүүстэй олон тааралдсан?

-Хүн болгон тэгдэг юм шүү. Хадам ээж
маань их бурханлиг, залуу сэтгэлгээтэй, ойлголцоход их амар хүн. Хүүгийнхээ төлөө
16 жил залбирч суусан хүн шүү дээ. Хүүгээ гэмтэл бэртэлгүй барил­даасай гэж сэтгэлээ
чилээж амь­дарч ирсэн эх хүн. Би хадам ээжтэйгээ, харин манай хүн миний ээжтэй адилхан
ш дээ. Хоёр ээж маань хоёулаа Жав­зандулам нэртэй. Овог нь адил­­хан Ж гэж байгаа.
Бид хоёу­лаа л Жавзандулам нэртэй ногоон дарь эхийн хүүхдүүд болох хувь тавилантай
хүмүүс байжээ гэж би боддог юм. Бас бид хоёр адилхан өвөө, эмээ дээрээ өссөн.

-Өвөө, эмээгийн хүүхдүүд цаанаа
л өөриймсүү байдаг шүү?

-Тийм ээ. Манай хүн багадаа Авиа,
Адиа хоёр дээрээ өссөн юм билээ. Би бол угаасаа буурал эмээ, өвөөгийн хүүхэд хойно.
Буурал аав маань сумо их үздэг байлаа. Кёкшюүг хараад “Тэр уул овоо шиг Хавай арлын
бөхийг хаячихдаг. Сайхан хүү шүү” гэж ирээд шимтэн үздэг байсан сан. Өвөө маань
сумын заан, бас их сайхан дуулдаг хүн байлаа. Ханиа хараад байхад тэр чигээ­рээ
буурал аав маань. Унтаж байгаа нь хүртэл адилхан хараг­даж, илүү ихээр хайр хүрдэг
гээч. Миний буурал аавыг архи ууж, тамхи татаж байхыг нь энэ ертөнц дээр хэн ч харж
байгаагүй. Хүн битгий хэл бурхан ч хараагүй. Тун гэр бүлсэг, гэр амьтай хүн байсан.
Тийм хүний дэргэд өссөн боло­хоор би буурал аав шигээ л хүнтэй сууна гэж боддог
байлаа. Харин буурал аавыгаа бурхан болсноос хойш нэг их удалгүй ханьтайгаа танилц­сан
юм. Тэгээд ч тэр үү, буурал аав маань надад ханийг минь илгээсэн байх гэж боддог
доо.

-Батбаяр гишүүн та хоёрыг хааяа
гэр барьж зусдаг гэсэн яриа сонссон юм байна…

-Батбаяр бид хоёрын зундаа орж суудаг
тэр гэр учиртай гэр л дээ. Ханийн маань өвөө, эмээ болох Авиа, Адиа хоёр маань гучаад
онд дөрвөн ханатай энэ гэрийг барьж айл болж байсан байгаа юм. Тэд яг бидэн шиг
тахиа, үхэр жилтэй хүмүүс байсан гэдэг. Тэгээд олон жил хамтдаа сайхан амьдарч,
өнөр өтгөн айл болсон болохоор нь бэлгэшээдэг юм. Анх гэр бүл болохдоо бид зориуд
энэ гэрт орж, гурван сар амьдарсан гээч. Одоо ч өнөө маргаашгүй гэрээ барьж орох
гээд л байж байна. Аавынх нь өссөн гэр болохоор би хүүгээ ч тэнд байлгах их дуртай
байдаг юм.

-Танай хүн Монголын сумо­гийн холбооны
ерөнхийлөгч байх аа. Бас тэнд байгаа монгол сумоч­­дынхоо албан бус хол­бооны дарга
шиг харагдах юм?

-Монгол сумочид Японд асуу­далд ороход
манай хүн эндээс аав нь юм шиг л явна шүү дээ.

Сумогийн дүрэм нь өөрөө хатуу. Тусгай
дэг жаягтай, бараг л улс доторх улс шиг юм билээ. Хэдэн зуун жил явж ирсэн тэр дүрэм
журмаараа хэний ч нөлөөгүйгээр асуудлаа шийддэг.

-Танай хүн болон их аварга Д.Дагвадорж
хоёр таарамж муутай гэгддэг. Түүнийг зодог тайлах болсныг хэрхэн хүлээж авч байсан
бол?

-Эр хүмүүс дэвжээн дээр ба­рил­­дахдаа
омогтой шартай байдаг. Монголчууд чинь их шартай хүмүүс ш дээ. Тэр утгаар нь хүмүүс
таарамж муутай гэж харж байсан байж болох юм. Түүнээс надад тийм байдлаа илэрхийлж,
хэлж байсан нь үгүй ээ. Тэгж яривал Дагваа аварга чинь аавын минь нутгийн бөх. Би
гэр бүлийнх нь хүнтэй найзууд. Заримдаа сургаар асууд­лыг хурцатгахад хүмүүс үнэн
гэж хараад байдаг тал байх юм аа.

-Саяхан их аварга Дагвадорж улс
төрд орох бодолтой гэсэн байна лээ. Танай хүн Японоос ирээд УИХ-д сонгогдсон. Ер
нь бөхчүүд ингээд төр түшээд байх нь хэр зөв юм бол?

-Заавал бөх энэ тэрдээ биш улс эх
орондоо нөлөөтэй, зөв сайхан сэтгэлтэй хүн л гарах ёстой гэж би боддог. Бас гадаадад
ч дотооддоо ч нөлөөтэй байвал сайн байх. Би хувьдаа сонгинохайрханчуудыг их зөв
сонголт хийсэн гэж үздэг. Итгэлийг нь ч манай хүн сайн дааж яваа. УИХ-ын гишүүний
зарцуулах төсвөөс 16 дахин давуулсан хөрөнгө оруулалтыг тойрогтоо хийсэн хүн шүү
дээ. Тиймдээ ч АН-аас хамгийн их хөрөнгө оруулалт хийсэн гишүүнээр саяхан тод­руулсан
болов уу. Бага байхаасаа л амласандаа хүрдэг байсан гэгд­дэг тэр чанар нь одоо ч
байдаг. Цаашид ч тийм байх хүн.

Сонгогчдынхоо хүсэлт шаард­лагад тун
анхааралтай ханддаг. Юу л байна тойрог руугаа гээд байна шүү дээ. Тэгэх ч ёстой
байх.

-Олон сайхан бөхчүүд маань Японы
иргэн болж, харийн бүс­гүйтэй гэрлэж байгаа нь харагд­даг. Монголд нь авчирч, сонгогч
олны үүрэгт даруулж амьдрах замыг сонгуулсан танд баяр хүргэх ёстой юм шиг санагддаг
шүү?

-Баярлалаа. Бас ч тийм тал бий шүү.
(Инээв)

Илэн далангүй ярилцсанд баярлалаа.

-Баярлалаа. Энэ дашрамд зуны дэлгэр
сайхан цагийн мэндийг “Өдрийн сонин”-ы уншигчдадаа хүргэмээр байгааг минь дамжуулж
өгөөрэй.

Ярилцсан Э.ЭНЭРЭЛ

ЭДИЙН ЗАСГИЙН ТУСГААР ТОГТНОЛ
БИДЭНД АЛГА БАЙНА

УИХ-ын гишүүн, Зам тээвэр, барилга хот байгуулалтын сайд Х.Баттулгатай ойрын үеийн улс төр, эдийн
засаг, гадаад харилцаа­ны асуудлаар ярилц­саныг дор толилуулъя. 

-Та Ерөнхийлөгчийн ОХУ-д хийсэн
айлчла­лын багт оролцсон. Ма­найхан ОХУ-тай бензин шатахууны хомсдлыг шийдэх тал
дээр  тодор­хой шийдэлд хүрч  ча­дав уу?

-Шатахууны хомс­долд орсон нөхцөл
бай­дал нэг зүйлийг тод ха­рууллаа. 1990 онд тус­гаар тогтнолоо баталгаа­жуул­сан  гээд байсан маань дутуу байжээ. Эдийн засгийн
тусгаар тогтнол алга байна. Эдийн засаг, бизнесийн цус, тэжээл болсон ди­зель түлш,
бензин шата­хуунаараа нэг улсаас 100 хувь хараат байна гэдэг тусгаар тогтнолыг шууд
хэврэгшүүлж байгаа хүчин зүйл.   Шууд л ажил,
амьдралд нь нөлөөлж байгаа биз дээ. Яахав гал унтраах маягаар жаал шатахуун авахаар
то­хир­сон байх. Гээд энэ бол асуудлыг нэг мөр шийд­чихэж байгаа хэрэг биш.

-“Орос ах”-аас ха­маа­ралтай хэвээрээ
л байна гэж үү?

-Энэ бол тэднээс гэ­хээ­сээ илүүтэй
биднээс, өөрсдөөс маань хамаарч байгаа зүйл л дээ. Бид өөрсдөө шатахууны ха­маар­лаас гарах, энэ сал­барт Оросын
ноёрхлоос ангижрах талаар юу ч хийгээгүй
байгаатай л холбоотой. Айлчлалаар очоод их л том, том юм ярих гэдэг. Ярьж байгаа
юм нь “80 мянган тонн дизель түлш
өгөөч”.

Орос орны хувьд бидний яриад байгаа
хэмжээ бол зүгээр л дусал. Дусагнах төдий зүйлийг ажил хариуцсан хүн нь очоод шийдэж
ча­дахгүй. Заавал төрийн өндөр хэмжээний айлч­ла­лын үеэр ийм зүйл ярихад хүргэнэ
гэдэг бид­ний ямар арчаагүй бай­гааг, ямар жи­жигхэн бай­гааг л илтгэсэн хэрэг.
Бид ямар ч стратеги төлөв­лөгөөгүй, бэлтгэлгүй, өнөө л бэлэнчлэх, амарч­лах, назгай
байдлаараа өдий хүрснийхээ шанг хүртлээ. 

-Шатахууны хамаарлаас га­рах гарцыг нь юу гэж бодож байна?

-Бодох, шийдэх, хийх л хэрэг­тэй.
Сингапур жишээ нь, Малайз, Индонез гэдэг хоёр улсаас цэвэр усны маш их хамааралтай
байсан.  Гэтэл бодлого боловсруулж, эрж хайж,
судалж, туршиж байгаад асуудлаа бүрэн шийдсэн. Цэвэр усны хамаарлаас гаргах шийдлийг
хийсэн хүндээ бараг л баатар цол өгөх шахуу юм болсон. Ердөө л цэвэр усыг их хэмжээгээр
гаргаж авах технологийг гаргасан. Нуу­цаар, тэгээд л толгойны өвч­нөөсөө цэвэрхэн
ангижирч.

Ма­найх­тай адил Киргиз гэж улс бай­на.
Оро­соос шатахууны бүрэн хамаа­ралтай. Оросууд шатахуун өгөхөө болиход л тэнд үнийн
хөөрөгдөл бий болоод,  тэр нь хувьсгалд хөтөлсөн,
саяхан шүү дээ.

-Янз бүрийн боломжууд зөн­дөө байгаа биз дээ. Яагаад боломж
бололцоог эрж хайх­гүй, ашиглахгүй өдий хүрсэн юм бол?

-Боломж хангалттай байгаа. Хувийн
хэвшлийнхэн бол энэ асуудлаар зөндөө бодож, ярьдаг байсан.  Үе, үеийн Засгийн газрууд мөрөөддөг байсан л сэдэв.
Яри­хаас хэтэрдэггүй зуршлаа өөрч­лөөд, бодитой ажил хийж эхлэх болсны дохио. “Өртөг
өндөр” гэдэг ганц шалтгаар өдий хүртэл гацаа­сан. Үнэ өртгөөс илүү аюулгүй байдал,
найдвартай хангалт гэж чухал юм байдгийг саяын явдал сайн ойлгуулсан байх.

-Ерөнхийлөгчийн айлчлалын үр дүн ямархуу болов?

-За даа, ер нь нэг “иймэрхүү” л үр
дүнтэй боллоо ш дээ. Миний бодлоор бол ОХУ, Монгол хоёр улс цоо шинэ шатанд, шинэ
хэл­бэрээр ажиллах боломжтой юм болов уу гэсэн бодолтой ирсэн. Шатахууны тухай бол
дээр ярь­чихлаа.

-“Иймэрхүү” гэдэг нь юу гэ­сэн утга вэ?

-“Эдийн засгийн тусгаар тогт­нол байхгүй”
гэдгийг ойлгуулсан, “ярьдаг сэдэв маань жижигхэн,  боддог хийдэг маань бүр жижигхэн” гэдгийг л ойлгуулсан
гэхүү дээ. Хүлээж авч байгаа тал бидний ярьж, боддог тэр хэмжээнд тохи­руулж харьцана
ш дээ. Айлчлалын бэлтгэл ажлыг хангаж байгаа хү­мүүс, Гадаад яамны ажиллаж байгаа
царай ч бас нэг тиймэрхүү. Жишээ нь Улаанбаатар төмөр зам нийгэмлэгийн асуудал байна.
Бид нарт л том санагдавч, нарийндаа тийм том асуудал биш ш дээ. “Бид 51 хувиа эзэмшмээр
байна, 1949 оны гэрээ маань ерөнхийдөө хуу­чирчихлаа, зах зээлийнх нь шаард­лагад
нийцүүлье” гэсэн юм л яри­лаа. Илүү гарч, холыг харсан юм ярьсангүй дээ.

-Бид яаж том сэтгэх, харил­цах ёстой вэ?

-“Өөрсдийнхөө бодит нөхцөл байдал,
давуу талаа яаж зуун хувь ашиглах вэ” гэдэгтээ санаа тавьж, зөв гаргаж тавих л асуудал
юм.  Аль тавиад онд манай улс үнэхээр дорой,
хүнд байдалтай байхдаа төмөр замтай болж, тэр нь хөгжлийг чирч ирсэн. Тэр үедээ
бол том бодлого, том шийдэл байсан. Гэтэл одоо тэрнээсээ хэтрэхгүй юм яриад байлгүй,
хөгжлийн шинэ түвшний бодлого, амбицаа тод илэрхийлэх хэрэгтэй. Одоо бид оросуудтай
харьцахдаа 1990-ээд оны өмнөх шигээ харилцаад, тэр үеийнх ши­гээ санаад байгаа.  “Брат” гээд л. . .  Ах байхаа боль­чихсоныг мэд­рэхгүй, ах гэж харь­цаад
л … Гэтэл өнөөх нь үнэ өртөг, ашиг сонирхлоо яриад, цэвэр наймааны харьцаа гаргаж
байгаа шүү дээ. Цаг өөр болсон. Харил­цаа ч өөрчлөгдөх ёстой.

-Шинэ бүтээн байгуулалт хөтөлбөр, Шинэ төмөр зам, Зуун
мянган айлын орон сууц, Сумдын автозамын сүлжээ, Хурдны зам төс­лүүд ямар шатандаа
яваа талаар ярих уу?

-2008 оны сонгуулиар хоёр нам Оюу
толгой, Таван толгойг эдийн засгийн эргэлтэд оруул­на гэж амласан. Уул уурхайгаа
хөдөл­гөөнд оруулж 2.7 сая иргэд­дээ хувь, хишиг өгөхөөр ярьсан. Хам­тарсан засаг
байгуулсан гол утга учир энд л байсан. Уг нь энэ хоёр ордын ашиглалтыг зэрэг эхлүүлэх
ёстой байсан. Харам­салтай нь Оюу толгойг түрүүлээд явуулчихлаа. Тавантолгойн ор­дын
ашиглалт хоцорч яригдах болсон нь шулуу­хан хэ­лэхэд Ухаа худагтай хол­боотой л
доо.

Ухаа
худагийг том Тавантолгойн ор­доос өрсөж эхлүү­лэх сонир­холт­нууд лобби, нөлөө ихтэй
байж чад­сан. Тэгээд л том Тавантолгойн төсөл хоцор­чих­сон. Ингэхгүй бол Ухаа худагийн
хувьцаа үнэд орохгүй байсан шиг байгаа юм.

Уг нь том Таван­тол­гойн уурхай эхэлж,
Оюу­толгой­тойгоо цуг хөдөл­гөөнд орсон бол нэгэн зэрэг ахиухан ор­лого орж ирнэ
ээ дээ. Бөөн орж ирэх мөнгөөр нь дэд бүтцээ хөгжүүлэх, орон сууц­жуулах, төмөр зам,
сумдын авто­замын сүлжээ гээд тулгамдсан асууд­луудыг ший­дье, бодитой ажил болгоё
гэсэн санаагаар дээрх төслүүдийг өнгөр­сөн жил УИХ-аар оруулж батал­сан юм.
1950, 1960-аад оны үед оро­суудын хийсэн бодлоготой дүйцэхүйц бодлогыг 2008 сонгуу­лиар  байгуу­лагдсан УИХ  баталсан ухаантай юм л даа, уг нь.

-Тэгээд бүтээн байгуулалтын том төслүүдийн явц ямар бай­на?

-Том ч гэж дээ. Бид нар л ажил хийж
үзээгүй болохоороо том гэж яриад байгаа болохоос хийдэг, бүтээдэг улсуудын хувьд
бол жижиг­хэн төслүүд ш дээ. Дэлхийн II дайнд ялагдсан Герман улс халагдсан цэргүүдээ  орон сууц, авто зам гээд дэд бүтцийн бүтээн байгуулалтад
шууд оруулж байж. Дөрөв, таван жил байлдаж, дог­шир­сон хүмүүсийг зү­гээр суулгаж
болохгүй ш дээ. Оросууд ч бас дайнд явсан цэргүүдээрээ сүйрсэн Сталинградыг босгуулж,
Сибирийн төмөр замыг тавиулжээ. Одоо Монгол Улс ийм олон ажилгүй хүмүүсийнхээ хүчийг
бүтээн бай­гуулалтанд чиглүүлчихэд л болох биш үү. Төслүүд ямартай ч тооцоо судалгаа
нь хийгдээд, ТЭЗҮ-үүд нь гараад явж байна.

-Төмөр замын талаар төрөөс баримтлах бодлого гэж гар­сан.
Өмнөх бодлогоос юугаа­раа ялгаатай юм бэ?

-Өмнө нь Төмөр замын талаарх төрийн
бодлого гэж байгаагүй юм. 2007 онд л Төмөр замын хууль шинээр батлагдсан. Төмөр
замын бодлого гэж яагаад гаргасан гэхээр стратегийн ордууд төвлөрсөн говийн бүсийн
төмөр зам зөвхөн Хятад руу чиглэсэн, түүхий эд зөөх барим­жаатай байх юм бол хараат
болох аюул нүүрлэсэн. Хөрш орон­той харилцааны хүндрэл гарлаа гэхэд саяын дизель
түлшний хомс­дол шиг л болгохгүйн үүднээс альтер­натив хувилбар дэвшүүлсэн хэрэг.
Үүнийг маань ард түмэн дэмжсэн, УИХ баталсан. Шинэ төмөр зам баригдаад, үйл ажил­лагаа
нь жигдрэхээр амьдрал ахуйд нь нөлөөлөөд монголчууд илүү сайн ойлгох байх аа.

-Төмөр замын шинэ шугамын санхүүжилтийн эх үүсвэр тодорхойгүй
байхад ажлаа эхэлчихсэн явах юм?

-Тодорхойгүй гэдэг ташаа мэ­дээ­лэл.
Таван толгойн тендерт оролцож байгаа олон улсын 
то­моо­хон компаниуд шинэ төмөр замд хөрөнгө оруулахаа эхэлж амласан. Ерөнхийдөө
ТЭЗҮ нь 2009 оноос урьдчилсан байдлаар гарчихсан. ТЭЗҮ-ийн дагуу эхний хоёр, гурван
сардаа санхүүжилтээ гаргачих Монголын туршлагатай, чадвартай компаниудыг ажилд нь
оруулаад бүтээн байгуулалтыг эхлүүлчихсэн. Цаг хугацаатай уралдах хэрэгцээ байна.
Нөгөө талаар олон улсын тендер зар­лахаар бас л “гадны компаниуд хамаг ажлыг авна”
гэсэн бол­гоомж­лол бас байгаа л даа.

ҮНДЭСНИЙ ЭРХ
АШИГ ГЭЖ БАЙМААР САНАГДДАГ

-Таван толгойн төслийн ол­борлогчийг тодруулах ажлын хэсэгт
та орсон байхаа. Ямар шалгуур үзүүлэлтийг голлож байгаа вэ?

-Таван толгойн тендер дээр гол нь
Монгол Улсад илүү өгөөжтэй байх компани орох, шинэ төмөр зам, Сайншандын аж үйлдвэрийн
цогцолборт илүүтэй анхаарч, хө­рөнгө оруулах сонирхол зэрэг нөхцөлүүдийг түлхүү
харна.   

-Монгол нефть ол­борлогч орон, гэтэл шатахууны үйлд­вэр
өдий болтол баригдаагүй. Учир нь юунд байдаг юм бол?

-Бодлого байхгүй байна. Уг нь хоёр,
гурван ч компани ТЭЗҮ-ээ хийчихсэн, хөрөнгө оруулалт бэлэн байхад чиглэлийнх нь
яам  зөв­шөөрөл өгөхгүй байгаа. Аль 1947 онд
Чойбалсан Зүүн­баянд биеэ­рээ очиж, нефть бо­ловсруулах үйлдвэр бариулсан байх юм.
Одоо Зүүнбаянгийн нефтийг Хятад руу түүхийгээр нь зөөсөөр л байгаа. Там­сагбу­лагийн
нефтийг бас л хятадууд шууд цааш нь зөөж бай­гаа. Тэр нефтийг манайхан бага гээд
голонгуй ярьж, боловсруу­лахаас татгалзаад байгаа. Хятад 1.4 тэр­бум хүнтэй байж
бага гэж гололгүй зөөж байхад 2.7 сая хүнтэй Мон­голын удирдагчид “ба­га” гээд голоод
суугааг ойлгоход бэрх. Үндэсний эрх ашиг гэж бай­маар  санагддаг.

-Ярианыхаа сэдвийг өөр­чилье. Жүдогийн холбооны ерөнхийлөгч
нь та. Жүдогийн холбоо 21 дэд ерөнхий­лөгч­тэй байдаг нь ямар учиртай юм бэ?

-Би тамирчин байсан. Социа­лизмын
үед олимпийн аваргатай болчих гээд хэд хэдэн удаа дөхөөд чадаагүй. 2006 онд би Жүдо
бө­хийн холбооны Ерөнхийлөгчөөр сонгогдоод, багш нартайгаа, та­мир­чидтайгаа зөвлөлдсөн.
Тэгээд 2008 онд олимпийн аварга тө­рүүлнэ гэж зорилго тавьсан. 2006 онд Түвшинбаяр
бас шигшээ багт орсон. Түүнийг би Женко клубтээ авсан. 2008 оныг онцолсон нь хоёр
шалтгаантай. Нэгд, Бээжингийн тэнгэрт Монголын далбааг ман­дуулж, тусгаар улсаа
илүү тод тунхаглах. Нөгөө нь Монголд ийм ойрхон олимп мөд болохгүй гэж бодсоных.
1988 онд Сөүлийн олимп бидэнд хамгийн ойрхон нь болсон. Олимпийн наадам Европ, Америкт
голдуу болдог. Тамирчин хүнд зовлон их. Цаг агаар, хоол унд, цагийн зөрүү гээд.
Бээжин ойр, цагийн зөрүүгүй, хөгжөөн дэмжиг­чид олон очих зэрэг нь боломж болж харагдсан
л даа. Тэр 21 дэд ерөнхийлөгч гэдгийн хувьд аймаг бүрт бөх сонирхож байсан, барил­даж
байсан хүнээр дэд ерөнхий­лөгч тавиад “Чи энэ орон нутгаасаа сайн бөх төрүүл” гээд
даалгачихаж байгаа юм.  Дэд ерөнхийлөгч нар  хариуцсан нутгийнхаа тамирчдын хоол, унааны  зардлыг даадаг. Сайн бөх явж явж хөдөөнөөс л их
төрдөг шүү дээ.

-Та Жүдогийн холбоондоо хувиасаа нэлээд зардал гар­гадаг
шинжтэй юм аа?

-Тэгэхээс яахав. Өнгөрсөн олим­пийн
өмнө гэхэд л нэг жилд дунджаар хоёр тэрбум орчим төг­рөг гаргаж байсан. Одоо бол
жил­дээ тэрбум гаруй төгрөг гаргаж байна.

-Та бөхчүүдтэй бэлтгэл хий­нэ биз?

-Аа, жаахан бэлтгэл энэ тэр хийнэ
ээ, хийнэ. Бөхчүүдээ ойроос харах, ойлгоход тустай байдаг юм.

-Ингэхэд та Улаанбаатар хо­тод төрсөн үү?

-Тийм. Яасан, би тийм хөдөө царайтай
харагдаад байна уу?

-Үгүй таны аав, ээж Баян­хонгорынх гэхээр л . . .

– Аав, ээж хоёр маань хотод орж ирээд
комбинатад амьдарч байхад нь би төрсөн юм билээ. Дараа нь 1966 оны их үерээр манайх
Яармаг руу нүүсэн юм. 

-Цонжин болдог дахь Чин­гэсийн хөшөөт цогцолборыг яагаад
байгуулсан юм бэ?

-“Ардын хувьсгалын 30 жилийн ойг яаж
тэмдэглэв” гэсэн чинь урд уулын ард соёмбо тэмдэг нэг үлд­лээ, уудаг цайны аяганы
бөөрөнд нэг үзэгдлээ, улаан тамхины хайр­цаг дээр бас нэг харагдах шив гээд дууссан
гэдэг шиг Их Монгол Улсын 800 жилийн ой гээд бөх барилдаж, сум харваад, морь уралдуулж,
хуур тоглоод л өнгөрөөчихгүй юмсан гээд. Нэгдмэл улс, төрт ёсныхоо 800 жилийн ойг
тэмдэг­лэчих улс дэлхий дээр цөөхөн байдаг. Их ойд зориулсан үлдэц­тэй зүйл хийе
гэж Дүрслэх урла­гийн сургуулийн хэ­дэн найзтай­гаа яриад л хийсэн юм.  Энэ ойн жилд төрсөн 45000 хүүх­дэд үнэгүй хувьцаа
тараасан бай­гаа, энэ чинь бас л ховор тохиолдол шүү дээ.

-“Түмэн хишигтэн” гэж бас баахан
хөшөө барих гэж байгаа гэсэн?

– Чингэс хааны ялалтын нууц нь “Түмэн
хишигтэн” гэх шилдэг цэр­гүүдэд нь байсан гээд бүгд мэднэ ш дээ. Тэрийг хөшөөнд
мөнхөлье л гэсэн санаа.

-Өөрийнхөө дүрийг арван мян­ган цэргийн хөшөөнд мөнх­лөх
сонирхолтой хүн хэр их байх юм ?

-Дөнгөж эхэлж байгаа төсөл. Одоогоор
200-гаад хүн захиал­гаа өгөөд байна гэсэн. Гадныхан их хандах юм. Интернэтээр захиалгаа
өгч байна.

-Манай улстөрчдөөс сана­лаа ирүүлсэн үү?

-Улстөрчид, бизнесмэнүү­дээс их цөөхөн
хүн оролцож байгаа.

-Яагаад?

-Мэдэхгүй, та нар л сайн мэдэх байх.

-Цонжин болдогт бас нэг со­нирхолтой бүтээл тавигд­жээ.
Дэлхий дээрх хамгийн том гутал. Тэрийг таны охин бүтээсэн гэлүү?

-Тийм. Охин дизайны ангид сурдаг.
Ээж нь үндэсний хувцас  оёдог. Багаасаа бүтээх,
хийх зүйлд ойр байсан болохоор тэр юм уу санаа гаргаад л хийсэн. Сингапур явахад
нь би бэлэг дурсгалын зүйл гээд нэг жижиг монгол гутал өгч явуулсан юм. “Тэрийг
томоор хийе” гээд л зургаан найзтайгаа  нийлж,  дипломын ажлаа болгосон юм. Хүүхдүүд маань их
бие даасан улс. Мэдээж би санхүүгийнх нь асууд­лыг шийдэж өгсөн л дөө.

–Гиннесийн номд орж бай­гаа гэж сонссон?

-Өргөдөл гаргаад, шаардаг­дах материалыг
нь бүрдүүлээд явж байгаа гэсэн. Номд арай ороогүй байгаа. 

“ЖЕНКО”-Г
БИ ЯНЗ
БҮРЭЭР Л ТАЙЛБАРЛАЖ ХЭЛДЭГ ЮМ

-Таныг “Женко” гэж дуудахыг нэлээд сонссон юм байна. “За­галмайлсан
эцэг” киног үзээд компанийнхаа нэрийг өгсөн гэдэг үнэн үү?   

-“Женко” гэж нэрийг би их олон тайлбарласан
даа. Асуух бүрт нь янз бүрээр л тайлбарлаж хэлдэг юм. “женский кофт”, “женерал компани”
гэж ч байлаа. Бүр нохой­ны нэр гэж хүртэл хэлчихдэг юм.  Үнэндээ бол наяад оны сүүлээр Москвад “Загал­майлсан
эцэг” киног үзээд санаа авсан талтай. Гэхдээ энийгээ хүмүүст огт хэлддэггүй ш дээ.

-Өө тийм үү, Баабар 
бич­чихсэн байсан ш дээ. ..

– Тийм үү, юу гэж байх юм ?

-“Загалмайлсан эцэг” кинонд гардаг Женко олив ойл ком­пани
гээд . . .

– Аан. . .

-Та МоАХ болон МоАХ фрак­цийн тэргүүн. Нам доторх фракц
болсноо албан ёсоор зарласан. Танайх хэр хүчтэй фракц юм бэ дээ?

-МоАХ бол Монголын ардчил­сан хувьсгалын
эцэг байгууллага. Хорь гаруй жил нийгмийн өмнө хүлээсэн үүргээ биелүүлсээр ирсэн
хүчирхэг байгууллага. МоАХ улс төрийн идэвх­тэй үйл ажилла­гаа явуулсаар байгаа.
Телевиз, өдөр тутмын сонинтой. Маш идэвх­тэй гишүүдтэй. Ардчилсан намын ҮЗХ-д нэлээд
олон гишүүнтэй том фракц шүү. Намын бодлогыг то­дор­хойлох, үйл ажиллагааг хэрэг­жүүлэхэд
идэвхтэй, нөлөөтэй оролц­дог тийм л фракц.

-Танай нам олон фракц, бү­лэглэлтэй. МоАХ фракц тэ­дэн
дундаа хэр том бэ?

-“Том” гэдгийг гишүүдийн тоо­гоор
биш намын бодлого, шийд­вэрт нө­лөөл­­өх чадамжаар хэмжвэл том шүү.

-“Алтан гадас”-аас хүчтэй байж чадах уу?

-Мэдэхгүй юм. Чи заавал тэгж, харьцуулж,
уралдуулмаар байна уу?, Яахав цаг хугацаа харуулах л байлгүй.

-Сонгуулийн хууль дээр та ямар байр суурьтай байна?

-Мажоритар тогтолцоо нь өргөн уудам
нутагтай, сийрэг суурь­шилтай улсад тохиромжтой гэсэн бодол бий. Намын олонхи юу
гэж үзэж байгааг бас харъя гэж бодож байна.

-Таныг олон сайхан машинтай гэх юм билээ. Сайхан унаа таны
хобби юу?

-Хобби байсан юм. Одоо бол тийм юм
байхгүй ээ.

-Хэдэн машинтай вэ?

-Мэдэхгүй ээ, хүүхдүүдийн нэр дээр
л голдуу байгаа  байх.

-Машиныхаа тоог хэлэхгүй юм уу?

-4, 5 гайгүй машин бий. Гадны зочид
ирэхэд нүүр улайхгүй байх хэдэн машин бий.

-Таны анхны машин ямар маркийнх  байв?

-600 долларын үнэтэй Лада машин.

-Бизнес хийгээд л авсан уу?

-Бизнес ч юу байхав дээ, тэр үед ганзаганд
яваад л авсан.

-Яг одоо ямар машин унаж байгаа вэ?

-Lexus

-Та өөрөө жолооддоггүй бай­хаа. Жолоочтой яваа ха­рагд­даг.

-Тийм, ойрхон газар бол алх­чих­даг.
Тэр нь амар ш дээ.

-Алхаж явахад тань хүмүүс таньж байна уу?

-Танихгүй л байна лээ.

-Та өдөр бүр бэлтгэл хийдэг уу?

-Өглөө босоод гүйнэ.

ХУРДНЫ
МОРЬ УНАЖ, ХАМГИЙН СҮҮЛД ОРЖ ИЧЭЭД….

-Таныг “Би хор биш хоол үйлд­вэрлэдэг” гэж ярьдаг гэсэн,
тийм үү?

-Үнэндээ бол спирт, архитай холбоотой
явсан үе бий. Олон жилийн өмнө “17 чингэлэг спирт” гээд л бөөн асуудал үүсч байсан.
Тэрнээс хойш манай­ханд энэ зо­хихгүй юм байна гэж ойлгоод холд­сон.

-Манайхан гэж хэн бэ?

-Манай
компа­нийнхан. Тэгээд л хүнсний үйлд­вэрлэл эрхэлсэн. Тэрийгээ л “хор биш хоол”
гэж ярьдаг ухааны юм.

-Бага
насны дурсамж, сэт­гэлдээ тод үлд­сэн сайхан үеийнхээ талаар манай уншиг­чидтай
хуваал­цаач…

-Миний
бага нас . . . Гэр хорооллын хүүхэд ямар байдаг тийм л байсан.

-Зодоонч
байсан уу?

-Үгүй үгүй. Айлын хүүхдүүдтэй бага
сага муудалцах үе гаралгүй яахав. Айхтар зодоонч бол байгаа­гүй. Дүүтэйгээ архины
шил цуг­луулж зардаг байлаа. Тэр үед архины шил үнэтэй байсан байхгүй юу. Гуравдугаар
ангид орох үеэс ээж, аав намайг хөдөө явуулчихдаг болсон. “Ажил сургана” гээд хөдөл­мөрийн
баатар Жанар гэж Баян­хонгор аймгийн Баян-Өндөр сумын малчин айл руу явуулна. Дол­дугаар
анги хүртлээ тэднийд зуны амралтаараа мал малладаг бай­сан.  Тэнд их ажил сурсаан.

-Хөдөө очоод хурдны морь унаж байв
уу?

-Баянхонгорын Баян-Өндөр сумын наадамд
нэг удаа унаад баян ходоод болсон.

 -Баян ходоод .
. .  Шагналаа авсан уу?

-Аваагүй ээ. Ичсэндээ бариа луу биш
өөр тийшээ явчихгүй юу (инээв)

-Дахиж хурдны морь унаагүй юу?

-Тийм.

-Удам судар, аав, ээжийнхээ тухай яриач..

-Аав, ээж Баянхонгорын гаралтай хүмүүс.
Аав минь бурхан болсон. Малчин байгаад цэрэгт явсан гэдгийн. Цэрэгт их л удаан алба
хаасан санагдаж байна. Ээж минь одоо Яармагтаа байдгийн. Саяхан нэг сонинд ярилцлага
өгсөн байна лээ. Аав, ээж хоёр минь өнчин хүмүүс. Удам судраа айхтар нарийн мэддэггүй
ш дээ.

-Эхээс хэдүүлээ вэ?

-Гурвуулаа. Эгч, дүүтэй.

-Таны бизнесийг авч яваа найдвартай дотны хүмүүс байгаа
юу?

-УИХ-д орохоос өмнө нь хамт ажиллаж
байсан хүмүүс минь байгаа. Дүү маань л голлож авч явна даа.

-Та өөрийгөө “улстөрч” бол­сон гэж үздэг үү?

-За даа, үгүй дээ. Тодорхой амжилт
гаргаагүй юм чинь.

-Одоо байгаа чинь амжилт биш үү. Ямар амжилт гар­гавал
өөрийгөө улстөрч гэх юм бэ?

-Хүмүүст хүлээн зөвшөө­рөгдө­хөөрөө
л “улс төрч болжээ” гэж бодно ш дээ.

-Хүмүүс таныг аль хэдийнээ хүлээн
зөвшөөрсөн биш үү?

-Мэдэхгүй ээ.

-Монголд хүлээн зөвшөө­рөгд­сөн улстөрчид хэн юм бэ, тэгвэл?

-Бат-Үүл, Элбэгээ хоёр  бол хүлээн зөвшөөрөгдсөн ш дээ.

-МАН-д тийм хүн байхгүй гэж үү?

-С.Баяр л байх даа, арай нэг том хардаг
нь. Н.Энхбаярыг олон жил том албан тушаалуудыг хаш­сан гайгүй юм байх гэж бодсон
чинь сая нэлээд бужигнууллаа. Арай биш ээ.

-Улс төрийн карьерын хувьд хаана хүрье гэж бодож бай­на?

-Хүрэх газраа хүрсэн гэж бодож байна.
Хариуцсан ажил явахгүй л байна ш дээ. Ажил явахгүй байна гэдэг чинь чадахгүй л гэсэн
үг биз дээ.

-100 хувь танаас шалтгаа­лаагүй байлгүй дээ. Таныг ээлжийн
амралтаа аваагүй удаж байгаа гэж сонссон. Энэ зун амрах уу?

-Тэр чухал асуудал биш байна аа.

-Чухал ш дээ. Ядаж л сайдын ажлын албаныхан чинь таныг
амрахгүй бол адилхан ажил­лаад  ядрах биш
үү?

-Өвөл амраанаа тэгвэл.

-Зун ажлаа хийх нь ээ?

-Манай ажил чинь зун л оволз­дог.
Тэр үед нь амраад сууж төвдөхгүй л байна. 

-Шатахуунаас болоод замын ажил бүгд зогсчихсон уу?

-Мэдээж, бага зэрэг зогсолт гарсан,
компаниуд алдагдалд орно шүү дээ. Бас л бидний л арчаа­гүйнх. Шатахуунаа өөрсдөө
үйлд­вэрлэхгүй бол хэзээ ч зогсож мэдэх эрсдэл байсаар л байх болно. Замын ажил
зогсох бол юу ч биш, энэ байтугай юм ч байж болно. Би түрүүнд Киргиз гэж хэлсэн.
Хийе бүтээе гэсэн сэтгэл л байх хэрэгтэй..

-Хүн бүрт л сэтгэл зүрх бай­гаа.

-Байгаа бол аль хэдийнээ шата­хууны
үйлдвэр баригдчихсан л байх байсан.

-Ирэх сонгуулиар Ардчилсан нам ялагдвал яах вэ?

-Ард түмэн мэднэ шүү дээ.

-Хамтарсан засаг 
гээд ингээд л хамтраад байх нь зөв үү?

-Том ажлуудаа хийнэ гэж бод­вол хамтрах
л ёстой. Чадахгүй бол хамтрах хэрэг юун. Ажил амжуулах гэж л нийлсэн ухаантай юм
ш дээ,  уг нь.

-Хамтарсан засаг наад зах нь  шатахууны хангалтыг ший­дэж чадахгүй л байна ш
дээ.

-Шийдчих байлгүй дээ. Дандаа л гадаадад
айхтар сургууль төгс­сөн, мэдлэг чадвар нь дэндчихсэн, боловсрол өндөрдсөн гэсэн
улсууд байгаад байдаг ш дээ.

-Боловсрол гэснээс та бо­ловсролынхоо талаар үнэ­нээр нь
зарласан нь сайн имиж болох шиг болсон?

-Хэн зарласан гэж?

-Хэн гэж юу гэсэн үг юм. Та л байхгүй юу. Танилцуулга дээрээ
бичсэн биз дээ?

-Тэгвэл бичсэн гэж хэл л дээ. Зарлах
гэдэг өөр утга. Хүн намтраа үнэнээр нь л бичих ёстой биз дээ.

-Тэр чинь зарлаж байгаа л хэрэг биз дээ?

-Тусгай дунд боловсрол гэж явдаг ш
дээ. (инээв) Үнэндээ дүрс­лэх урлагийн дунд сургууль чинь их өөр шүү. Би бол дотроо
дээд сургуулиас дутахгүй их зүйл тэнд сурсан гэж боддог. Зураач хүн юмыг олон талаас
нь харж, зөв үнэлж, бодитой шийдвэр гаргаж сурдаг. Багш нарын маань ач юм даа.

-Өмд оёдог хэвээрээ юу?

-Одоо тийм зав, гол нь хэрэгцээ байхгүй.
Өмд оёх амархан ш дээ.

УЛС
ТӨРИЙН ХУВЬД, ЭХЛЭЭД ХУУРТАГДАЖ ЯВСАН, ДАРАА НЬ ХУУРАХ АЖИЛД НЬ ОРОЛЦСООН ГЭДЭГ
ШИГ Л….

-Таны хобби юу юм бэ?

-Хобби гэж юм бараг байхгүй болчихлоо
доо, улс төрд орсноос хойш.

-Ер нь бол байсан уу. Машин тэрэг гээд л?

-Байлгүй яахав. Машин тэрэг бол ч
залуу насны л юм. Кино  үзэх дуртай.

-Жишээ нь ямар кино үзэх дуртай вэ?

-Драм энэ тэрд бол дуртай. “Цогт тайж”,
“Сэрэлт”  хэзээ ч хуучирдаггүй сайхан кинонууд. 

-Дэлхийд алдаршсан 
ямар кинонуудад дуртай вэ?

-Мартчихаж. 

-Та тийм ч нээлттэй хүн биш юмаа?

-Хөөрхий, хамаг байдгаараа нээлттэй
байна ш дээ. 

-Улс төрийн хор най­руу­лал­цаж байгаа биз дээ?

-“Энэ хүүхнүүд үү” кинон дээр “Эхлээд
ч хууртагдаж явсаан. Да­раа нь хууралцах ажилд нь оролц­соон”  гэдэг шиг л юм.

-Та нийтлэл бичдэг үү, эсвэл бичүүлдэг юм уу. Нэг удаа
“Санаагаа хэлээд би­чүүл­дэг” гэж ярьсан санагдана.

-Би санаагаа өгдөг. Хуучны кинонуудаас
санаа аваад хоо­рондоо яриад  бичдэг юм. Хуучны
кинонуудын ёгт утгууд лут шүү дээ. Тэр үеийн Улс төрийн товчооны цензурыг давж гарна
гэдэг бол их ухаан юм даа. Хүмүүс тэрийг ерөөсөө мэддэггүй. Ванган, Жиг­жид гуай…
тэр хүмүүс “аймаар” агуу байсан л байхгүй юу.

-Ойрд бичих санаа байна уу?

-Өөрсдийгөө муулах санаа бол их байна
даа.

-Зурж байгаа юу?

-Хааяадаа жаахан юм са­раач­на аа.

-Таны зураг ямар төрөлд нь багтах вэ?

-Зураасан зураг.

-Хэвлэлээр таныг гэр бүлийн чинь талаар янз бүрийн юм бичдэг.  Хүмүүс ч ярьдаг. Олны уг ортой гэдэг байх аа?

-Энэ тийм чухал уу?

-Чухал биш гэхэд со­нир­хол­той ш дээ?

-Яах юм бэ, хувийн амьдралаа дэлгэж.
Хэвлэлд гарсан хэмжээгээр нь л ойлгочих. Хэвлэлийнхэн   ажлаа хийж байгаа  нь тэр юм байлгүй.

-Би ч гэсэн ажлаа хийгээд л танаас асууж байгаа юм.

– …

-Таныг олигархи гэх нь бий?

-Саяын Гал үндэстнийхний судалгаанд
би ороогүй байна лээ ш дээ. /инээв/. Сонгодог утгаараа олигархи Монголд байхгүй
ээ.  Нэг байгаа. Баянхонгорын гаралтай нэг
нөхөр. Тодорхой улстөрчдийг хөлсөлчихсөн, байнга тэжээж, тэтгэж, ашиглаж байдаг.

-Та нутгийнхаа тэр нөхөртэй байнга  сөргөлдөх юм аа?

-Тэгж л хараад, яриад байгаа болохоос
надтай, надгүй улс орон гэж байгаа. Улс гэж байгаа цагт нийтийн эрх ашигт нийцсэн
бод­лого, түүний дагуу стратеги байх ёстой. Монгол Улс, Монголын ард түмний эрх
ашгийг нэгдүгээрт эрэмблэх зарчмыг хаана ч хэзээ ч орхигдуулж болохгүй байх аа..

-Ярилцлага  өгсөн
танд баярлалаа.

Японы мэргэжлийн сумогийн их аварга Хакухо М.Даваажаргал тавдугаар сарын 23-нд эх орондоо ирсэн. Энэ удаад аар саар хэдэн ажил амжуулахаар цөөн хоногийн хугацаатай туслахаа дагуулан ийн иржээ.

Тэрээр өчигдөр төрөлх Нэг­дүгээр дунд сургуулиараа орлоо. Өдөржингөө хо­тын түгжрэлд яваад их ядарсан гэнэ. “Машин­тай явс­наас явган явбал дээр юм биш үү. Нааш ирэх гэж удаан түгжирлээ” хэмээнэ. Түүнийг тус сургуулийн за­хирал, багш, сурагчид хүн­дэт­гэн угтан авч, мэнд усаа мэ­дэлц­лээ. За­хирлын өрөөнд Хакухо багш нар­тайгаа ямар яриа өрнүүлс­нийг сонир­хуулъя.

–Хамгийн сүүлд хэзээ сур­гууль дээрээ ир­лээ. Озэки болс­ныхоо дараа ирсэн билүү?

-Өө,
озэки болохоосоо өмнө ирсэн ш дээ.

–Тавдугаар сарын башёг зурагтаар хараагүй ч, сонин хэвлэлээр барилдааны мэ­дээл­­лийг авч байсан. Сүүлийн барил­дааныг чинь сэтгэл догдлон үзсэн шүү.

-19 дэх түрүүгээ аваад, до­лоон удаан дараалж түрүүллээ. Аса­шёорюүгийн амжилтыг давт­сан. Харин дараагийн башёд түрүүлбэл түүхэн амжилтын эзэн болно.

–Башё нэлээд л хэцүүхэн болж өнгөрлөө дөө?

-Хэцүү
барилдаан байсан ч үзэгчид сайн байлаа. Үзэгчдийг үнэгүй үзүүлсэн. Зарим суудлыг сугалаагаар тараасан чинь түүнийгээ хүмүүс интернэтээр зараад үнэд хүргээд бөөн юм болсон.

–Үнэгүй үзүүлсэн болохоор хүмүүс ч тоймгүй олон ирсэн биз?

-Өө,
жигтэйхэн их ирж үзсэн. Анх удаа ордонд ирж сумо үзэж байгаа хүмүүс сумогийн талаар мэдлэггүй юм. Хаана нь яаж алгаа ташихаа ч мэдэхгүй байсан гээч.

–Саяын башёд чамтай гадны нэг бөх үгүй мөн айхавтар өрсөл­дөв өө. Хаанахын бөх билээ дээ?

-Доод
зиндаанаас орж ирсэн Бразилийн бөх (Кайсейг хэлэв) шүү дээ. Шинээр гарч ирээд дараалан арав давчихсан.

–Эх орондоо ирээд хэд хонож байна вэ?

-Даваа
гаригт ирсэн. Зурга­дугаар сарын 3-10-ны өдрүүдэд цунамид нэрвэгдсэн ард иргэдэд зориулсан тойргийн барилдаан болно. Хагас бүтэн сайнаас буцаж явна даа. Их сонин. Гуравдугаар 11-ний өдөр миний 26 насны төрсөн өдөр байсан. Төрсөн өдрийн баяраар минь тэр муухай байгалийн гамшиг боллоо. Эвгүй байсан шүү. Гэхдээ би өөрийгөө их азтай гэж бодоод байгаа юм. Тэр өдрийн өглөө нь бэлтгэлээ дуусга­чихаад гэр рүүгээ явж байлаа. Манайх 44 дүгээр давхарт байдаг байхгүй юу. Лифтнээсээ буугаад арав гаруй минутын дараа л газар хөдөлж эхэлсэн. Хэрвээ намайг лифтэнд байхад газар хөдөлсөн бол тэнд түгжигдчихгүй юү. Манай байр долоон баллын газар хөд­лөлтөд тэсвэртэй. Газар хөдөлж байхад бусад байрууд яаж байгаа бол, гадаа ямархуу байдалтай байгаа бол доо гээд хөшигнийхөө завсраар хараад зогсч байлаа. Зурагтаа асаагаад “NHK” дээр тавьсан чинь “Токиод таван баллын газар хөдлөлт болж байна” гэсэн. Тэгэхээр нь сэтгэл жаахан ч гэсэн тайв­шир­сан. 

Японы
хөл­бөмбөг, бейсболын багуудад тоглодог гадны тамирчид газар хөдлөлтийн үеэр бүгд нутаг нутаг руу явчихсан. Гэтэл Японы үндэс­ний спортынхон гэдгээрээ гадны сумочид Японоос ерөөс гараагүй.

–Өчигдөр (уржигдар) нийслэл хотын захирагчийн ажлын албын­хантай уулзсан гэсэн үү?

-Тэгсэн.
Харин өнөөдөр цахил­гаан станцаар орж үйл ажил­лагааг нь үзлээ. Тэгж явсаар байтал бүтэн хоёр цагийг түгжрэлд өнгөрөөлөө. Хотын замын хөдөлгөөн гэж аймаар юм байна аа, аая яа яа.

–Эх орондоо ирээгүй жил болчихов уу даа?

-Тэглээ.
Төрөлх сургуульдаа ирээгүй таван жил болсон. Сур­гуульдаа ирсэндээ баяртай байна. Бүх юм нь хэвээрээ, сайхан байна.

-2013 онд төрөлх сургуулийн чинь 90 жилийн ойн тохионо шүү дээ?

-Тийм
үү. Тэгээд энэ ойдоо зориулж юу хийх гэж байна даа.

–Олон ажил хийж эхлээд байгаа.

-Сурагчид
нэг ширээнд гурвал­даг хэвээр юү. Гэхдээ би чинь том биетэй байсан болохоор гурвал­даггүй байсан л даа. Би япон­чуудад “Монголын хамгийн анхны сургуульд би сурдаг байлаа. Монголын “Number one” гээд л сургуулиа танилцуулдаг ш дээ.

–М.Даваажаргал маань аав болчихсон. Хэдэн хүүхдийн аав болчихоод байгаа билээ?

-Том
нь дөрвөн настай. Цэцэр­лэгүүдэд уригдан очиж хүүхдүүдэд бэлэг гардуулдаг болохоос биш өөрийнхөө хүүхдийг цэцэрлэгт нь бараг хүргэдэггүй юм. Завгүй боло­хоор. Нэг удаа л хүргэж өгсөн. Бага нь одоо дөрвөн сартай. Гурван хүүхдийн аав болчихоод байна ш дээ.

–Мундаг байна шүү?

-Би
эхнэртээ “Зөндөө хүүхэдтэй болно оо” гэсэн чинь “Болохгүй ээ, ядарна. Одоо амаръя” гэсэн ш дээ (инээлдэв).

–Арван жилийнхэнтэйгээ уулзах уу?

-Өнөө
орой уулзахаар болсон.

–Одоо Японд газар хөдлөлт намжиж байна уу?

-Ер
нь байнга л чичирхийлэлтэй байгаа. Хүн чинь тэгээд дасчих юм даа. Амархан юм. Одоо ч хаана гэлээ дээ, Японы нэг хэсэгт том газар хөдлөлт болно гээд л яриад байгаа. Магадлал нь 80 хувьтай байгаа гэсэн шүү гэв.

Захирлын умбагархан өрөөнд холоос ирсэн шавь, багш нарын хооронд халуун яриа удаан өрнөв. Сургуульд нь юу шинээр нэмэгд­сэн, ямар өөрчлөлт орсон талаар бүгд л ам булаалдан ярьцгаана. Харин уг өрөөний үүдэнд сурагч “Хакухо ирчихсэн. Гарч ирэхээр нь харъя” хэмээн ойр зуураа ярин хөөрцөглөх нь сонсогдоно. Хакуход тус сургуулийн захирал Гүррагчаа саяхан энгэрээ цоолуулсан гавьяатын тэмдгээ үзүүлээд гарын бэлэг авчихав. Сумогийн ордонд залардаг хөрөг зургийнхаа нэгэн хувилбарыг сургуулийнхандаа дурсгаад гарын бэлгээ өглөө.

Үүний дараа Хакухо сурдаг байсан ангиараа орлоо. Бусад анги танхи­маар ч орж сурагчидтай уулзав. Энэ үеэр түүнээс цөөн асуултад хариулт авсан юм.

–Та саяын башёгийн өмнө дэвжээнд алдагдсан итгэлийг дэвжээн дээр буцаан авчирна гэж амлаж байсан. Үзэгчид барил­­дааныг хэр хүлээн авсан бэ?

-Үнэгүй
үзүүлсэн болохоор их үзсэн. Сорилт маягаар явагдсан ч даваа, унааг нь тооцно гэсэн учир бөхчүүд өөрсдийгөө ирлэж мундаг барилдсан. Тэр утгаараа үзэгчид их ирсэн. 15 өдрийн турш ордон хүнээр дүүрэн байсан шүү.

–Япончууд сумочдод итгэх итгэлгүй болж, үндэсний спорт нь уналтад орсон. Тэр дарамтууд таны нуруун дээр байсан байх?

-Тэр
тал дээр нэлээд юм болсон ч би түрүү, ялалтаараа үзэгч, ард түмнийхээ итгэлийг дахин олж чадсан болов уу гэж бодож байна гэсэн юм.

Хакухо анги танхимуудтай танилц­саны дараа спорт зааланд орж багш нартай сагс тоглолоо. Тэрээр богино хугацаатай ирсэн ч их зүйл амжуулаад буцна аа хэмээж байлаа.

ХҮЛЭЭГДЭЖ БУЙ СОНГУУЛИЙН ТУХАЙ ХУУЛЬ
Сонгуулийн
өмнөх жи­лийн Монгол оронд улс төр, нийгмийн бүхий л амьдрал Сонгуулийн тухай хуулийг
хүлээн гацагнаж байна.

Хаврын
чуулганыг нээг­дэх үед Сонгуулийн тухай хууль дашийн шог болох вий гэсэн айдас байсан.
Түүнтэй харьцуу­лахад юутай ч холимог ч гэсэн өөрчлөгдсөн хувил­бараар явах нь тодорхой
болчихоод байна. Улс төрийн намуудын удирд­лагуудыг Ерөнхийлөгч хүлээн авч ярилцах
үед бүгд өөрчлөлтийг дэм­жиж байгаагаа илэр­хийлж байв. Харин 76 сууд­лын хэд нь
пропор­циональ, хэд нь мажо­ри­та­раар явах нь тодор­хой­гүй. Энэ нь зөвхөн МАН-аас
шалтгаалж бай­гаа. Чу­хам хэд гэсэн харьцаа­гаар явах вэ гэдэг дээр МАН икс, икрэг
гэсэн ха­риул­тыг хэлсэн. X ба Y-ийн хувьд 50:26, 38:38, 24:52 гээд ямраар ч ярьж
болох бөгөөд сүүлийн үед 38:38 гэсэн хувилбар хамгийн хүчтэй яригдаж байна.

Хэрэв урьд яригдаж
байсан хуулийн төслөөр 50 нь намын нэрээр, 26 нь тойрог дээр өрсөлдөж гарч ирэхээр
болбол МАН дотор багагүй дажин үүсэх билээ. УИХ-д бай­гаа 44 гишүүн бүгд л нэг,
нэг тойрог ярьж, тойргийг нь өгөхгүй гэвэл зарим нь Н.Энхбаярын МАХН руу гүйж айлгах
гээд байсан тул тус намын удирд­ла­гууд эхийг нь эцээж, тугалыг нь тураахгүйгээр
асуудлыг шийдэх гарц хайх болсон. Энэ нь 38:38 гэсэн хувилбар болов. Ингэснээр намдаа
нэр хүндтэй, хүлээн зөвшөө­рөг­дсөн лидерүүд болох С.Баяр, С.Батболд, Д.Дэм­бэрэл,
Ц.Нямдорж нарын хүмүүс намын квотоор, харин луувангаа ч, лаагаа ч идэх хүмүүс нь
38 тойрог дээр нэг, нэг мандатын төлөө хүч үзнэ гэсэн үг юм.

Сүүлийн үед хүчтэй яригдаж байгаа энэ хувилбарт аль, аль нь сэтгэл
таатай байгаа сурагтай. АН-ын хувьд ч уг хувилбар дээр реакц үзүүлээд байх шаард­лагагүй.
Ямар ч байсан хуучин хэлбэрээсээ өөрч­лөгдөж л байвал эхний шатанд заавал тийм бай­на
гэхгүй бололтой юм билээ. ИЗНН-ын хувьд ч пропорциональ гэдгээ ярина гэж байгаа
ч бас л өөрчлөгдөж байгааг нь дэвшил хэмээн үзэж байгаа сурагтай.

Ямартай ч энэ хав­рын чуулганаар Сон­гуу­лийн тухай хуулийг бат­лах
гэрэл хонгилын үзүүрт харагдаж эхэллээ. Хуулиараа долдугаар са­рын 1-нд чуулган
хаагдах ёстой ч уг урт настай хуулийг хэлэлцээд эхэл­бэл 14 хоногоор сунгахыг үгүйсгэхгүй.
Үнэндээ энэ хуулийг хүлээсээр Мон­голын улс төр дагаад эдийн засгийн амьдрал ч зогсчихсон
байгаа билээ. УИХ-ын гишүүд өргөн барьсан хуулиудаа га­цаа­чих­сан, нэр дэвших сонирхол,
хүсэлтэй хү­мүүс хууль хэрхэн батлаг­дахыг хараад түдгэлз­чихсэн, дагаад намууд
нь ямар ч санхүүжилтгүй болчихсон, улс төрийн акцууд бүгд хүлээгд­чих­сэн, бас төрийн
томилгоо өөрчлөлт нь ч үүнийгээ дагаад унтчихсан байгаа юм.

СОНГУУЛИЙН АМЛАЛТЫГ БИЕЛҮҮЛЭХЭЭР “ЭРДЭНЭС
МГЛ” МӨНГӨ ЗЭЭЛСЭН ҮҮ?

Монголын улстөрчид сонгуулиар худлаа баа­хан амлачихаад, тэрний­гээ
биелүүлэх гэж төр нь шившгээ дэлгэсэн гэх хэ­рэг дэлхийн түүхэнд би­чиг­дэх вий
гэсэн эмзэглэл төрөх боллоо. Хүний хөг­жил сангийн мөнгө авна гэсэн итгэл найдварын
оч цухуйлгасан хүмүүс энд тэндхийн банкинд ду­гаар үүсгээд удаж бай­на. Үнэхээр
амласан ам­лалтыг нь нэхэж, өгсөн мөнгийг нь авах эрхтэй хүмүүс, тэд. Саяхан сан­хүүжилт
нь зогсчихоод байсан 21 мянган төгрө­гийн буухиа дахин энэ сарын 15-наас эхэлж,
дугаар үүсгээд эхэлсэн нь зээлийн мөнгө байжээ гэх яриа чих дэлсэх боллоо. Үүнийг
ихээхэн нууцалж байгаа ч гэсэн баттай эх сурвалжаас харамсалтай ч гэсэн үнэн гэж
байна. Өнөө жилийн хувьд сон­гуулийн ам­лалт­даа зо­риулж 805 тэр­бум төгрөгийг
төсөв­лөсөн. Гэвч үүний 400 тэрбум төгрөгийн орло­гын эх үүсвэр нь тодор­хойгүй.
Тиймээс ирээдүйн “Эрдэнэс Таван толгой”­гоос орно гэж найдаж байгаа мөнгийг олох
үүр­гийг “Эрдэнэс МГЛ”-д Засгийн газар өгсөн гэх. Харин уг үүргийг биелүү­лэхээр
“Эрдэнэс МГЛ” 20 сая ам.доллар зээлжээ. Зээлийн энэ мөнгө буюу 25 тэрбум төгрөгийг
одоо ам таглаж, банкуудаар тараагаад эхэлсэн бай­на. Ёстой сонгуулийн ам­лалт гэж
нүглийн нүдийг гурилаар хуурах  их аж­лын
эхлэл байдаг юм бай­на гэхээс өөр юу гэхэв.

Н.ЭНХБАЯРТ М.ЭНХСАЙХАН ХЭРЭГГҮЙ, ХАРИН
Д.ЭНХБАТЫГ БОЛ БОДОЖ БОЛОХ ЮМ

Сонгуулийн тухай хуу­лийн чигийг хүлээнгээ намууд чухам хэрхэх
нь өөрсдөд ашигтай та­лаар бодсоор л. Бас өөр хоорондоо ч ярил­цаад эхэлчихсэн гэж
байгаа. Улс төрийн ажиг­лагчдын үзэж байгаагаар МАН хийгээд МАХН эв­сэл болоод орчихвол
бас ч гэж хэдэн суудлыг урь­дын адилаар зулгаачих­на гэдэг. Гэвч цугтаа байж байгаад
салсан энэ намын удирдлагуудын амбиц, нэгийгээ үзэн ядах сэтгэл нь дараагийн нүүд­лийг
харах чадварыг нь үгүй хийж байгаа билээ. МАН-ын удирдлагууд Н.Энх­баяртай бол хэзээ
ч үгүй гэсэн үгийг одоо­гийн байдлаар хэлж бай­гаа. Улс төрд мөнхийн дайсан үгүй
учраас ту­хайн үед ашиг сонирхол нь хэрхэн нэгдэхийг хэн мэдлээ. ҮШН-ын зүгээс МАХН-тай
нэгдэх сана­лыг тавьж, ярилцаад үз­сэн гэх. Харин МАХН-ын дарга Н.Энхбаяр үүнийг
боломжгүй гэж тооцоол­сон ажээ. Учир нь МАХН-ын дэмжигчид бол тэр чигээрээ хуучин
МАХН гэсэн үзэл баримтла­лаа­раа явж байгаа хүмүүс. Саяхан гарсан “Сант-Марал”-ын
судалгаагаар МАХН-ыг дэмждэг гэж гарсан таван хувь бол тэр чигтээ улаан хувьсгалт
намынхан. Тэдний хам­гийн дургүй хүмүүсийн жагсаалтын эхэнд л М.Энхсайхан бичигдэнэ.
Бас ҮШН-ын дэмжигчид ч МАХН-ын эсрэг үзэл бо­дол­той хүмүүс. Тэгэхээр суурь үзэл
бодлынхоо хувьд эсрэг тэсрэг дэм­жигчдийг дээд хоёр дарга нь толгой сээр холбоотой
гээд нийлүүлчих боломж­гүй.  Тиймээс Н.Энхбаярт
М.Энхсайхан хэрэггүй. Харин МАХН, ИЗНН нийлж магад гэсэн хувил­бар хүчтэй яригдаж
бай­гаа­гаас үзвэл Н.Энх­баярт Д.Энхбат нь илүү хэрэгтэй мэт. Хэрэв ИЗНН ирэх сонгуульд
үзэл баримт­лал чиг хандлага нэг АН-тайгаа эвсээгүй тохиолдолд Н.Энхбая­рын намтай
эвсэхийг үгүйсгэхгүй байна. Тэд нийгэмд байгаа МАХН-ын таван хувийн саналыг өөрсдийнхөө
5.6 хувийн саналтай нийлүүлж чад­вал хоёр том намтай өр­сөлдөх их хүч болно хэ­мээн
харж байгаа юм би­лээ. Иргэний зориг нам, Ногоон намынхантай дуу­лиан шуугиан болон
нэгдэхдээ Улсын Дээд шүүхийн бүртгэлд гурав­дугаарт бичигддэг Ногоон  намынхан МАХН-тай нэг­дэх эрсдэл байгаа гэдгийг
тооцоолж өрссөн билээ. Харин одоо тэд эрх ба­ригч хоёр намтай өрсөл­дөж, сонгуульд
амжилт­тай  орохын тулд МАХН-тай нэгдэхийг
үгүйсгэх аргагүй юм. Гэхдээ улс төр хэрхэн өрнөхийг таа­варлах боломж алга. Тэр
тусмаа Сонгуулийн тухай хууль батлагдаагүй бай­гаа өнөөгийн нөхцөлд. Ямар ч байсан
Н.Энх­баяр сард нэг удаа акц хийж, ирэх жилийн өдийг хүртэл 12 том арга хэм­жээг
төлөвлөчихсөн бай­гаа гэх юм билээ. Гэхдээ гол бай нь МАН байх аж. 

АН НЬ ЗАЛУУЧУУДАД УЛАМ ХААЛТТАЙ, МАН
НЬ УЛАМ НЭЭЛТТЭЙ БОЛООД БАЙГАА НЬ ЮУНЫХ ВЭ?

МАН, АН хоёр нэгдэж Хамтарсан Засгийн га­зарт байгаа хэдий ч энэ
хоёр нам үргэлж ах дүүс шиг явна гэвэл худлаа. Одоо дарга нар нь, ах нар нь сүрхий
байгаа ч за­луус нь урьдын адилаар өрсөлдсөөр байгаа гэх юм билээ. Дээхнэ манай
сэтгүүлч Д.Мөнгөндалай “МАН-д дараа үеийн арми жагсч байна, АН-д салаа цэрэг ч алга”
гэсэн нийтлэл бичиж байсан билээ. Үнэхээр энэ бай­дал нам дээрээ ч илт байдаг, одоо
бүр залуу­чуудын байгууллагын бүтэц нь үүнийг батлах болсон талаар гадуур ихээр
ярих болов. Хуучин МАСЗХ-ны залуус гэж тэнгэрийн амьтад байв даа. Жилд нэг удаа
тан­саг гэгчийн шинэ жилийн наадам хийж, айл айлын хойморт алтан сарнай барьсан
ганган нөхөд зочлоод л. Бас хамгийн түрүүнд албан  тушаалд очдог нэг тийм мундаг­чуудын холбоо байсан.
Харин одоо гэр хороо­лолд ч хэвлэлийн бага хурал хийлгэж байх шиг, Монголын залуучуудад
тулгарч буй бэрхшээлүүд гэж ирээд судалгаа ч хийж байх шиг тун энгийн байдлаар ажиллаад
бай­гаа юм. Л.Оюун-Эрдэнэ гэж Хэнтийн Бэрхийн хөдөөний гар холбооны ерөнхийлөгч
болоод нэр хүнд унагаад гэж ярих хүмүүс байсан ч яг үнэндээ энгийн байдал нь залууст
таалагдаад бай­гааг үгүйсгэх аргагүй. Лав сүүлийн хагас жилд элссэн гишүүдийн тоо
нь хэдэн жилийнхээ нийл­бэр­тэй тэнцсэн гэсэн. Л.Оюун-Эрдэнийг хрис­тийн шашин шүтдэг,
“Дэл­хийн зөн” олон улсын байгууллагад ажиллаж байсан гээд НАМЗХ-ны ерөнхийлөгчөөр
томи­лог­дох үед нь хэвлэлээр нэлээд бичиж байсан. Үнэхээр алдаа эндүү нь ямар юм,
тэр НАМЗХ-г өөрөөр ажиллуулаад эхэлснийг залуучууд нь яриад эхэлчихсэн байна лээ.
Монголын толгой баячуудын хүүхдүүдийг багтаасан холбоо мөрт­лөө олон улсын байгуул­лагын
зарчмаар мөнгө босгох төсөл бичицгээж, залуусыг тогтмол урьж нийг­мийн ардчилал
үзэл ба­римтлалаа танил­цуул­даг бол­сон тухай сонс­лоо. Бас олон улсын байгуул­лагад
ажилладаг чадал­тай за­луу­чуудыг НАМЗХ татах нарийн ар­га олчи­хоод байна, гэтэл
бид чадахгүй байна гэж АН-ын залуус халаг­лан ярьж байна.

Ер нь ямар ч хүн албан тушаалд дуртай байдаг. Хэрэв НАМЗХ-д элслээ
гэхэд бага хуралд нь багтах гэж багагүй шатыг туулах хэрэгтэй болж таарна. Тэгвэл
одоо­­­гийн НАМЗХ-ны удирд­лага багаараа, бай­­гууллагаараа буюу 300 хүнтэй баг
орж ирвэл бага хуралдаа шууд нэг квот өгнө гээд зарлажээ. Тэгэхээр энд тэндхийн
хүчтэй залуус багаараа НАМЗХ-д элсч эхэлсэн гэх. JCI-ийн залуучууд гэхэд тус байгууллага
руу “бөөнджээ”. Өөрөөр хэл­бэл, МАН-д гэсэн үг л дээ. Харин АН-ын АЗХ бүр эсрэгээрээ
байгааг на­мынх нь залуус шүүмж­лээд байгаа юм. Удирдах байгууллагад нь 60 хүн байдаг.
Түүнийг ерөнхий­лөгч нь өөрийнхөө хүмүү­сээр тавьж, бодлогоо явуулдаг нь шинэ урсгал,
шинэ давалгаа орж ирэх боломжийг хойш татдаг гол хаалт болсон гэх. Өрсөлдөгч тал
нь улам бүр нээлттэй бодлого баримтлаад байхад АЗХ улам хаагдаад байгаа нь буруу
гэж улс төрийн ажиг­лагчид үзэж байгаа. Учир нь өнөөдрийн НАМЗХ, АЗХ-ны гишүүд бол
ирээдүйн намын ги­шүүд. Дээрээс нь НАМЗХ-ны ерөнхийлөгч Л.Оюун-Эрдэнэ ямар нэгэн
дэд сайд, төрийн нарийн бич­гийн даргын албан ту­шаалгүй нь АЗХ-ны ерөн­хий­лөгч,
Гадаад харилцааны дэд сайд Б.Болороос давуу тал нь болоод байгаа юм гэж хардах хүмүүс
ч бай­на. Ямартай ч коммунист угшилтай МАН-ын залуус өөрчлөлт шинэчлэлтийг хийх
гээд саландаа суучи­хаж. Харин шинэ бүгдийн эхлэл гэж сүүлийн 20 жи­лийн хугацаанд
бидний ой тойнд хадагдаж ирсэн АН-ын залуус хаана байна вэ гэдэг асуулт өөрийн эрхгүй
төрж байна.

Хаваржаанаасаа нүүж, зусландаа гарсан Монголын улс төрийн амьдралын эрээвэр ху­рааврыг тоймлон хүргэ­хэд ийм байна. Зуны зугаа­тай цаг ирж, хүн бүр их амралтдаа гарах цаг дөхжээ. Гэхдээ их амрал­тын өмнө Сонгуулийн тухай хууль гэж бий, Сон­гуулийн тухай хуулийг хүлээсэн Монголын улс төр, нийгмийн амьдрал гэж бас байна.

Д.ЗОРИГТЫГ ЗОЛИГТ ГАРГАХ БҮТЭЛГҮЙТЭЛ

Төрийн ордон гадна доторгүй савчаантай. Гадуур нь “Гал үндэс­тэн”-ийхэн морьтойгоо шаардлага барьж давхиад Чингэсийн үеийг дахин сэргээхдээ тулав. Харин Төрийн ордны дотор үйл явдлууд өрнөж байна. Сонгуулийн хууль, Засгийн газрыг унагах   янз бүрийн хувилбартай улстөржилт, эрх ба­ригч намуудын дотоодын зөрчил тэмцэл, албан тушаалын амбиц гээд ер юу эс болохов. Саяхан АН-ын гурван гишүүн болох С.Эрдэнэ, Д.Ганхуяг, Г.Баярсайхан нар  Д.Зо­ригт сайдыг огцруулах санал оруул­сан ч бүтэлгүйтэв. Санал оруулсан болж ингэж жүжиглэх нь зөвхөн өөрсдийнхөө пиарыг л хийх гэсэн оролдлого гэж нэг хэсэг нь хардаж  байгаа. Тэдний энэ сана­лыг улстөржилт гэж харах хүн олон. Зориуд хамгийн залууг нь барьж авч байна. Цаагуураа Засгийг  хөдөлгөх гэсэн оролдлого гэж тэд үзэж  байгаа юм.

Удирдах зөвлөл  дээр нэгэнт огцруулахгүй гэдгээ тохирсон уч­раас дээрээ удирдлагын заавартай шийдвэрийг МАН-ын гишүүд да­гахгүй гээд яахав. Ингээд л кноп­чины ажил хийж нийтээрээ Д.Зориг­тыг авч үлдлээ гэж дургүйцэх МАН-ын гишүүд  бас байна.  Ер нь тэгээд МАНАН байгаа цагт ганц нэгээр нь ингэж сугалах гэсэн оролдлого бүтэхгүй юм байна. Тэгээд эрх барьж байгаа намын сайдыг цөөнх болоод Засгийн газарт хамтарсан намын гишүүд огцруулна гэдэг нь өөрөө утоп санаа. Гэхдээ ийм санаануудыг гаргах боломж нь УИХ-ын тухай хуулинд байдаг болохоор яая гэхэв.

Аль ч Засгийн газрыг огцруулах сонирхол байнга л явж байдаг.  Энэ удаа Засгийн газрыг унагах со­нирхолтнууд  урсгалаар нь явуулж байгаад намраас дахин оролдож эхэлье гэж ярьсан байх юм. Энэ бол угаас байж л байдаг зүйл. Учир нь албан тушаалгүй хоцорсон хүмүүс албан тушаалтай болохыг хүсэл­гүй л яахав. Ийм хүмүүс МАН-д ч байгаа. АН-д ч байгаа. Харин МАНАН-гаас АН-ыг гаргах сонир­хол Ардчилсан намын жирийн ги­шүү­дийн дунд бүр их яригдах бол­жээ. Дайны хажуугаар дажин гэг­чээр элдэв асуудлаа яая гэж байхад нь АН-ынхнаас гадна өөрийнх нь намынхан янз бүрийн бор шувуу нисгээд Ерөнхий сайд С.Батбол­дыг амраахгүй байгаа аж. Тухайл­бал нарийн бичгийн дарга У.Хүрэл­сүхийг намын даргад зүтгэх нь гэж ярьж эхэлжээ. Намын дарга, Ерөн­хий сайд хоёрыг салгаж на­мар Засгийн газрыг унаган Ерөн­хий сайдад Н.Энхболдыг зүтгүүлнэ гэсэн мессэж ч МАН-ын зарим улстөрчдийн хүрээнд таржээ. Хэн нь хэн байхав гэдгээс илүүтэй МАНАН-г сарниах төлөвлөгөө бол   хаа сайгүй л яригдаж байгаа сэдэв. Гэхдээ МАНАН-г МАНАН л сарниах  болов уу. МАН-д ч , АН-д  ч Засгийн газрыг огцруулчих сонирхолтнууд бий. Ялангуяа сонгууль дөхөж байгаа энэ цаг үед. Тэртэй тэргүй ирэх сонгуульд нэгдэж орох гээгүй л юм бол салж сарних цаг нь болсон. Энэ Засгийн газар уул уурхайг эргэлтэд оруулах, Үндсэн хуулийг өөрчлөх, Сонгуулийн хуу­лийг өөрчлөх зорилготой л байсан биз дээ. Үндсэн хуульд өөрчлөлт оруулах хуулиа баталсан. Одоо Үндсэн хуулийг өөрчлөх хугацаа энэ парламентад байхгүй. Өөрч­лөлт оруулах хуулиа баталчихсан хойно одоо болоо ш дээ. Уул уурхайг эдийн засгийн эргэлтэд зөв,  буруу  аль нь ч бай оруулчих­лаа.  Сонгуулийн хуулийг батлахын хувьд заавал Хамтарсан засаг байх албагүй. Угаасаа намуудын эрх ашгийг хөндсөн хууль намын бүлэг дээр л шийдэгддэг шүү дээ. Засгийн газрын оролцоотой орол­цоогүй. Энэ нь хоёр нам хамтраад засаг бариад цааш явах нь улс төрийг улам л увайгүй,  ичгүүргүй болгож хувиргана. Сүүлийн үед УИХ-ын гишүүдийн өгсөн ярилц­лагаас харахад ялангуяа МАН-ын гишүүд АН-ынхаа гишүүдэд хойд эцэг мэт хандаж эхэлж байна. Энэ нь Ардчилсан намыг нийгэмд өөрийгөө авч явж чадахгүй балчир хүүхэд мэт харагдуулж байгаа. 

Улмаар Ардчилсан нам сон­гуульд орох санал авах боломжоо  өдөр хоногоор МАН-д алдаад байна гэсэн үг. Энэ нь МАН-д  ашигтай болохоос АН-д хамгийн хортой үзэгдэл. Хэрэв хамтраад цаашид ингэж удаан явбал улс төрийн гуравдагч хүчинд боломж олгоно. Яг ийм нөхцөлд 1933 онд Гитлер Засгийн эрхэнд гарч ирсэн. Том хүчнүүд үг хэлж чадахгүй дор­витой сөрөг хүчингүй байсан нь захын нэг нацистыг  төрийн эрхэнд гарах боломжийг олгосон шүү дээ. Нийгэмд сөрөг хүчингүй болохын аюул нь нийгмийн тогтолцоог өөрч­лөх сэдлийг төрүүлдэг. Учир нь иргэд 76 мангуу гэж ярих нь их болсон. Энэ нь парламентын за­саг­лалд итгэхээ байсны эхний шинж тэмдэг. Цаашлаад нийгмийн сэтгэхүйг Ерөнхийлөгчийн засаг­лал руу түлхэж буй буруу  хандлага юм.

БУЦАЖ ИРСЭН Н.ЭНХБАЯР

“Сант
марал”-ын судалгаагаар “Хамгийн нэр хүндтэй хүмүүсээс хэнийг нь улс орныхоо улс төрийн амьдралд оролцоосой гэж хүсдэг вэ гэсэн асуултад судалгаанд оролцогчид  Ерөнхийлөгч  Ц.Элбэг­дорж, Ерөнхийлөгч асан Н.Энх­баяр хоёрт олонхи нь санал өгчээ. Нэг үгээр хэлбэл дээрх хоёр хүн бусад улстөрчдөөсөө хол тасар­хай гарч иржээ. Одоо ажлаа хий­гээд яваа Ц.Элбэгдорж олон ний­тэд үнэлэгдсэнийг нь ойлгож болж байна. Харин улс төрөөсөө жийгд­сэн Н.Энхбаяр өндөр рейтингтэй яваа нь яах аргагүй анхаарал татаж байна. Манай ард түмэн чинь өрөвчхөн сэтгэлтэй улс. Цагтаа цалгиж явсан Н.Энхбаярыг нам нь,  нөхөд нь жийгээд эхлэхээр өрөв­дөж хайрласан байх талтай.     Ямар ч байсан Н.Энхбаяр эргэж ирж байгаа юм байна гэж энэ судалгааны дүнгээс харлаа. Сал­гаад авсан МАХН-ыг нь зөвшөө­рөхгүй байлаа гэхэд  бие дааж нэр дэвшээд ч ороод ирж мэдэх хүн.

“Баатарцогтын нагацыг бага үнээр банжаа юу даа” гэдэг шиг Н.Энхбаярыг басч болохгүй ээ. Цаадах чинь ирж яваа юм байна. Гараад ирлээ гэхэд нэг суурин дээрээ сууна гэж байхгүй. Заавал л ахина. Тэгээд өндийгөөд ирвэл нь нөгөө урвасан нөхдүүд одоо ер нь яанаа.  Тэр нөхдүүдийн заримыг нь гадны биеэ үнэлэгчдийн өврөөс  гаргаж  ирээд ч өөд нь татаж явсан үе бас бий. Хүний тусыг огт үгүйсгэ­вэл хүн чанаргүй л юм болно шүү дээ, МАН-ынхаан. Цаадах чинь ингээд нэг өндийчихвөл ч  өшөөгөө харин ч нэг сайн авах байх шүү.   Н.Энхбаяр өөрийнхөө хүчээр тө­рийн өндөр суудлуудыг зайдалж байсан. Монголчууд төрт ёсны уламжлалтай ард түмэн. Хачир­халтай нь ард түмэн өнөөдөр Н.Энхбаярыг эрх баригчид шиг зүхэхгүй байгаа. Н.Энхбаяр дахин орж ирэх орон зай бий. Судалгаа угаас Н.Энхбаяр сайндаа биш,  намууд муу учраас тэгж гарч  байгаа юм. Түүний гарт дахиад олон том хөзөр бий. Өнөөдөр МАН-аас МАХН-ын нэрийг нэхэх эрх  Н.Энх­баярт байна. Хамтарсан засгийн газраас үр дүн шаардах эрх мөн л Н.Энхбаярт бий. Хам­тарсан Зас­гийн газар хэдэн хүнийг баяжуулж хэдийг ядуу болгосныг тооцоод зарлачих чадал мөн л түүнд бий. Өнөөдөр тэрээр гудманд гарснаа­раа сөрөг хүчний хэм­жээлш­гүй эрхийг эдлэх боломжтой болсон. Ирэх УИХ-ын сонгуулиас долоо хоногийн өмнө тавьсан долоон асуулт нь түүнийг парла­ментад намын бүлэг байгуулах хангалттай боломж олгоно. Хам­тар­сан Зас­гийн газрын жижиг алдаа Н.Энх­баярын нүдээр харвал хангалттай том алдаанууд болж хувирна. Энэ бүхэнд МАНАН хариу өгөх ямар ч чадалгүй сон­гуульд орно. Харин МАНАН хуга­цаа ал­далгүй сарни­сан тохиол­долд Н.Энх­баярын өнгө бүдгэрч эрх баригч намуудын өн­гийг ард түмэн сонирхох болно.

 
МАН–ЫН ТОЛГОЙНЫ ӨВЧИН БУЮУ СОНГУУЛИЙН ХУУЛЬ

Уг нь аль, аль намын хувьд Сонгуулийн хууль толгойны өвчин мөн. Тэр тусмаа Сонгуулийн хуу­лиас болж хамгийн их толгой нь өвдөж шаналж буй нам бол МАН.   Саяхан Ерөнхийлөгч Ц.Элбэгдорж намуудын дарга нартай уулзаж Сонгуулийн хуулийн талаар ярилц­жээ. Ерөнхийлөгч намын дарга нараас аль хувилбараар явуулах нь дээр гэж бодож буйг нь асууж. Ихэнх нь холимог хувилбарыг дэмжиж байна гэнэ.  МАН ч холимог хувилбарыг байж болох юм гэж. Харин тооны харьцаа ямар байхыг тодорхой хэлж мэдэхгүй байна гэж МАН-ынхан хэлсэн гэнэ. Одоо яригдаад байгаа 26:50 гэсэн хувил­барыг шууд авлаа гэхэд УИХ-д  байгаа дөчин хэдэн гишүүнээ алийг нь гэхэв. Заримыг нь жийлээ гэхэд МАХН-аас очоод нэр дэвших ч юм билүү. Зарим эх сурвалжийн ярьж байсанчлан МАН Н.Энхбаяртай­гаа учраа олно гэдэг бол лөөлөө бол­сон бололтой юм. Тиймээс эцсээ хүртэл Н.Энхбаяртайгаа үзэж тарж байгаад л  дуусах юм байх. Гэхдээ Н.Энхбаяраасаа айж байгаа нь бол илт. Хөдөөгөөр явуулсан нууц судалгааны сураг сонсдох болсон.

МАН, МАХН хоёр
бараг л ижил тэнцүү хувь авсан байх аж. Үнэндээ энэ хоёр
нэрийг ялгахаа
байсан юм билээ. Тэгэхээр Сонгуулийн хуулиа Н.Энхбаяртаа тааруулж хийх хэрэг гараад байдаг. Н.Энх­баярын МАН-д учруулах хамгийн том аюул бол МАХН гэсэн үсэг ч
биш, одоо дагаж далдаганаж байгаа улсууд нь ч биш. Харин Сонгуулийн хуулийн өөрчлөлтөөс болж түүн рүү хөрвөж чадах МАН-ын парламентад бай­гаа арваад гишүүн. Ямар ч
тохиол­долд дээрх гишүүд МАН-д
Н.Энх­баяраас хэд дахин илүү хохирол учруулж чадах бөгөөд Н.Энхбаяр­тай нэгдсэн тохиолдолд МАН-ын хувь заяа бүрхэг болно.

Ерөнхий сайд Сүхбаатар аймагт очиход
хүндэт харуул жагсан угтан авлаа. Иргэд төв талбайгаараа дүүрэн ирсэн байв.  Д.Сүхбаатар жанжны  хөшөө бүхий төв талбайдаа  LED дэлгэц байр­луулжээ. Дэлхийн хөл бөмбөгийн
аварга шалгаруулах тэмцээнийг аймгийн төвийнхөн эндээ үзэж таашаал авдаг юм байх.
Ерөнхий сайд тус аймгийн ус цэвэршүүлэх байгууламж, дунд  сургууль, эмнэл­гээр орж үйл ажиллагаатай нь танилцсан
юм. Мөн очсон аймаг бүртээ зарим асуудлыг 
газар дээр нь шийдэж  явлаа.    Иргэд Ерөнхий сайд С.Батболдыг хүлээгээд  Хөгжимт жүжгийн театрт зайгүй цугларчээ.  Орон нутгийн асууд­лаас гадна ажиллаж буй салба­рынхаа,
бүр хувийн зовлон жаргалаа тоочих нь байх юм. Үгүй бол үзэл бодлоо илэрхийлэх аж.
Сүхбаатарчууд УИХ-ын сонгуу­лиар үргэлж МАХН-ын (МАН-ын) төлөө санал өгч ирсэн болоод
ч тэр үү уулзалтын үед час улаан хэвээрээ л байгаа нь анзаарагдсан юм. Орон нутагт  өнгөрсөн сонгуу­лиар Ардчилсан нам ялжээ.  Байдлыг харах нь ээ Сүхбаатар аймаг өнгө зассан
байна. Хэдэн жилийн өмнөхөөсөө шүү. Залуу удирдлагууд нь ч гар нийлж ажиллаж байгаа
бололтой. Ядаж л нийслэлд шороо болоод байдаг гутал бүртийх тоосүй байж болоод байна
лээ. Явган хүний хавтангаа хийх гэж хөрш Дорнод аймгаасаа зөөдөг байсан бол одоо
өөрсдөө хийдэг болж. Тоосгоны үйлдвэртэй болсон болохоор дорнодчууд тоосго авдаг
болжээ. Хатуу хучилт­тай зам, автомашины зогсоол, үйлчилгээний шинэ төв, цэцэрлэгт
хүрээлэн, 75 айлын орон сууц гээд сүүлийн жилүүдэд хийгдэж байгаа ажил нүдэнд илхэн.
Аймагтаа жишиг хороолол байгуулсан нь сонирхол татаж байв. Заасан юм шиг нэгэн жигд
байшингууд, ижил өнгийн хашаа нь цэвэр цэмцгэр харагдах аж. Сүхбаатарчуудын нэг
гол шүдний өвчин бол ундны ус байсан. Одоо харин цэвэршүүлэх байгууламж барьсан
учир энэ зовлонгоосоо салсан байна. Мөн хэдхэн хоногийн өмнө дулааны цахилгаан станцын
шав тавьсан гэнэ. Сүхбаатар аймаг зоогийн газартаа тамхи татахыг хориглоод хэдэн
жилийн нүүр үзжээ. Иргэд ч энэ журмыг сайн биелүүлэх юм. Дээр нь гялгар уутыг хэрэглээнээс
гаргахаар зорьсон учир дэлгүүрээс уут олно гэдэг нүдний гэм болжээ.  Саяхан сүхбаатарчууд Соёлын өдрүүдээ нийслэлд
нижгэр зохион байгуулсан билээ.  Олон хийсэн
ажлууд байгаа ч хэд хэдэн хүн үг хэлэхдээ 
Засаг даргаа хатуу шүүмжлэв.  Хувийн
болоод улс төрийн өнгө аяс орсон энэ шүүмжлэлд Ерөнхий сайд харин зөв өнцгөөс нь
харсан үг хэлнэ лээ. “Юм хийсэн хүн үргэлж шүүмжлэлд өртөж байдаг” гэж.   Засаг даргаа зад шүүмжилсэн нутгийнхан бурхан
мэт үзэх Ч.Улаан, Р.Буд хоёрыгоо харин ч нэг зайгүй маг­таж байна лээ. Ч.Улаан гишүүнийг
үг хэлэх бүрт ширүүн бороо шаагих мэт л алга ташаад байсан. УИХ-ын гишүүн ч гэж
хэлэхгүй юм. Улаан сайд маань гэцгээх аж. 

Уулзалтын гадуур бас иргэдээс Засаг
даргын үйл ажиллагаатай холбоотой асуулт асуухад гурван хүний хоёр нь лав ам сайтай
байна лээ. Уулзалтын үеэр ирэдийн их сонирхож буй зүйл нь хүний хөгжлийн сангийн
мөнгийг бэлнээр нь, бөөнөөр нь өгөөч гэж гуйх юм. Таван толгойн хувьцааны талаар
ч сонирхож байна. Зүүн аймгийн иргэд нэг зүйлд их санаа зовдог аж. Учир нь аль ч
аймагт очсон уул уурхайн асуудал сөхөгдөх бөгөөд байналь орчин сүйдэж байгаа болон
монгол ажилчдын цалин хөлс бага байдаг, гадаадын хөрөнгө оруулагчдын дураараа загнах
нь хэтэрсэн гээд л шүүм­жилж гарах юм. 

  
Мөн “Хотод жагсаал цуглаан хийгээд байгаа тэр Их хуралдай энэ тэр чинь ард
түмэн бүгдээрээ биш үү, Ерөнхий сайд аа. Хэсэг хүмүүсийн л улстөржилт. Түүнээс биш
юу юугүй хүний толгой авах юм яриад байгаа нь зөв биш”  гэж байна, тэд. 

Иргэд “Гэрийн нохойн сүүл өөдөө гэдэг
байсан бол манай аймагт үйл ажиллагаа явуулж гадны хөрөнгө оруулалттай компаниуд
хэтэрхий даварч байна” гэсэн гомдол хэлж байв. Уулзалтын үеэр  анхаарал татсан зүйл нь Жаргалсайхан хэмээх залуугийн
үг байв. Эмч, эмнэлгийн ажилчдын буруугаас эхнэр, дөнгөж төрсөн хүүхдээ алдсан тэрээр
зааланд байгаа олон хүнийг нулимс унагахад хүргэсэн юм.   Тэрээр “Одоо болтол шүүх эмнэлгийн дүгнэлт гараагүй.
Үүнээс болж хэнд ч арга хэмжээ аваагүй.  Холбогдох
бүх л байгууллагад хандаад хэн ч хариу өгөөгүй”-г Ерөнхий сайдад хоолой зангируулан
хэлсэн юм. Мөн тэр залуу “Ганц хар амиа бодож байгаа юм биш. Дараа ийм зүйл давтуулахгүйн
тулд үүнийг хэлж байна” гэлээ. Эмч эмнэлгийн байгуулагад арга хэмжээ авч өгөөч ээ
гэхэд газар дээр нь баг томилж,  уулзалтын
дараа энэ талаар яаралтай хуралдахыг Ерөнхий сайд үүрэг болгов.

    Хүүгээ хүний гарт алдсан гэж үздэг  Б.Чадраа гуайн  үг бас анхааралд өртөв. Олон жил холбогдох бүх
байгууллагаар нь яваад ч олигтой үр дүнд хүрээгүй гэдгээ өвгөн хэлнэ лээ. Уулзалтын
төгсгөлд өндөр настан О.Мангал гуай эв эетэй байхыг сануулаад “Улстөржөөд сайн зүйлд
хүрэхгүй. Хамтраад засаг барилаа гээд муудсан юм алга, тэр энэ нам гэхээсээ илүүтэй
улс орноо л өөд нь татах хэрэгтэй хүүхдүүд минь” гэж танхимын уур амьсгалыг зөөллөсөн
юм. 

Сүхбаатарчууд Ерөнхий сайдад дарьганга
хийцийн гайхал­тай уран сэтгэмжтэй тэнзэн ташуур бэлэглэсэн юм. Харин Ерөнхий сайд
эмнэлэг, сургуульд машин бэлэглэнэ лээ.  

Ямар ч байсан Сүхбаатар аймаг хөгжих
нь тодорхой болжээ. Харин улстөржсөн хэвээрээ л байна лээ.

Улсын Дээд шүү­хийн Ерөнхий
шүүгч, Шүүхийн Ерөнхий зөв­лө­лийн дарга Ц.Зоригт­той ярилцав. Түүний Ерөнхий
шүүгчээр то­ми­логдсоноосоо хойш хэвлэлд өгч байгаа анх­ны ярилцлага нь энэ юм.

-Та Улсын Дээд шүү­хийн Ерөн­хий
шүүгчээр томилогдоод бараг ха­гас жил болох гэж бай­на. Энэ хугацаанд юуг хийж
амжуу­лав гэдгээс яриагаа эхлэх үү?

-Юуны өмнө “Өдрийн сонин”-ы
уншигчдын энэ өдрийн амар амга­ланг айлтгая. Миний бие Ул­сын Дээд шүүхийн Ерөн­хий
шүүгч, Шүүхийн Ерөн­хий зөвлөлийн дар­гын ажлыг хүлээн аваад удах­гүй зургаан
сар бо­лох гэж байна. Өнгөрсөн хуга­цаанд Монгол Улсын Үн­дэсний аюулгүй байд­лын
зөв­лөлөөс зөвлөмж бол­госон “Шүүх эрх мэд­лийн хүрээнд шинэт­гэ­лийг гүнз­гийрүүлэх
хөтөл­бөрийг шүүхэд хэрэгжүү­лэх аж­лыг эрчимжүүлэх үндсэн чиглэл” гэсэн аж­лын
тө­лөв­лөгөөг боловс­руулж гаргалаа. Энэ ба­римт би­чиг нь шүүхийн стратеги
төлөвлөгөө буюу бидний цаашдын зорил­го, зо­рилт, хэрэгжүүлэх арга хэмжээ, хүрэх
үр дүнг тодор­хойл­сон нэг үгээр хэлбэл үйл ажилла­гааны “газрын зураг” гэж
ойлгож болно.

Мөн шүүхэд эрх зүйн шинэт­гэлийг
гүнзгий­рүүлж, Захиргааны хэр­гийн шүүхийн тогтолцоог улам боловсронгуй бол­гох
үүднээс Захир­гааны хэр­гийн давж заалдах шатны шүүхийг шинээр бай­гуулж, үйл
ажилла­гааг нь эхлүүллээ. 2004 онд Мон­гол Улсад Захир­гааны хэргийн дагнасан
шүүх анх байгуу­лагдаж, үйл ажиллагаагаа эхэлс­нээс хойш 2011 оны дө­рөв­дүгээр
сарын 1-ний өд­рийг хүртэл давж заал­дах шатны чиг үүргийг Улсын Дээд шүүхийн
За­хиргаа­ны хэргийн танхим хэрэг­жүүлж байлаа. Давж заал­дах болон хяналтын
шат­ны шүүхийн чиг үүр­гийг нэг танхимын шүүг­чид хэрэг­жүүлж байсан нь
дагнасан шүүхийн зо­рилго, үйл ажил­лагааны үндсэн зар­чим зөр­чиг­дөж, зарим
хүндрэлүүд үүсгэдэг бай­сан. Одоо давж заалдах жур­маар гомдол гаргасан захир­гаа­ны
хэргийг улсын хэм­жээнд бие даа­сан шүүх хянан шийдвэрлэх болс­ноор Монгол
Улсад за­хир­гааны хэргийн даг­на­­сан шүүхийн тогтол­цоо бүрэн утгаараа
ажиллах болов. Шинэ шүүхийг бай­гуулж, хуульд заасан хуга­цаанд үйл ажил­ла­гааг
нь эхлүүлэхэд дэмж­лэг тус­лалцаа үзүүлсэн Монгол Улсын Ерөнхий­лөгч, Ул­сын Их
Хурал, Засгийн газар, Төрийн өмчийн хороонд энэ даш­рамд та­лархлаа илэр­хийлье.

Шүүхийн
үйл ажилла­гааг олон
нийтэд нээлт­тэй, ил тод болгоход чиг­лэсэн зарим ажлуудыг хийж байна. Юуны тү­рүүнд бүх
шатны шүүхүү­дийг өөрийн цахим хуу­дас­тай болгож, түүнд ту­хайн шүүхийн талаарх мэдээ, мэдээлэл,
үйл ажил­ла­гааны
тайлангаас гадна шүүхийн
шийдвэр, тогтоо­луудыг нийтэлж байна. Энэ нь шүүхийн
шийдвэр хэрхэн хууль ёсны бөгөөд үндэслэл бүхий
гарч бай­гааг иргэд олон нийт үзэж
ойлгох, тэдний эрх зүйн
мэдлэ­гийг дээшлүүлэх, шүүг­чид шийдвэр, тогтоо­лоо бо­ловс­­руулахдаа
илүү чам­бай хандахаас
гадна шүү­хийн практик
судла­лын чиглэлд чухал ач хол­богдолтой байх болно.

Монгол Улсын бүх
шатны шүүхийн шийдвэрийн нэгдсэн цахим санг бий болохоор төлөвлөн холбогдох
судал­гаа, бэлтгэл ажлыг хангах ажлын хэсгийг байгуулаад байна.

Энэ хугацаанд
Хэнтий, Дорнод, Сүхбаатар, Говьсүмбэр, Сэлэнгэ, Дархан-Уул, Дорноговь аймаг
дахь шүүхүүдийн ажил байдалтай биеч­лэн танилцаад байна. Ингэснээр шүүхийн үйл
ажиллагаанд тулгам­даж байгаа ямар асуудлууд бай­гааг газар дээр нь судлан
биечлэн танилцаж, шийдвэрлэх арга замуу­дыг тодорхойлж  байна.   

Цаашдаа шүүх эрх
мэдлийг Үндсэн хууль болон бусад хуульд нийцүүлэн шударгаар хэрэгжүү­лэх,
шүүхийн бие даасан, шүүгчийн хараат бус байдлыг хангах, шүүхийн удирд­лага,
дотоод ажлын зохион байгуулалт, хүний нөөцийг бэхжүүлэх, гадаад харилцаа, хам­тын
ажиллагааг өргө­жүүлэн хөг­жүү­лэх, менежментийг боловс­ронгуй болгох зэрэгт
гол анхаарлаа хандуулан ажиллана.

-“Шүүх эрх
мэдлийн шинэч­лэл ба шударга ёс” чуулга уул­залт саяхан болж өнгөрлөө. Энэ
чуулга уулзалтаас ямар үр дүн гарав. Ер нь энэ арга хэмжээний дараа шүүх
дорвитой өөрчлөг­дөнө гэж найдаж болох уу?

-Монгол Улсын
Ерөнхийлөг­чийн санаачилгаар “Шүүх эрх мэд­лийн шинэчлэл ба шударга ёс”
үндэсний чуулган Төрийн ордонд амжилттай зохион байгуулагдлаа. Чуулганы онцлог
нь шүүх эрх мэд­лийн шинэт­гэлийн талаар зөвхөн тухайн салбарын төдийгүй, хууль
тогтоох, гүйцэтгэх эрх мэдэл, иргэ­ний нийгэм, бизнесийн төлөөлөл, хууль зүйн
сургуулиуд болон эрдэм­тэн судлаачид, олон улсын байгууллага зэрэг бүхий л
талуу­дын төлөөллийг оролцуулсан, асуудлыг олон талаас нь ярилцаж, шийдлүүдийг
тодорхой хэмжээнд томъёолж чадсанаараа чухал ач холбогдолтой болж чадсан гэж
үзэж байна. Үндэсний чуулганаас нэгд­сэн санал, зөвлөмжүүд гарсан, шинээр
батлагдан гарах Шүүхийн тухай багц хуулиуд болон бусад хууль тогтоом­жид
тусгалаа олно гэдэгт итгэлтэй  байна.

Шүүхийн
тогтолцооны тухай хууль, Шүүгчийн эрх зүйн байдлын тухай хууль, Шүүхийн ерөнхий
зөвлөлийн тухай хуулиудад зарч­мын шинжтэй шинэлэг зохицуу­лалтуудыг зоригтой
оруулан, Улсын Их Хурлаас тэдгээрийг баталж чадвал шүүхийн шинэчлэл амжилттай
хэрэгжих эрх зүйн үндэс бүрдэнэ. 

-Олон нийт
шүүхэд шүүмж­лэлтэй хандах нь олонтаа. Шүүхийн шинэтгэл гэж яриад удаж байна.
Шүүхэд ер нь шинэт­гэл хэрэгтэй байгаа юу. Хэрэгтэй бол юуг нь шинэчлэх
хэрэгтэй вэ?

-Хүмүүнлэг
иргэний ардчилсан нийгэм цогцлоон хөгжүүлэхийг эрхэм зорилгоо болгосон иргэд
төрийн үйл ажиллагааны талаар санаа бодлоо чөлөөтэй илэрхий­лэх, алдаа дутаг­далтай
зүйлийг шүүмжлэх эрхтэй. Төрийн байгуул­лагын бүтэц, тогтолцоо нийгмийн
хэрэгцээ шаардлагыг даган байнга шинэчлэгдэж байх ёстой, шүүх ч үүнд мөн адил
хамаарна. Иймээс хүрсэн үр дүн ололт дээрээ тул­гуур­лан алдаа дутагдлыг залруу­лах
замаар шинэчлэлийг байнга хийх шаардлагатай. Нэн түрүүнд чадварлаг, ёс зүйтэй
хүний нөөцөөр шүүхийг хангадаг, шударга тогтолцоог бий болгох, шүүхийн
санхүүжилтийн өнөө­гийн тогтолцоог үндсээр нь өөрчлөх, үйлчилгээг олон нийтэд
илүү ойр­туулж, чанар, үр дүнг нэмэгдүүлэх, шүүхийн бие даасан байдлыг нь
бодитоор баталгаажуулах шаард­лагатай байна.

-Та сайн
ажиллалаа ч удирд­лагад тань байгаа хүмүүс алдаа дутагдал гаргасаар л байна.
Тэр нь шүүх муу гэсэн нэр зүүхэд хүргэдэг. Тухайлбал нэг дүүр­гийн шүүгчийн
хүүхдийн хэргийг хөөн хэлэлцэх хугацааг нь дуус­гах гэж элдэв арга саам хийсэн
тухай яригддаг. Сая Хэнтийд гар­сан үйл явдал гээд шүүгчийн нэрд цөвтэй зүйлс
цөөн­гүй гарч бай­­на. Шүүхийн ажилтны ёс зүйн талаар ямар арга хэмжээ авах вэ?

-Шүүгчийн ёс зүйн
дүрмийг 2003 онд Шүүгчдийн зөвлөлийн хуралдаа­наас баталж мөрдсөн боловч цаг
хугацааны эрхээр дээрх дүрмийн зарим заалтуудыг өөрч­лөх зайлшгүй шаардлага
байсан учир “Транс­пэрэнси-Монгол” ТББ-тай хамтарч Үндсэн хууль, бусад хуулиуд,
шүүхийн ёс зүйн талаарх Банглорын болон, Азийн бүс нут­гийн шүүхийн хараат бус
байдлын зарчмуудад нийцүүлж, шүүгчийн ёс зүйн дүрмийг шинэчлэн боловс­руулж,
2010 оны хоёрдугаар сарын 3-ны өдөр Шүүгч­дийн зөвлөлийн хуралдааны 02 дугаар
тогтоолоор, мөн шүүхийн ажилтны ёс зүйн дүрмийг Шүүхийн ерөнхий зөвлө­лийн
даргын 2009 оны 12 дугаар сарын 21-ний өдрийн 31 дүгээр захирамжаар тус тус
баталсан, өнөөдөр шүүгчид шүүхийн ажилт­нууд дээрх дүрмийг мөрдөн ажил­лаж
байна.

 Өөрөөр хэлбэл манай шүүгч, шүүхийн ажилтнууд
бүгд үйл ажил­лагаандаа баримтлах ёс зүйн хэм хэмжээтэй болсон. Ёс зүйн зөрчил
гаргасан шүүгч, шүүхийн ажилт­нуудад хариуцлага тооцдог меха­низм шүүхийн хувьд
бүрэлдсэн бөгөөд шүүгчийн хувьд Шүүхийн Сахилгын хороо, шүүхийн ажилт­нуудын
хувьд тухайн шүүхийн тамгын газар, хэлтсийн дэргэд ёс зүйн хороод  ажиллаж байна. 2010 оны 11 сараас хойш нийт
66 шүүг­чид холбогдох 53 гомдол иргэд, байгууллагаас шүүхийн сахилгын хороонд
ирүүлсэн бөгөөд найман шүүг­чид сахилгын хэрэг үүсгэн шалгас­наас долоон
шүүгчид сахил­гын арга хэмжээ авснаас хоёр шүүгчийг албан тушаалаас нь
огцруулсан байна. 

Цаашид шүүгч,
шүүхийн ажилт­нуудыг сонгон шалгаруулахад хамгийн түрүүнд анхаарах зүйл бол нэр
дэвшигч нарын зан сурта­хууны байдал бөгөөд түүнд боди­той дүгнэлт өгч,
шаардлага ханга­сан хүмүүс шүүхийн өндөр босгоор алхаж ордог төрийн албан хааг­чийн
дийлэнх олонхи нь шударга, ёс зүйтэй хүмүүс гэдэгт итгэлтэй байдаг.

-Ээжээрээ
шүүлгэж ааваараа мөрдүүлнэ гэж ярих юм. Хууль хяналтын байгууллагад гэр бү­лийн
ийм тогтолцоо бий болчих­сон юм биш үү. Үүнийг яаж өөрчлөх вэ?

-Хянан
шийдвэрлэгдэж байгаа хэргийн оролцогч нь шүүгчтэй садан төрлийн холбоотой эсвэл
шүүгч нь хэргийн оролцогчтой хувийн харь­цаатай бол шүүгч өөрөө татгалзан гарах
үүрэгтэй байдаг. Энэ зарчим прокурор, хэрэг бүртгэгч, мөрдөн байцаагчид ч
адилхан үйлчилдэг. Амьдрал дээр харж байхад хуулийн сургуульд хамт сурч байхдаа
гэр бүл болсон хүмүүс нэлээд байдаг цаашид мэргэжлийнхээ чиглэлээр буюу шүүх,
прокурор, цагдаа, өмгөөлөл гээд үйл ажиллагаа нь өөр хоорон­доо холбоо­той
байгууллагуудад ажиллах нь бий. Энэ нь эргээд олон нийтийн зүгээс элдэв
хардлага төрүүлэх үндэслэл болдгийг үгүйс­гэхгүй. Бид энэ хард­лагыг төрүү­лэхгүй
байх нөхцөлийг хангах зорилгоор шүүхийн хүний нөөцийн бодлого дээр онцгой
анхаарч, зохион байгуулалтын шинжтэй ажлуу­дыг байнга хийж байна.

-Шүүгчид
авлигаас ангид байж чадаж байна уу. Тэр энэ шүүгчид мөнгө өгсөн гэх яриа их
байдаг. Өөрийнхөө хэргийг бү­тээж байгаа болохоор үүнийг ир­гэд ил хэлэхгүй энэ
асуудал да­раг­даад өнгөрдөг гэсэн яриа бий?

-Шүүгч авлига,
ашиг сонирхлын зөрчлөөс ямагт ангид байж, зөвхөн хуульд захирагдан, шударга
ажиллах үүрэгтэй. Шүүг­чид мөнгө өгсөн, шүүгч мөнгө авсан нь тогтоогдож,
шүүхээр шийдвэрлэгдсэн хэрэг одоогоор байх­гүй боловч иймэрхүү төрлийн яриа
яагаад гараад байгаад анхаа­рал хандуулж, тодорхой арга хэм­жээ­нүүдийг авна.
Шүүгч гаргаж байгаа шийдвэрийнхээ үндэслэ­лийг хэргийн оролцогчдод дэлгэ­рэн­гүй
тайлбарлан ойлгуулж байх ёстой. Монголын шүүх авлигагүй гэсэн бат итгэл
үнэмшлийг олон нийтийн дунд бий болгохын төлөө бид хичээх болно.

 -Цаазын ялыг халах саналыг Ерөнхийлөгч
гаргасан. Үүнийг хэрэгжүүлэхэд бэрхшээл хэр байна. Жишээ нь хүнээ алуул­чихсан
хүмүүс цаазын ялыг халахыг их эсэргүүцдэг шүү дээ?

-Цаазаар авах ял
ногдуулсныг хэрэгжүүлэхгүй байх талаар гарга­сан Монгол Улсын Ерөнхийлөг­чийн
шийд­вэрийг хуульч, иргэн хүний хувьд бүрэн дэмжиж байгаа.  Хүний амийг ямар ч тохиолдолд егүүтгэж
болохгүй гэдгийг төр өөрөө үлгэрлэн харуулах ёстой юм. Энэ бол соёлт хүн
төрөлхт­ний нийтлэг жишиг бөгөөд бид ч гэсэн үүнээс гажих ёсгүй. Ерөнхий­лөг­чийн
санаачилгыг хууль хэрэглээ­ний талаас нь авч үзвэл онцгой хүндрэл байхгүй. Учир
нь Эрүүгийн хуульд ялын дээд хэмжээг сонголт­той хэрэг­лэж болохоор заасан.
Гэхдээ одоо хүчин төгөлдөр үйл­чилж байгаа Эрүүгийн хуульд зарим онц хүнд хэрэг
үйлдсэн тохиолдолд цаазаар авах ял оног­дуулах тухай заалт хэвээр үйл­чилж
байгаа тохиолдолд шүүх тухайн ялыг хэрэглэх боломж нээлттэй байна л гэсэн үг.
Монгол Улс цаашид цаазаар авах ялыг бүрмөсөн хэрэглэхгүй байх заалтыг Үндсэн
хууль, Эрүүгийн хуульд тусгах нь зүйтэй.

Нөгөө талаас
хохирогч, гэрчийн эрхийг хамгаалах асуудал дээр төрөөс онцгой анхаарах, тэдгээ­рийн
эрх зүйн баталгааг хуульчлах шаард­лага зүй ёсоор гарч байна.

 -Танайхан шүүх хараат бус гэдэг ч шүүхийг
хараат гэж үзэх нь бий. Тухайлбал Улсын Их Хурал, Засгийн газар төсвөөр
боомилох жишээтэй?

-Шүүгчийн хараат
бус, шүүхийн бие даасан байдал хэрхэн бодитой хангагдах нь шударга шүүх оршин
тогтнох үндэс, үйл ажиллагаагаа хуульд нийцүүлэн явуулах гол нөхцөл юм.
Харамсалтай нь манай улсад энэ зарчмыг хангалттай ойлгож, өргөн утгаар
хэрэгжүүлэх тал дээр хуримт­луулсан туршлага, мэдлэг харьцангуй хомс  байгаа нь үнэн. Гэхдээ бид шүүгчийн хараат
бус, шүүхийн бие даасан байдлыг хангах чиглэлээр тодорхой санал, санаачилгуудыг
гаргаж, бодитой ажлуудыг хийж байгаа. Тухайлбал таны хөндсөн шүүхийн бие даасан
байдлын нэг чухал бүрэлдэ­хүүн болох төсвийн хараат бус байд­лыг хангах тал
дээр чанарын эргэлт хийж, шүүхийн төсвийг үлдэгдлийн зарчмаар хуваарилдаг
байдлыг халах нь зүйтэй. Ингэхийн тулд шүүхийн төсвийг улсын нэгдсэн төсвийн
тодорхой хувиас буюу 1.5-аас багагүй байх, төсвийн төслийг шүүхээс шууд Улсын
Их Хуралд өргөн мэдүүлдэг байх, хэмжээг өмнөх жилийнхээс бууруулахгүй байх зэрэг
зарчмын шинжтэй шинэлэг зохицуулалтуудыг холбог­дох хуулийн төсөлд оруулахаас
гадна хуулийн зохицуулалт батал­гаатай 
хэрэгжих механизмыг хуульд суулгаж өгөх хэрэгтэй. 

-Жилд дөчин
мянган хэрэг шүүхээр шийдэгддэг гэж үзэхэд 400 гаруйхан шүүгч үүнийг хянана
гэдэг нь өөрөө боломж багатай юм шиг. Энэ талаар?

-Монгол Улсад
нийт 436 шүүг­чийн орон тоотой. Улсын хэмжээнд шүүхээр шийдвэрлэгдэж байгаа
хэрэг мар­гааны 50 хувь нь нийслэл Улаанбаатар хотод үйл ажиллагаа явуулж
байгаа шүүхүүдэд ногддог. Харин эдгээр шүүхүүдэд Монголын нийт шүүгч нарын 1/3
нь л ажил­ладаг тул нэг шүүгчид оногдох ажлын ачаалал их байдаг. Гэтэл орон
нутгийн анхан шатны шүүхүүд сум дундын гэх нэртэй боловч ихэвчлэн аймгийн болон
томоо­хон сумын төв дээр байнга байрладаг болохоор хөдөөгийн иргэд тэр болгон
шүүх дээр очиж  үйлчлүүлж  чадахгүй, эрх ашиг нь хохирч  байна. Өөрөөр хэлбэл тэнд шу­дарга ёс
хүртээмжтэй биш байна. Энэ асуудлыг шийдвэрлэх хэд хэдэн арга байна. Нэгдүгээрт
шүү­хийн өнөөгийн тогтол­цоо, зохион байгуулалтыг эргэн харж, газар нутаг, дэд
бүтцийн хөгжлийн байд­лыг харгалзан зарим аймгийн давж заалдах болон захиргааны
хэр­гийн шүүхийг нэгтгэн тойргийн жур­маар байгуулах, анхан шатны шүүхийн
хэргийн харьяаллыг заа­вал засаг, захиргааны нэгжийн хил хязгаарт
баригдалгүйгээр аль болох иргэдэд ойр дөт байхаар зохион байгуулах, сулар­сан
хүний болон санхүүгийн нөөцийг ачаа­лал ихтэй газарт шилжүүлэх, анхан шатны
шүүхийг иргэдэд илүү ойр болгох, шүүхийн үйл ажил­лагаанд орчин үеийн
мэдээллийн технологийг эрчимтэй ашиглах зэргээр шүүхийн дотоод менеж­ментийг
сайжруулах замаар шийд­вэрлэнэ. Хоёрдугаарт шүүхийн хүний нөөцийн хангамжийг
зөв тооцоолон  зохистой хэмжээнд
нэмэгдүүлэх замаар тус тус  шийд­вэрлэж
болно гэж үзэж байна.           

-Шүүх хурлаас
хэргийг нэ­мэлт мөрдөн байцаалтад буцаа­даг. Гэтэл нэг их шинэчилж өөрчлөгдөө­гүйгээр
хэрэг буцаад л ороод ирдэг шиг санагддаг?

-Сүүлийн үед
Эрүүгийн бай­цаан шийтгэх хуулийн талаар олон нийт, судлаачид, практик ажилт­нуудын
дунд нэлээд хүчтэй яриг­даж байгаа зүйл бол шүүхээс эрүү­гийн хэргийг нэмэлт
мөрдөн бай­цаал­танд буцааж байгаа асуудлын талаар юм. Шүүх хөндлөн­гийн
байгууллагын хувьд хэргийн нэг тал болох прокуророос яллах дүгнэлт үйлдээд шүүх
дээр ирсэн хэргийг хянаад яллагдагчийн гэм буруу тог­тоог­дохгүй байх
тохиолдолд түүнийг заавал яллуулах гээд бай­гаа мэт нэмэлт мөрдөн байцаал­танд
дахин буцаадаг явдал нь зарчмын хувьд зөв биш гэсэн байр суурь давамгайлж
байна. Энэ то­хиол­долд шүүх хэргийг шууд хэрэг­сэхгүй болгодог  байвал хэрэг бүрт­гэл, мөрдөн байцаах, проку­рорын
байгууллага болон шүүгч шийдвэр гаргахдаа илүү хариуц­лагатай ханд­даг
болох  ач холбог­долтой юм. 

-Сүүлийн үед
шүүхээр ший­дэгд­сэн зарим хэргийн тухайд иргэдийн хандлага харьцангуй эерэг
байгаа. Жишээ нь Ц.Жар­гал­сайханд тулгасан эх орноо­соо урвасан гэх ялыг Дээд
шүүх өөрчил­сөн нь талархал хүлээ­сэн. Гэхдээ яагаад анхнаас нь ингээд
шийдчихэж болоогүй юм бол?

-Хэрэг шүүхээр
хянан шийдвэр­лэгдэх явцад анхан шатны шүүхийн гаргасан шийдвэр, тогтоол нь
давж заалдах болон хяналтын шатанд өөрч­лөгдөх, хүчингүй болох явдал байдаг.
Хүний эрх, эрх чөлөө ханган батал­гаажуулах, шударга ёсыг тог­тоох шүүхийн үйл
явц нь их хариуц­лага шаардаж, алдаа мадаг гарах аливаа боломжийг аль болох
бага байлгах, алдаа гарсан тохиолдолд өөрийгөө засах до­тоод механизмтай
байдаг. Таны дурд­сан тодорхой хэргийн хувьд анхан шатны шүүх тухайн хэргийг
хуулиар олгогдсон өөрийн эрх хэмжээний хүрээнд хянаж шийдвэрлэснийг буруут­гах
боломжгүй бөгөөд шүүг­чийн дотоод итгэл үнэмшил юм. Ер нь бол шүүг­чийн хууль
хэрэглээний ур чадварыг  сайжруулахад  бид байнга анхаар­даг.

-Та аль аймаг,
сумын хүн билээ.

-Би Хэнтий
аймгийн Өмнөдэлгэр суманд төрсөн.

-Жалга довны
үзэл шүүхийн­хэнд байдаг уу?

-Жалга довны үзэл
гэж шүүхийн­хэнд, эсхүл шүүгчид байхгүй. Шүүгч хэрэг маргааныг хуулийн дагуу
шийд­вэрлэдэг. Хууль Монгол Улсын хэмжээнд хэрэгж­дэг, нийт ард түмний ашиг
сонирхлыг  илэрхийлдэг  тул ямар нэгэн “жалга дов”-ны  үзлээр асуудалд хандах боломжгүй. Шүүхийн
хүний нөөцийн хувьд ярьж байгаа бол шүүгч, шүүхийн ажилтны сонгон
шалгаруулалтыг бид нээлттэй зарладаг, хуулийн шаардлага ханга­сан хэн ч сонгон
шалгаруулалтанд орж нэрээ дэвшүүлэх эрх нь нээлт­тэй байдаг.

-Аль намын
гишүүн байлаа?

-Би аль нэг намын
гишүүн байгаа­гүй ээ. Шүүгч нь төрийн тусгай албан хаагчийн хувьд хууль болон
ёс зүйн дүрмийн дагуу улс төрийн үйл ажил­лагаанд идэвхтэй оролцох, аль нэг
намд харьяалагдаж болдоггүй. 

-Таны найз
нөхөд чинь элдэв хэргийг аргалуулах гэж хандах уу.  Тэр тусмаа улс төрийн хүрээнд найз нөхөд
байдаг л байлгүй. Хэрэв ханд­вал та яадаг вэ. Танилын нүүр халуун биш үү?

-Нам, улс төрийн
үйл ажилла­гаанд анхнаасаа оролцож байгаагүй болохоор  намаар холбогдсон нөхөд гэж алга. Шүүх улс
төрөөс ангид байх ёстой. Ер нь шүүгч хүн аливаа хэрэг маргааныг шийдвэр­лэхдээ
зөвхөн Үндсэн хууль болон түүнд нийцүүлэн гаргасан хуулийг баримталж, хараат
бусаар өөрийн дотоод итгэл үнэмш­лээр л шийддэг тул найз нөхдөд  найр тавих асуудал байхгүй.    

-Шүүхийг улс
төрөөс яаж ха­раат бус байлгахав. Уг нь шүүгчид өөрс­дөө асуудлаа шийдмээр бай­на.
Шу­дарга хийе гэхээр улс төр нөлөөлөх гээд байдаг гэх юм билээ. Шүүхийн
шинэчлэл яриг­даж байгаа энэ үед үүнийг ч гэсэн анхаармаар санагддаг?

-Шүүхийг улс
төрөөс, улстөрч­дөөс хараат бус байлгах тэрхүү эрх зүйн орчныг л бодитой
бүрдүүлэх хэрэгтэй. Шүүгчид хөндлөнгөөс нөлөөл­­сөн аливаа албан тушаал­танд
хариуцлага хүлээл­гэдэг механиз­мыг хуульчилж өгөх ёстой. Манай улстөрчид үүнд
өөрсдөө манлайлан оролцох ёстой гэж би боддог. Шүүх улс төрийн гар хөл болоод л
эхэлвэл энэ нь улс орны цаашдын хөгжил, иргэдийн эрх чөлөөнд аюул учруулах
нөхцөл үүснэ.

-Нямдоржийн
хар хууль Монго­лыг шоронжуулж байна гэдэг. Энэ хэр үндэстэй вэ?

-Хуулийг хэн
нэгэн хүний нэрээр нэрлэж, өнгө будгаар будах нь зохимж­гүй юм.  Гэхдээ би таны хэлэх гэсэн санааг ойл­гож
байна. Хууль зүй, дотоод хэргийн сайд Ц.Ням­доржийг өмнө нь мөн энэ албан
тушаалаа хашиж байх үед буюу 2002 онд батлагдсан Эрүүгийн хуулийн талаар ярьж
байх шиг байна. Одоогийн мөрдөгдөж байгаа Эрүүгийн хуулийг илүү боловс­ронгуй
болгох, ялыг тухайн хэр­гийн нөхцөл байдлаас шалтгаа­лан ялгамжтай ногдуулах
эрхийг шүүгч нарт олгох нь энэ байд­лаас гарах гарцын нэг гэж үздэг. 

-Хүн хорих эрх
маш олон газар байх юм. Захын цагдаа ч хүнийг хэрэг үйлдсэн үйл­дээгүйг нь л
харгалзан баривч­лах гэх юм. Тухайл­бал манай нэг сэтгүүлчээс тайлбар авна гээд
цагдаагийн нэг байцаагч очиж тайл­бар өгөх гэхээр нь барьж хорино гэж бөөн юм
болсон. Ийм олон баривчлах эрх­тэй байгууллага байх нь зөв үү?

-Ардчилсан
нийгэмд хүний эрх, эрх чөлөө хамгийн дээд үнэт зүйл байдаг. Төрийн байгуулла­гаас
хүний эрхэнд халдах үндэс­лэл холбогдох хуульд маш тодорхой заагдаж, тэр
хүрээнд нь төрийн албан хаагчид үйл ажил­лагаагаа явуулдаг байх шаард­лагатай.
Цагдан хорих таслан сэргий­­лэх арга хэмжээг одоо зөвхөн шүүгчийн зөвшөөрлөөр
авдаг бол­сон. Харин хуульд заасан үндэслэл, журмын дагуу богино хугацаанд түр
саатуулах эрх хэрэг бүртгэх, мөрдөн байцаах буюу цагдаагийн бай­гуул­лагад
байгаа бөгөөд проку­рор үүнд хяналт тавьдаг. Гүйцэт­гэх ажил­лагаатай холбоотой
зарим үйлдлийг зөвхөн шүүгчийн зөвшөөр­лөөр авдаг болох талаар ч яригдах
болсон. Энэ нь ч зөв байх. Цаашид хэрэг бүрт­гэлт, мөрдөн байцаалтын явцад
хүний үндсэн эрх, эрх чөлөө хөндөгдсөн тохиолдолд асууд­лыг зөвхөн шүү­хээр
шийдвэр­лэдэг байх журманд шилжих нь зүйтэй юм даа.

-МАХН-ыг
танайх яагаад хуга­цаанд нь бүртгэхгүй зув­чуулаад Үндсэн хуулийн Цэц рүү шил­жүүлчихэв
ээ?

-Улс төрийн намын
бүртгэ­лийг хуульд заасны дагуу Улсын Дээд шүүх хийдэг.  МАХН-ыг бүртгүүлэх тухай хүсэлтийг хуульд
заасан хугацаанд хянаж үзсэн. Хянах явцад Улс төрийн намын тухай хуулийн
тодорхой заалт Үндсэн хуульд нийцэж байгаа эсэхэд үндэслэл бүхий эргэлзээ
гарсан. Мөн энэ үед Нийслэлийн Сүхбаатар дүүргийн шүүх Монгол Ардын Намын гарга­сан
нэхэмжлэлийг хянан шийдвэр­лэх явцад Улс төрийн намын тухай хуулийн
тодорхой  заалт Үндсэн хуульд нийцэхгүй
байна гэж үзэн, хэрэг хянан шийдвэрлэх ажиллагааг түдгэл­зүүлж, саналаа УДШ-д
оруулсан юм. Эдгээр  асуудлуудыг Шүүхийн
тухай хуулийн 12 дугаар зүйлийн 12.4-т заасны дагуу Улсын Дээд шүүхийн нийт
шүүгч­дийн хуралдаанаар 2011 оны гуравдугаар сарын 24-ний өдөр хэлэл­цээд
саналыг үндэслэлтэй гэж үзсэн тул 3 дугаар тогтоо­лоор Үндсэн хуулийн Цэцэд
хүсэлт гаргаад байна. Улсын Дээд шүүхийн хүсэлтээр Үндсэн хуулийн Цэц маргаан
үүсгэсэн, энэ асуудал удахгүй шийдэгдэнэ гэж найдаж байна.

Өөрөөр хэлбэл
МАХН-ын бүртгэ­лийг Үндсэн хуулийн Цэцийн шийдвэр гартал түр түдгэлзүүлээд
байгаа.

-МАН энэ шийд­вэрийг
гарга­хад нөлөөлөв үү?

-МАН-ын зүгээс
шууд болон шууд бус хэлбэрээр Улсын Дээд шүүхийн нийт шүүгчдэд нөлөөл­сөн эсхүл
нөлөөлөхийг оролд­сон асуу­дал байхгүй. Харин олон нийтийн хэвлэл мэдээллийн
хэрэгслүүдээр дамжин санал, шүүмжлэл нэлээд хүчтэй өрнөс­нийг та бид мэдэж
байгаа шүү дээ.  Шүүх улс төрийн ч бай,
олон нийтийн мэдээллийн хэрэгслийн ч бай аливаа нөлөөнд автах учиргүй, гагцхүү
хуульд захираг­даж шийдвэрээ гаргасан.

-Сангарагчааг
албан тушаа­лаас нь түдгэлзүүлээгүй бай­хад шүүх анхан шатны хурлаа­раа шийдвэр
гаргалаа гэх юм. Одоо Улсын Их Хурал энэ асууд­лыг сөхөх гээд байгаа гэсэн.
Заавал албан тушаа­лаас нь огцруулж байж шийдэх ёстой байсан гэж үү?

-Авлигатай
тэмцэх газрын дарга болон зарим удирдах албан тушаалтнуудтай холбоо­той эрүүгийн хэрэг анхан шатны шүүхээр хянан шийдвэрлэгдсэн байгаа. Шүүх бүрэлдэхүүн хуулиар олгогдсон бүрэн эрхийн дагуу шийдвэр
гаргасныг  Дээд шүүхийн Ерөнхий шүүгч, шүүхийн Ерөнхий зөвлөлийн дарга хөндлөнгөөс “Ингэж, тэгж шийдвэрлэх ёстой
байсан” гэж тайлбарлах нь шүүхийн бие даасан, шүүгчийн хараат бус байдалд нөлөө­лөх тул боломж­гүй юм. Шүүгдэгч­дийн өмгөөлөгч анхан шатны шүүхийн шийдвэрт гомдол гаргасан гэсэн.
Тэгэхээр хуульд заасан журмын дагуу Нийслэлийн Давж заалдах шат­ны шүүх хэргийг хянаж шийдвэр­лэх байх аа.

МАН-ын Удирдах зөв­лөл Д.Зоригт
сайдыг 100 хувь хамгаална гэсэн шийд­­вэр гаргасны дараа УИХ дахь хоёр намын бү­лэг
хуралдсан юм. Ар­дын намын бүлэг үдээс хойш 17.00 цагийн үед хурлаа дуусгахад
зөрөөд АН-ын бүлэг орлоо. Тэд оройн 19.00 цаг хүртэл хуралд­сан. Энэ өдөр
МАН-ын бүлгийн хуралд цөөн хүн сууж асуудлыг хэлэл­цэхэд нэг их хугацаа зар­сангүй,
Д.Зоригт сай­дыг огцруу­лах­гүй гэж үз­жээ. Тэртэй тэргүй Удир­дах зөвлөл нь
Д.Зоригтыг хам­гаална гэ­сэн боло­хоор бүлэг уг шийдвэрийг нь үг дуугүй дагасан
бо­лолтой. Тэгээд ч бүлгийн гишүүдэд Удир­дах зөв­лө­лөөс асууд­лыг сунж­руу­лахгүй
хурдан хэ­лэл­цэж, Д.Зориг­тыг авч үл­дэнэ гэсэн чиг өгсөн бай­жээ. Нэг сайдын
асуудал ярихаар дор хаяж 14 хо­ног, цаашлаад 21 хоно­гийн ажил болно. Богино
хугацаа үлдсэн үед ийм зүйл дээр цаг алдах ёсгүй гэж тус на­мынхан үзжээ.

Түүнчлэн
МАН-ын Удир­­дах зөвлөлийн за­рим гишүүн Эрдэс бая­лаг, эрчим хүчний сайдыг огц­руулах санал өргөн барь­сан АН-ын бүлгийн
гурван гишүүний нэгтэй
уулзаж “Та нар Засгийн газрын ганц сайдыг огц­руулах асуудал ярьж бай­гаад
яваан­­даа Хамтар­сан Зас­гийн газраас на­маа салгах юм биш биз дээ. Сонгууль дөхөж бай­гаа үед
та нар биднээс сал­чихвал манай нам алуул­на шүү
дээ” хэ­мээн хэлсэн удаа ч бий гэнэ. Ардын намын бүлэг ганц сайдыг огцруулах нь хам­тарсан Засгийн
газ­рын байр суурь ганхахад хүр­гэ­нэ
гэж эмээж байгаа уч­раас яаж ч байсан хоёр намын бүлэг, намын дар­га нар Д.Зоригт сайдыг хамгаалж
авч үл­дэ­хээр болсон
бололтой. МАН-ын бүлэг
Оюу тол­гой, Та­ван толгой гэх мэт­чи­лэн бүтээн
бай­гуу­лал­тын асууд­­­лаар бүлгийн
дүг­нэлт гаргахаар
тогтоол үйлдсэн  байна.

ТӨР БАРИЛЦАХ АЛТАН БОЛОМЖОО АЛДМААРГҮЙ
БАЙГААГАА АН-ЫНХАН ИЛЭРХИЙЛЖЭЭ

Харин АН-ын бүлгийн хуралд 20
гишүүн сууж Эрдэс баялаг, эрчим хүч­ний сайд Д.Зоригтыг огцруулахгүй гэж үзжээ.
Д.Зоригт сайдыг огцруу­лах саналыг анх гаргасан тус бүлгийн гурван ги­шүүн
Д.Зоригт сайдыг хамгаалсан гишүүдтэй нэлээд ширүүхэн марга­сан бололтой, хурал
сун­жирч нэлээд удсан юм.  Эцэст нь санал
хураахад З.Энхболд, С.Эрдэнэ, Г.Баярсайхан, Д.Ганхуяг, Д.Одхүү, Н.Батбаяр,
Лу.Ган­төмөр, Р.Амар­жар­гал нарын 
найман ги­шүүн Д.Зоригт сайдыг огцруулъя гэсэн санал өгчээ. Үлдсэн
Ц.Баяр­сай­хан, Я.Батсуурь, С.Лам­баа, Д.Зоригт, Л.Ган­сүх, Л.Болд, Г.Батхүү,
С.Баяр­цогт, П.Ал­тангэ­рэл, Ч.Сай­­ханбилэг, Д.Кёкүш­юү­зан Батбаяр, Н.Ал­танхуяг
нарын арван хоёр гишүүн түүнийг авч үл­дэхээр болсон байна. Хам­тар­сан Засгийн
га­зарт орж ажиллаж, төр барил­цах болсон болом­жоо алд­маар­гүй, “алтан
өндгөө” хагалмааргүй байна гэд­гээ тэд илэр­хийлсэн гэнэ. Бүлгийн хурлын дараа
Эдийн зас­гийн байнгын хороогоор уг асуудлыг оруулж, УИХ-ын чуулганаар
хэлэлцэнэ гэсэн төлөвлөгөөтэй бай­сан юм. Гэвч цаг орой болж тус байнгын хороо­ны
гишүүдийн ирц бүр­дэхгүй учир хурлыг хойш­луулав.

Я.МӨНГӨНЦЭЦЭГ