DNN

Нийслэлийн удирдлагын зөвлөлийн ээлжит хуралдаан 05 сарын 22-ны өдөр болж, “Хан-Уул дүүрэгт төлөвлөгдсөн сургууль, цэцэрлэгийн байршил”-ын талаар танилцууллаа.

Хуралдаанд асуудлыг  Улаанбаатар хотын Ерөнхий архитектор бөгөөд нийслэлийн Ерөнхий төлөвлөгөөний газрын дарга Н.Нацагдорж танилцуулж, Хан-Уул дүүргийн Засаг дарга Ж.Ганхуяг оролцлоо.

Нийслэлийн 2014 оны газар зохион байгуулалтын төлөвлөгөөнд Хан-уул дүүрэгт сургууль, цэцэрлэгийн зориулалтаар нийт дараахь 9 байршилд 10,9 га газрыг олгохоор тусгажээ. Үүнд:

                                                                     

                                                     Сургууль, цэцэрлэгийн цогцолбор

-Хан-Уул дүүргийн 4-р хороо “Ар Ий Си” ХХК-ийн эзэмшил газарт тус компанитай зөвшилцөж шийдвэрлэхээр 1,1 га газар

-Хан-уул дүүргийн 4-р хорооны гэр хорооллын дахин төлөвлөлтийн талбайд 1,8 га газар /Төлөвлөсөн газар нь бусдын эзэмшилд олгогдоогүй/

-Хан-Уул дүүргийн 6-р хороо “Петровис” ХХК-ийн эзэмшил газарт тус компанитай зөвшилцөж шийдвэрлэхээр  1,1 га газар

-Хан-Уул дүүргийн 8-р хороо, дахин төлөвлөлтийн дагуу Сэргээгдэх эрчим хүчний Үндэсний төвийн эзэмшилд байгаа газарт тус төвтэй зөвшилцөж 1 га газар

– Хан-Уул дүүргийн 16-р хороо, Буянт-Ухаа хорооллын хэсэгчилсэн ерөнхий төлөвлөгөөний дагуу Чин тэнхлэг ХХК-тай байгуулсан гэрээт газарт сургууль, цэцэрлэг барихаар 3,5 газар

– Хан-Уул дүүргийн 16-р хороо, Буянт-Ухаа хорооллын хэсэгчилсэн ерөнхий төлөвлөгөөний дагуу дэвшилт ХХК-тай зөвшилцөж 1,8 га газарт сургууль

                                                                 

                                                                      Цэцэрлэг

– Хан-Уул дүүргийн 16-р хороо, Буянт-Ухаа хорооллын хэсэгчилсэн ерөнхий төлөвлөгөөний дагуу Монзун лунхай ХХК-ийн эзэмшил газарт тус бүр 0,2 га газарт 3 цэцэрлэг барихаар тусгажээ.

  Харин өнөөдрийн байдлаар дээрх 9 байршлаас 5 байршилд баригдах сургууль, цэцэрлэгийн газрыг шийдвэрлээд байна.“Ар Ий Си” ХХК, “Монзун лунхай” ХХК, “Цац үйлс” ХХК-тай  зөвшилцөж нийт 4 байршлын 3,44 га газрыг сургууль, цэцэрлэгийн зориулалтаар Нийслэлийн Боловсролын салбарт шилжүүлэхээр болсон бол Хан-Уул дүүргийн 4 дүгээр хорооны гэр хорооллын дахин төлөвлөлтийг хэрэгжүүлэгч ТОСК-тай зөвшилцөж 0,79 га газарт сургууль, цэцэрлэгийн барилгыг төлөвлөж төлөвлөлтөд тусгасан байна. Мөн “Чин тэнхлэг” ХХК-ийн газарт нийслэлээс орон сууцны хороолол барихаар төлөвлөж зураг төслийн ажил хийгдэж байна.

Харин үлдсэн 4 байршил нь нийслэлийн Засаг даргын захирамжаар газар эзмшиж байгаа “Петровис” ХХ, Сэргээгдэх эрчим хүчний үндэсний төв, “Монсуль” ХХК-ийн эдэлбэр газарт төлөвлөгдсөн тул дээрх компаниудын төлөвлөлтөд нь сургууль, цэцэрлэгийг тусгаж шийдвэрлэх, эсвэл эзэмшил газраас нь шилжүүлж авах асуудлаар шийдвэрлэх шаардлагатай байгаа гэж нийслэлийн Ерөнхий архитектор Н.Нацагдорж хэллээ. Хан-уул дүүргийн Засаг дарга Ж.Ганхуяг “Ирэх жил он дамжин барихаар төлөвлөж байгаа сургууль, цэцэлэгийн газрын асуудлыг энэ жил шийдээд өгчихвөл дараа жилийн төсөвт тодорхой хөрөнгө тусгаж, хугацаа алдалгүй барих боломжтой болно” гэж онцлон хэлсэн юм.

Жил бүр Улс, Нийслэлийн төсөвт сургууль, цэцэрлэгийн зөвхөн барилга барих хөрөнгийг тусгадаг. Харин газар чөлөөлөлтөөс шалтгаалан зардал нэмэгдэх, хугацаа алдах тохиолдол цөөнгүй байдаг.  Тиймээс энэ эрсдэлийг тооцоолон шийдвэрлүүлэхээр Хан-Уул дүүргээс нийслэлд санал хүргүүлж байгаа нь цагаа олсон ажил гэдгийг Нийслэлийн удирдлагын зөвлөлийн гишүүд онцолсон юм. Хуралдаанаар дээрх компаниудтай зөвшилцөж, газрыг шийдвэрлэх үүргийг холбогдох албаныханд өглөө. Мөн бусад дүүргийн удирдлагууд энэ санаачилгын дагуу ажиллаж, сургууль, цэцэрлэгийн газрыг урьдчилан тооцоолж, бэлэн болгох хэрэгтэй гэсэн юм гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ. 

“Тамхины татварыг нэмэгдүүлэх замаар хэрэглээг бууруулах боломж” сэдэвт хэлэлцүүлгийг ирэх даваа гаригт Төрийн ордны Иргэний танхимд зохион байгуулах гэж байна. Манай улсад 2013 онд явуулсан Халдварт бус өвчний эрсдэлт хүчин зүйлийн тархалтын судалгаагаар тамхины хэрэглээ хот суурин газрын хүн амын -29 хувь, хөдөөгийн хүн амын -25.4 хувь, хот суурин газрын эмэгтэйчүүдийн 8.6 хувь тамхи хэрэглэдэг нь хөдөөгийн эмэгтэйчүүдээс бараг дөрөв дахин их байгаа нь тогтоогджээ. 2013 онд явуулсан Дэлхий дахины сургуульд суурилсан эрүүл мэндийн судалгаагаар сурагчдын 22.0 хувь тамхи татаж үзсэн байна. Тамхи татаж үзсэн нийт сурагчдын 61.4 хувь нь 14 наснаасаа өмнө тамхи татаж үзсэн байжээ. Үүнд эрэгтэй сурагчид эмэгтэй сурагчдаас илүү (65.4%), хөдөөгийн сурагчид (62.7) хотын сурагчдаас (60.3) хувь илүү байв.

Ажлын байранд дам тамхидалтад өртөх байдал нийт хүн амын дунд – 25.5 хувь , үүнээс эрэгтэйчүүдийн 31.9 хувь нь ажлын байрандаа дам тамхидалтад өртөж байна.

Манай улсад тамхинаас үүдэлтэй өвчин эмгэг хүн амын өвчлөл, нас баралтын үндсэн шалтгаан болж, сүүлийн 10 жилд зүрх судасны эмгэгээр нас барах явдал 2 дахин нэмэгдэж, нас барж байгаа 3 хүн тутмын нэг нь зүрх судасны эмгэг, 5 хүн тутмын нэг нь хавдрын улмаас эндэж байгаа гэсэн судалгаа байдаг аж. Тиймээс тамхины хэрэглээг бууруулах зайлшгүй шаардлага тулгарч байгаа. Харин ингэхийн тулд тамхины татварыг нэмэгдүүлдэг олон улсын туршлага байдаг аж. 

 Хямд үнэтэй “Буянт-Ухаа 1” хорооллын сугалаанд нийт 1545 иргэн азтан болсноос өнөөдрийн байдлаар 1300 гаруй иргэд орон сууцныхаа сонголтыг хийжээ. Тэгвэл 300 гаруй иргэд орон сууцны урьдчилгаа төлбөр 30 хувийг төлж сонгосон байраа баталгаажуулсан байна. Урьдчилгаа төлбөрөө төлсөн иргэд энэ сарын 26-ны өдрөөс эхлэн Төрийн орон сууцны корпораци дээр өөрийн биеэр ирж орон сууцны захиалгын гэрээг байгуулах боломжтой юм. Иргэд гэрээ байгуулахдаа албан газрын тодорхойлолт, нийгмийн даатгалын дэвтэр (эх хувиар) заавал авчрах ёстой бөгөөд байраа сонгосон иргэд 10 хоногийн дотор урьдчилгаа төлбөрийг төлөхийг анхааруулж байгаа аж.

 “Хот байгуулалт ба Сингапурын туршлага” сэдэвт семинар ирэх сарын 18-21-ний өдрүүдэд Улаанбаатар хотод болох юм байна. Уг семинарыг Барилга, хот байгуулалтын яам, нийслэлийн Засаг даргын Тамгын газар, Төрийн орон сууцны корпораци, Барилгын хөгжлийн төв, Зураг төсөл, эрдэм шинжилгээний институт хамтран  зохион байгуулж байгаа аж.

аСеминарт Сингапур улсын  Үндэсний хөгжлийн сайд асан, Парламентын гишүүн Ма Бо Тан болон Сингапурын Орон сууцны хөгжлийн зөвлөл, Сингапурын Амьдрах таатай хотууд төв, Сингапурын Барилга, бүтээн байгуулалтын удирдах газар, Сурбана зураг төслийн компанийн төлөөлөгчид урилгаар оролцож, илтгэл тавих юм. Мөн энэ үеэр Сингапур хороолол барих төслийн талаар хэлэлцэх ажээ. 

 Ерөнхийлөгчийн зарлигаар цагдаагийн хувцасны шинэ загварыг баталсан. Үүний дагуу өнгөрөгч сараас цагдаагийн албан хаагчдад шинэ загварын хувцас өмч үүргээ гүйцэтгэж эхэлсэн. Нийт 7000 гаруй албан хаагчийн дүрэмт хувцсыг Турк улсад хийлгэсэн нь үндэсний үйлдвэрлэлээ дэмжсэнгүй хэмээн ард иргэд шүүмжилж байсан.

Харин цагдаагийн албан хаагчдын өвлийн хангалтад өгөх гутлыг үндэсний “Хос аз” компанид үйлдвэрлэж байгаа аж. Тэд алба хаагчдын өвөл өмсөх гутлыг үхрийн ширэн арьсаар, гурван давхар цэвэр хонины ноосон улавчтайтайгаар хийж буй гэнэ. Түүнчлэн цагдаагийн алба хаагчдын шинэ агсамж буюу жижиг хэрэглэлийн савыг үндэсний үйлдвэрлэгч “Мэргэн тур” компанид үйлдвэрлэж байгаа тухай ЦЕГ-аас мэдээллээ.

Энэ сарын 26-нд МҮХАҮТ-д “Монгол Австрийн бизнес уулзалт” болох юм байна. Монгол Австрийн Эдийн засгийн танхимаас уг арга хэмжээг зохион байгуулж байгаа гэнэ. Бизнес уулзалтад Австрийн 20 гаруй бизнесийн төлөөлөгчид оролцох ажээ. Тодруулбал, барилга болон дэд бүтэц, эрчим хүч, барилгын материалын тоног төхөөрөмжийн худалдаа, барилга үйлдвэрлэлийн технологи болон техникийн зөвлөгөө, техникийн эд анги нийлүүлэх, гал унтраах багаж хэрэгсэл, машин үйлдвэрлэлээр дэлхийд тэргүүлэгч “Rosenbauer”, Австрийн “Unicredit” банк зэрэг бизнесийн төлөөлөгчид оролцох юм байна.

Хүүхдийн оюун ухааныг хөгжүүлж тэлэх аргуудыг шинжлэх ухаанаар баталжээ. Ингээд доорх арван аргыг эцэг эхчүүд хүүхдийнхээ төлөө алхам тутамдаа санаж, хэрэгжүүлэхэд илүүдэхгүй. 

     1.   Хөгжмийн хичээл

Хөгжмөөр хичээллэдэг хүүхдүүдийг хичээллэдэггүй хүүхдүүдтэй харьцуулахад IQ илүүтэй байгаа нь илэрчээ. Ер нь хөгжим хүүхэд төдийгүй бүх насныхны тархины ажиллагаанд тустай.

     2.   Дасгал хөдөлгөөн

Дасгал хөдөлгөөн байнга хийж биеийн зөв хөгжилтэй байх нь тархийг бас хөгжүүлдэг. Судалгаагаар дасгал хийсний дараа хүмүүс шинэ үгсийг 20 хувь нь хурдан цээжилж байжээ.

Гурван сар тогтмол дасгал хийсний дараа тархины ой тогтоомжийн хэсэгт цусан хангамж нэмэгдсэнээр суралцах чадвар 30 хувь өссөн нь тогтоогдсон.

     3.   Уншиж өгөх бус түүнтэй хамт унш

Уншиж сураагүй хүүхдэд зөвхөн ном уншиж өгөх нь үд дүнгүй. Харин зэрэгцэж унших буюу уншиж байгаа үгнүүдэд хүүхдийнхээ анхаарлыг хандуулбал цаашдаа хурдан уншиж сурдаг гэнэ.

     4.   Нойр дутагдал хүүхдийг тэнэг болгодог

Нэг цагийн дутуу нойр VI ангийн хүүхдийг IV ангийн хүүхэд шиг болгодог.

Нэгэн эрдэмтний хэлснээр “нэг цагийн дутуу нойр хоёр жил юу ч суралцаагүй, таньж мэдээгүй өнгөрөөсөнтэй тэнцэнэ” гэжээ. Тиймээс хүүхдийг сайн унтуулж амрааж байх нь маш чухал.

     5.   Хувийн сахилга батгүй бол өндөр IQ-ийн хэрэг байхгүй

Хэчнээн оюуны өндөр хөгжилтэй байлаа ч хувийн сахилга бат, зохион байгуулалтгүй бол амьдралд амжилт олохгүй. Тиймээс хүүхдийнхээ сахилга бат, хувийн зохион байгуулалтанд онцгой анхаарах хэрэгтэй.

     6.   Суралцах бол идэвхтэй процесс

Аливаа зүйлийг сурахад сонсох хангалтгүй. Харин хийж үзэж суралцвал тархи илүү сайн хүлээж авдаг. Үүнд гуравны хоёрын зарчим чухал. Өөрөөр хэлбэл суралцахдаа 30 хувьд нь уншиж, 70 хувьд нь дасгал хийж  шалгаж байх нь зөв.

     7.   Зөв цагт баярлуулах

Судалгаагаар кофейн болон чихэр нь тархийг идэвхжүүлдэг нь батлагдсан. Тиймээс хүүхдээ хичээл хийж байхад нь эсвэл түр завсарласан үед нь амттан өгч баярлуулбал том шагнал болохоос гадна тархины ажиллагааг нь идэвжүүлнэ.

     8.   Аз жаргалтай хүүхэд амжилт авчирна

Сэтгэл дүүрэн, аз жаргалтай өссөн хүүхэд том болоод ажил амьдралдаа мөн амжилттай байдаг. Үүний үндэс нь аз жаргалтай гэр бүл, эцэг эх. Тиймээс хүүхдийнхээ ирээдүйг бүтээхээ өөрсдөөсөө эхлэх хэрэгтэй.

     9.   Хүрээллийн асуудал

Хүүхдийн тань суралцах чадвар хамт сурдаг, хамт дотуур байрны өрөөнд суудаг хүүхдүүдээс бас хамаардаг. Судалгаагаар сурлага муутай хүүхдийг сайн сурлагатай хүүхэдтэй нэг өрөөнд хэсэг амьдруулахад оюуны чадвар нь нэмэгдсэн үр дүн гарчээ.

    10.  Тэдэнд итгэл үзүүл

Хүүхдээ бусдаас ухаалаг гэдэгт итгэж байгаагаа харуулбал хүүхдийн тань суралцах чадвар нэмэгддэг. Судалгаагаар эрдэмтэд нэг ангийн хүүхдүүдээс санамсаргүйгээр хэсэг хүүхэд сонгоод тэднийг онцлон бусдаасаа илүү суралцах чадвартай болохыг нь дуулгажээ. Үүнээс өөр ямар ч арга хэмжээ авсангүй орхисон байна. Харин хичээлийн жил дуусахад нь шалгахад тэдний 30 хувийнх нь IQ 22 оноогоор нэмэгдэж, бусад нь доод тал нь 10 оноогоор ахисан байжээ.

 Улсын Их Хурлын Тамгын газрын Мэдээллийн технологийн хэлтэс найм дахь жилдээ зохион байгуулагдаж буй  “IСT-Экспо 2014” үзэсгэлэнд оролцож байна.

Монгол Улсад “Орчин цагийн харилцаа холбооны салбар үүсч хөгжсөний 93 жил”-ийн ой болон “Цахилгаан холбоо, мэдээллийн нийгмийн Дэлхийн өдөр”-ийг тэмдэглэн өнгөрүүлэх ажлын хүрээнд Мэдээллийн технологи, шуудан, харилцаа холбооны газраас зохион байгуулж буй энэхүү үзэсгэлэнд Улсын Их Хурлын Тамгын газрын Мэдээллийн технологийн хэлтэс анх удаа оролцож байгаа юм.

Энэ удаагийн “IСT-Экспо 2014” үзэсгэлэн “Дэвшилтэт технологи-Ухаалаг хэрэглээ” уриан дор явагдаж байгаа бөгөөд Улсын Их Хурлын Тамгын газрын  Мэдээллийн технологийн хэлтсийн мэргэжилтнүүд Олон улсын парламентын холбоонд бүртгэлтэй, Улсын Их Хурлын албан ёсны www.parliament.mn болон Улсын Их Хурлын хууль тогтоох үйл ажиллагааны холбогдолтой бүхий л мэдээ, мэдээллийг олон нийтэд хүргэдэг open.parliament.mn, мөн  хүчин төгөлдөр мөрдөгдөж байгаа  эрх зүйн актуудыг он, үсгийн дарааллаар эрэмбэлэн үзэх боломжтой LawsMN, ТҮЦ машины “Улсын Их Хурал“ модуль гээд таван аппликейшн программ, гурван үндсэн цахим хуудастай оролцож байна.

ТҮЦ машины программ хангамжид шинээр нэмж хийсэн “Улсын Их Хурал“ модуль нь Улсын Их Хурлын гишүүний мэдээллийн хэсэгтэй бөгөөд Нийслэл төдийгүй аймгуудад байрлах ТҮЦ машинуудын нүүр хуудсанд тухайн тойргоос сонгогдсон Улсын Их Хурлын гишүүдийн мэдээллийг ил байрлуулжээ.

Улсын Их ХурлынТамгын газар 100 гаруй цахим хуудастай бөгөөд энэ удаагийн үзэсгэлэнд www.parliament.mn, open.parliament.mn khural.mn гэсэн үндсэн гурван цахим хуудастай оролцож байгааг Улсын Их Хурлын Тамгын газрын Мэдээллийн технологийн хэлтсийн дарга Ж.Элбэгзаяа онцлов.

Мөн Олон улсын парламентын холбоонд бүртгэлтэй, Улсын Их Хурлын албан ёсны www.parliament.mn цахим хуудасны бүх төрлийн ухаалаг гар утсанд зориулсан хувилбар болох ParliamentMn аппликейшн программыг үзэсгэлэн сонирхогчдод танилцуулж байгааг нэмж хэлсэн юм.

“Мишээл Экспо” төвийн үзэсгэлэнгийн танхимд болж буй “IСT- Экспо 2014” үзэсгэлэн энэ сарын 26-ний өдрийг дуустал үргэлжилнэ хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.