Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч П.Сайнзориг Улаанбаатар хотод үйл ажиллагаа явуулж буй зочид буудлууд болон Монголын зочид буудлын холбооны төлөөллийг хүлээн авч уулзлаа.
Энэ үеэр төр, хувийн хэвшлийн түншлэлийн хүрээнд аялал жуулчлалыг хөгжүүлэх, үйлчилгээг сайжруулах, тулгарч буй асуудал, шийдлийн талаар санал солилцов.
Нийслэлийн хэмжээнд 237 зочид буудал үйл ажиллагаа явуулдаг. Тус салбарын эрүүл ахуй, аюулгүй байдал, тохижилт, хоол хүнсний үйлчилгээнд шинэчлэл хийх шаардлагатай байгаа юм.
Нийслэлийн Засаг даргын нэгдүгээр орлогч П.Сайнзориг “Монгол Улсыг зорин ирж буй жуулчдын сэтгэл ханамжийг нэмэгдүүлэхэд төр, хувийн хэвшлийн хамтын идэвх, оролцоо чухал байна. Дэлхийн олон хотод нэвтэрсэн буухиа буюу шуурхай автобусны үйлчилгээг төр, хувийн хэвшлийн түншлэлийн хүрээнд нэвтрүүлэх, тогоочдын ур чадварыг сайжруулах зорилгоор олон улсын сургалтад хамруулах, тохижилт, бүтээн байгуулалтыг сайжруулахад хамтран ажиллахад бэлэн байна. Улаанбаатар хотын өнгө үзэмж хийгээд түүх, ёс заншлыг харуулсан “City Tour” буюу хотын нэг өдрийн аяллыг зохион байгуулахад хүндрэл бэрхшээл их гардаг. Иймд жуулчдад зориулсан гудамж, талбайг нэмэгдүүлэх, үзвэр үйлчилгээг шинэчлэх шаардлагатай байна. Мөн нийтийн эзэмшлийн зам, талбайн гэрэлтүүлгийг сайжруулахад онцгойлон анхаарч ажиллах болно” гэсэн юм.