Сингапур улсад энэ сарын 14-18-нд болох 25 дахь удаагийн Ой тогтоолтын дэлхийн аварга шалгаруулах оюуны спортын тэмцээнд эх орноо төлөөлөн Монголын Оюун Ухааны Академийн 23 тамирчин /10-24 нас/, багш дасгалжуулагч нарын хамт оролцоно.
Энэ удаагийн тэмцээний багийн бүрэлдэхүүнд 2016 оны улсын аваргын тэмцээнд амжилттай оролцсон Дархан-Уул болон Орхон аймгийн тамирчид багтаж байна.
Тэмцээнд 60 орны 200 тамирчин харааны болон сонсголын ой тогтоолтын үндсэн 10 төрлөөр бага, өсвөр, насанд хүрэгчдийн ангилалд өрсөлдөж шилдгүүдээ тодруулах юм.
2011 онд тус тэмцээнд багаараа оролцсоноос хойш Монголын баг тогтмол эхний гуравт орсон билээ.
Дашрамд дурдахад, одоогоор Монголын тамирчид Америк, Швед, Их Британи, Хятад, Энэтхэг, Тайвань, Малайз зэрэг олон улсын оюуны спортын 40 тэмцээнд оролцож 539 медаль хүртэн дэлхийн дээд амжилтыг шинэчлэн тогтоосоор байна.