Саяхан хэвлэлээр Оюу толгой компанийн Үйлдвэрчний эвлэлээс Рио Тинто группийн Монгол дахь захирал Х.Амаржаргалд хандан хариу шаардсан нэгэн захидал нийтлэгдсэн билээ.
Захидлын хариу болгож Х.Амаржаргал ажилтнуудын Үйлдвэрчний эвлэлдээ захидал илгээжээ. Захидалд “Оюу толгой төслийн зардлын хэтрэлт, хугацаа хойшилсон асуудлаар “Хөндлөнгийн Шинжээчдийн Баг” (цаашид “ХШБ” гэх)-ийн боловсруулсан дүгнэлтэд Рио Тинто компаниас хүргүүлсэн албан бичигт дурдсан хариу байр суурийг өрөөсгөл байдлаар эшилж мэдээлэгдсэнд та бүхэн санаа зовниж байгаагаа илэрхийлжээ. Үүнд бид мөн адил харамсаж байгаа бөгөөд Оюу толгой төслийн удирдлагын багтай хамтран энэ талаар ярилцах уулзалтыг зохион байгуулах нь зөв зүйтэй болов уу. Рио Тинто компанийн хувьд Оюу толгойн ажиллах хүч аюулгүй ажиллагаа, бүтээмж болон бусад олон чиглэлд дэлхийд тэргүүлэх хэмжээнд тогтмол ажиллаж ирсэнд үргэлж бахархдаг. Үүнийгээ ч бид өмнө нь олон удаа илэрхийлж байсан билээ. Энэ удаад мөн адил Үндэсний боловсон хүчний нөөцтэй байх олон сайн талын нэг нь “Ковид-19” цар тахлын нөлөөг уурхайн үйл ажиллагаанд, төслийн явцад бууруулж чадсан ач холбогдолтой хэмээн тодотгосон юм. Албан бичигт зардлын хэтрэлт, хугацаа хойшлоход нөлөөлсөн олон хүчин зүйлийг хШБ дутуу үнэлсэн талаар дурдсан. Үүнд Рио Тинто ажиллах хүчнээ буруутгахыг огт зориогүй гэдгийг цохон тэмдэглэмээр байна” гэжээ.
Захидалтай холбоотойгоор Рио Тинто группийн Монгол дахь захирал Х.Амаржаргал Оюу толгойн ажилтнууддаа дэлгэрэнгүй тайлбар хийх уулзалтыг зохион байгуулах ажээ.