Өнөөдөр ОХУ-д “Оросын өдөр” үндэсний баяр тохиож байна. 1990 оны зургадугаар сарын 12-нд Зөвлөлт Социалист Бүгд Найрамдах Холбооны Орос улсын ардын депутатын их хурал Орос улсын төрийн бүрэн эрхийн тухай тунхаглалыг баталж байжээ. Энэ үйл явдлаас хойш жилийн дараахи мөн өдөр тус улсын түүхэнд анх удаагаа Ерөнхийлөгчийг сонгох бүх ардын сонгууль болж байжээ.
Энэ өдрийг 1992 онд баярын өдөр болгосон бөгөөд 1994 онд үндэсний баяр болгон зарлажээ. Харин тус баярыг 2002 онд “Оросын өдөр” гэж нэрлэсэн байна.
Энэ баярын өдөр Оросын хотуудад үндэсний баяр наадам, тоглолтууд болон спортын арга хэмжээнүүд болдог. Түүнчлэн шинжлэх ухаан, технологи, урлаг утга зохиол болон хүмүүнлэгийн салбарт ололт амжилт гаргасан хүмүүст төрийн шагнал гардуулдаг байна.
“Оросын өдөр” баярыг тохиолдуулан өнөөдөр Умард Солонгосын удирдагч Ким Жөн Ун болон АНУ-ын Төрийн нарийн бичгийн дарга Майк Помпео нар Оросын ард түмэнд баярын мэндчилгээ дэвшүүлсэн байна.