ДЭМБ-ын Номхон далайн баруун бүсийн Эрүүл мэндийн тогтолцооны хөгжлийн газрын дарга, зохицуулагч нар үргэлжлүүлэн орон нутгийн эрүүл мэндийн байгууллагуудтай хийх цахим хурал хийлээ. Цахим хурлыг Эрүүл мэндийн дэд сайд Л.Бямбасүрэн ахлан явууллаа. Монгол улсын Тогтвортой хөгжлийн зорилтууд, Төрөөс эрүүл мэндийн талаар баримтлах бодлого, хэрэгжүүлж байгаа үйл ажиллагаа, цаашдын зорилт болон ДЭМБ-ын дэмжлэгтэйгээр орон нутагт амжилттай хэрэгжиж байгаа зарим үйл ажиллагаанаас товч танилцууллаа. Үүнд орон нутгийн эрүүл мэндийн тогтолцоог бэхжүүлэх хөтөлбөрийг 2013 оноос эхлэн Сонгинохайрхан дүүрэг, Өмнөговь аймагт хэрэгжүүлсэн нь үр дүнгээ өгч, улмаар бусад аймаг, дүүрэгт орон нутгийн эрүүл мэндийн тогтолцоог бэхжүүлэх, Хэнийг ч орхигдуулахгүй байх хандлага нэвтрүүлэхэд зөвхөн сонгогдсон аймаг, дүүргээс гадна улсын хэмжээний, бүсчилсэн сургалт зохион байгуулж, олон улсын байгууллага, салбар хоорондын оролцоог хангаж ирсэн бөгөөд сонгогдсон анхан шатны эрүүл мэндийн байгууллагад Мобайл эрүүл мэнд төслийг хэрэгжүүлж байна.
Монгол улсын Засгийн газар “Төрөөс эрүүл мэндийн талаар баримтлах бодлого”-ыг батласан бөгөөд уг бодлогыг орон нутагт хэрэгжүүлэх дэд хөтөлбөрийг эрүүл мэндийн тогтолцоог бэхжүүлэх стратегитэй уялдуулан боловсруулж орон нутгийн дэд хөтөлбөрийг нийслэл, аймгийн Иргэдийн Төлөөлөгчдийн Хурлын Тэргүүлэгчдийн тогтоол болон Засаг даргын захирамжаар батлуулан хэрэгжүүлэн ажиллаж байна.
Монгол улсын Засгийн Газрын 2017 оны 12-р сарын 13-ны өдрийн 344 дүгээр тогтоолоор Эрүүл мэндийн сайдын эрхлэх асуудлын хүрээнд Засгийн газрын хэрэгжүүлэгч агентлаг – Эрүүл мэндийн даатгалын ерөнхий газрыг байгуулах асуудлыг баталсан. Үүнтэй холбоотойгоор эрүүл мэндийн даатгалын хариуцлагатай, үр ашигтай байгууллага бий болгох, иргэдээ санхүүгийн эрсдэлээс хамгаалах, улсын төсвийн санхүүжилтийг Эрүүл мэндийн даатгалаар дамжуулан санхүүжүүлэх, стратегийн худалдан авалтын тогтолцоонд шилжих зэрэг олон асуудал бидний өмнө тулгараад байна. Энэ үед Эрүүл мэндийн сайдын хүсэлтээр манай оронд ДЭМБ-ийн бүсийн төлөөлөгчид айлчлан ажиллаж байгаа нь маш чухал ач холбогдолтой арга хэмжээ болж байгааг онцоллоо.