Хүүхдийг зам тээврийн ослоос урьдчилан сэргийлэх зорилготой “Санитас-54” хөтөлбөрийг хэрэгжүүлж эхэллээ.
Хөтөлбөрийг Замын цагдаагийн газар, нийслэлийн Боловсролын газар хамтран хэрэгжүүлж байгаа аж. Энэ талаар замын цагдаагийн газраас мэдээлэл өглөө. Дашрамд өгүүлэхэд энэ оны эхний гурван сарын байдлаар улсын хэмжээнд найман хүүхэд зам тээврийн ослын улмаас энджээ. Түүнчлэн 37 хүүхэд гэмтэл авсан байна. Харин өнгөрсөн оны эхний улиралд 10 хүүхэд нас барж, 44 хүүхэд гэмтэж байсан аж. Энэ оны үзүүлэлт буурсан дүнтэй гарч байгаа ч энэ нь хангалттай хэмжээ биш гэдгийг ЗЦГ-ын Олон нийттэй харилцах тасгийн ахлах, цагдаагийн хошууч Ж.Энхбат хэлж байна.
Улсын хэмжээнд 2015 онд 1143 хүүхэд зам тээврийн осолд өртсөний 54 нь нас барж, 1089 нь гэмтэж, бэртжээ.