“Рио-2016″ олимпийн наадам эхлэхэд 17-хон хоног үлдлээ. Монголын жүдо бөхийн үндэсний шигшээ багийн дасгалжуулагч О.Балжиннямаар ахлуулсан 60 гаруй тамирчид “Рио-2016” олимпийн бэлтгэлээ Хандгайтад байрлах “Монголын үндэсний олимп” цогцолборт базааж байгаа аж.
Өнөөдөр Биеийн тамир, спортын хөгжлийн төвийн дарга Д.Жаргалсайхан тэдний бэлтгэлтэй танилцаж “Mizuno” брэндийн цагаан, цэнхэр өнгийн жүдогийн өмсгөл гардуулжээ.
“Рио-2016” олимпийг зорих тамирчид ёслолын, бэлтгэлийн, тэмцээний гэсэн гурван төрлийн хувцастай явах бөгөөд жүдочид ийн тэмцээний үеэр өмсөх, шинэхэн өмсгөлөө хүлээн авлаа. Монголын жүдо бөхийн үндэсний шигшээ багийн тамирчид эх орондоо гол бэлтгэлээ хийж дуусаад долдугаар сарын 28-ны өдөр Бразил улсыг зорино.
“Рио-2016” олимпийн наадмын боксын 52 кг-ын жинд Х.Энх-Амар, Г.Ган-Эрдэнэ /49 кг/, Э.Цэндбаатар /56 кг/, Д.Отгондалай /60 кг/, Б.Чинзориг /64 кг/, Б.Түвшинбат /69 кг/ нар өрсөлдөхөөр болжээ.