Олимпийн хүрэл медальт, гавьяат тамирчин С.Ням-Очир өнөөдөр албан ёсоор зодог тайллаа. Тэрээр олимп, ДАШТ-ий хос медальт Монголын гурван жүдочийн нэг. Хөдөлмөрийн баатар Х.Цагаанбаатар, гавьяат тамирчин Д.Сумъяа нар энэхүү амжилтыг эзэмшдэг юм.
С.Ням-Очир өнөөдөр Улсын аварга шалгаруулах тэмцээний үеэр зодог тайлахдаа “Хорь гаруй жил жүдо бөхийн спорттой холбогдлоо. Сүүлийн 10 гаруй жил нэг гэр бүл шиг минь байсан багийнхандаа, багш нартаа чин сэтгэлээсээ баярлаж байна. Өнөөдөр би тамирчны карьераа дуусгаж байгаа ч албан ёсоор дасгалжуулагчийн албанд шилжиж байна. Жүдогийн спортын хөгжлийн төлөө хичээн ажиллах болно” гэсэн юм.
Багаасаа бөхийн спортод орсон С.Ням-Очир 1998 онд аавынхаа байгуулсан “Улаан гуталт” клубт Ю.Баттогтох багшаар “А” үсэг заалгаж, их спортод хөл тавьж байжээ. С.Ням-Очир бөхийн удамтай төдийгүй гавьяат тамирчин Г.Жамсран, Г.Барсүрэн, олимпийн V байрын шагналт, самбо бөхийн дэлхийн аварга Д.Нямхүү тэргүүтэй шилдэг жүдоч түүний хамаатан аж.