Олимп, дэлхийн аварга ОХУ-ын нэрт бөх Иван Ярыгин агсны дурсгалд зориулсан уламжлалт Гранпри тэмцээн энэ сарын 24-27-ны өдрүүдэд Красноярск хотод болно. Дэлхийн бөхийн нэгдсэн холбооноос энэ жилийн Гран прид эрэгтэй, эмэгтэйчүүдийн төрөлд дэлхийн чансааны оноо (өнгөрсөн жил зөвхөн эрчүүдэд оноо өгсөн) олгохоор шийдвэрлэсэн юм.
Тэмцээнд Болгар, Унгар, Герман, Казахстан, Кыргызстан, Туркменистан, БНХАУ, Монгол, Норвеги, АНУ, Турк, Франц, ОХУ, Япон зэрэг 20 гаруй орны баг тамирчид хуран чуулахаар болоод байна. Гадаадын бөхчүүдээс олимпийн наадам болон ДАШТ-ий дөрвөн алт, хошой хүрэл медальт Жордан Барроуз (АНУ), олимпийн наадам болон дэлхийн хошой аварга Таха Ахгуль (Турк), Кайл Снайдер (АНУ), дэлхийн хошой аварга С.Батцэцэг, дэлхийн аварга С.Цэрэнчимэд (хоёул Монгол), Алине Фокен (Герман), Марианна Шастин (Унгар), ДАШТ-ий нэг мөнгө, гурван хүрэл медальт О.Насанбурмаа (Монгол), Василиса Марзалюк (Беларусь), ДАШТ-ий мөнгө, хүрэл медальт медальт Жеймс Грин (АНУ), Якуп Гор (Турк), дэлхийн дэд аварга Томас Гилман, Сара Хилдбранд (хоёул АНУ), Фатик Эрдин (Турк), Бильяна Дудова (Болгар), Ден Зивэй (БНХАУ), Э.Сумъяа (Монгол), олимпийн наадмын хүрэл медальт Эльмира Сыздыкова (Казахстан), ДАШТ-ий хошой хүрэл медальт Г.Мандахнаран, Э.Бэхбаяр, хүрэл медальт Т.Түвшинтулга, Б.Шоовдор (бүгд Монгол), Жо Колон, Тамыра Мынса, Бека Литерс (бүгд АНУ), Хироэ Минагава (Япон), Бусе Тосун (Турк), Владислав Андреев (Беларусь) гээд олимп, дэлхийн медальтай 28 тамирчин оролцохоор албан ёсоор мэдүүлэгээ өгөөд байгаа юм. Зөвхөн урьдчилсан байдлаар өгөөд байгаа нэр бөгөөд энэ тоо ч цаашид өсөх магадлалтай.
Эзэн орноос “Рио-2016” олимпийн наадам болон дэлхийн гурван удаагийн аварга Абдулрашид Садулаев, “Будапешт-2018” дэлхийн аварга Завур Угуев нараас бусад бараг бүх шилдгүүд нутгийн дэвжээн дээрээ зодоглоно. Оросоос бараг 20 гаруй олимп, дэлхийн медальтнууд Красноярскт хүч үзэх юм.