Баянзүрх дүүргийн цагдаагийн нэгдүгээр хэлтсийн 26 дугаар хороо хариуцсан хэсгийн байцаагч О.Пүрэвсүрэнтэй ярилцлаа.
-Сар шинэ дөхөхөөр гэмт хэрэг ихэсдэг гэсэн. Ямар төрлийн хэрэг зонхилж байна вэ, иргэдэд юуг анхааруулж хэлэх вэ?
-Сар шинэ дөхөхөөр халаасны хулгайн гэмт хэрэг ихэсч байна. Иргэд сонор сэрэмжтэй явахгүй бол авах гэж байгаа зүйлдээ анхаарлаа төвлөрүүлэх хооронд нь халаасны хулгайч нар түрийвч, гар утас, эд зүйлсийг нь хулгайлах нь их байна. Үүнтэй холбогдуулан ЦЕГ-аас хулгайн гэмт хэргээс урьдчилан сэргийлэх мөн уг гэмт хэргийг илрүүлэх чиглэлээр нэгдсэн арга хэмжээ зохиож байгаа. Үүнтэй холбоотойгоор манай Баянзүрх дүүргийн цагдаагийн I хэлтсээс хороо тус бүр өөрийн онцлогт тохируулан хэсэгчилсэн арга хэмжээ зохиож байна. Тухайлбал манай Баянзүрх дүүргийн 26 дугаар хороонд Дүнжингарав худалдааны төв байдаг. Уг төвд үзэсгэлэн худалдааны үеэр халаасны хулгай их гарч байна. Тийм учраас манай хэлтсээс олон нийтийн цагдаа нарыг гэмт хэргээс урьдчилан сэргийлэх ажилд татан оролцуулж байна. Мөн хорооны хамтарсан багийн гишүүд, хорооны цагдаа, хэсгийн байцаагч нар, хорооны Засаг дарга, нийгмийн ажилтнууд ч хуваарийн дагуу ажилладаг. Эрүүгийн хэргийн мөрдөгч нар ч энгийн хувцастай ажиллаж байна. Үүний үр дүнд хулгайн гэмт хэрэг манай хороонд буурсан. Хулгайн хэргээс сэргийлэхийн тулд бид иргэдэд сэрэмжлүүлэг тарааж байгаа. Халаасны хулгайч ганц нэгээрээ бус бүлгээрээ явдаг. Нэг хэсэг нь анхаарлыг нь сарниулж байхад үлдсэн хэсэг нь хулгай хийх маягаар хамтарч ажилладаг.
-Хүн ихтэй зах, худалдааны төвүүдэд халаасны хулгайн хэрэг гардаг байх. Цагаан сар дөхөхөөр бас бууз, тавгийн идээ шүүсээ хулгайд алдах нь их байдаг шүү дээ. Энэ талаар юуг онцлох вэ?
-Манай хороо орон сууцны хороолол. Банш, буузаа алдах хэрэг ихэвчлэн гэр хороололд гардаг. Тухайлбал манай хойд талын гэр хорооллуудад ийм хэрэг их гардаг. Яагаад гэхээр манайхан бууз, баншаа гадаа амбаартаа ямар ч цоож цуурга хийхгүйгээр тавьчихдаг. Эсвэл өдрийн цагаар гэрт хүнгүй үед хөршүүддээ “Манайхыг харж байгаарай, эзгүй байгаа шүү” гэж захихгүйгээр явдаг. Хулгайч нар нарийн судалгаатай хэнийх, хэдэн цагт эзгүй байдгийг андахгүй. Ийм учраас гэр хорооллуудад урамшуулалт эргүүлүүд, олон нийтийн цагдаа ажиллуулж байгаа. Урамшуулалт эргүүлүүд тодорхой хэмжээний урамшуулал авч иргэд цагдаагийн байгуулагад гүүр болдог.
-Бууз, банш идээ шүүсний хулгай илэрдэг үү, хэн хулгай хийдэг юм бол?
– Ихэвчлэн ажилгүй иргэд, орон гэргүй хүмүүс хулгай хийдэг. Сүүлийн үед хууль сайн сурталчилж байгаа болохоор манайд “Усны тэргээ алдчихлаа, битоноо алдчихлаа” гэх мэтээр мэдээлдэг болсон. Хаана ямар хэрэг гарч байгаад бид дүн шинжилгээ хийж, нөхцөл байдлын үнэлгээ хийдэг. Аль цагт, ямар гаригт ямар гэмт хэрэг илүү гарч байна вэ гээд долоо хоног, сар бүрээр нь гаргадаг.
-Ямар өдрүүдэд хулгайн хэрэг их гарч байна вэ?
-Ихэвчлэн хүмүүс ажилдаа явсан хойгуур, ажлын цагаар хулгайн хэрэг гардаг. Амралтын өдрүүдэд харьцангуй бага байдаг. Ер нь ямар нэг баярын үеэр гэмт хэрэг өсдөг. Цагаан сараар хулгай, гэр бүлийн хүчирхийллийн дуудлага нэмэгддэг. Дашрамд дурдахад гэр бүлийн хүчирхийллийн чиглэлээр орж ирсэн гомдол мэдээллийг газар дээр нь баримтжуулаад, заавал ч үгүй шүүхээр оруулдаг.
Үүнийг зарим хүмүүс мэдэхгүйгээс болоод нөхрийгөө айлгах гээд, энийг нэг хашраагаадхая гэж цагдаа дууддаг. Дараа нь хуулийнхаа дагуу баривчлахаар “Өө би ингэж баривчладаг гэж мэдсэнгүй” гэцгээдэг. Шинэ Зөрчлийн хууль 2017 оны долдугаар сарын 1-нээс хэрэгжиж эхэлсэн. Гэр бүлийн хүчирхийллийн хэргээр дуудлага өгсөн л бол шууд 7-30 хоног баривчилдаг болсон.
Хөршүүд нь олон нийтийн амгалан тайван байдал алдагдуулсан, согтуу ирээд орцонд орилж чарлаад байна гэсэн дуудлага өгсөн бол тухайн амгалан тайван байдал алдагдуулсэн этгээдийг 100 мянган төгрөгөөр торгох болсон. Үүнийг мэдэхгүйгээс болоод сар шинийн үеэр эдийн засгаар хохирч, эрхээ хязгаарлуулах нь их байгаа. Үүнийг анхаараарай.
Б.ЭГШИГЛЭН