МАХН-ын парламент дахь “ганц дайчин” О.Баасанхүү гишүүнийг намаасаа хөөгдсөн мэтээр тус намын зарим хүн нүүр хуудастаа мэдээлжээ. Харин О.Баасанхүү гишүүн өчигдөр нүүр хуудастаа “Маргааш ёс зүй, намаас урвах, ёс суртахуун, хүн чанар сэдвээр 11:30-д лайв хийнэ” хэмээн мэдээлсэн байлаа.
Тэрбээр амалсан ёсоороо дээрх сэдвээр 40 минут яриад, төгсгөлд нь намын даргадаа хаягласан хэдэн үг “дайв”.
“Урвагч урвагчаа таньдаг гэдэг үг бий. Үзэл бодлоосоо, хамт олноосоо урвах, өөр үзэл бодлыг төлөвшүүлэх гэж явах өөр. Би МАХН-аас хөөтөл нь гарахгүй. Энэ намыг өөрчилнө, шинэчилнэ. “Намын даргыгаа хайрлаагүй, өрөө төлөөгүй” гэх мэтээр зарим хүн ярьдаг. Надад тэгэх шаардлага байхгүй. Та нар мэдэж байгаа. Н.Энхбаяр даргыг өлсгөлөн зарлаж байхад би “Ерөнхийлөгчид хэлээд өгөөч” гэж Женко Баттулга дээр орж уулзаж явсан. Шоронд байхад нь хамгийн олон очсон. Солонгост байхад нь хамгийн олон холбогдож байсан. Тэгэхээр намыг сайжруулъя, шинэчилье гээд ярихаар урвагч болдог юм уу. Танд таалагдахгүй юм ярихаар урвалт болдог юм уу?
Нам лидерт суурилсан биш үзэл баримтлалд суурилсан байх ёстой. МАХН хоёр зүйлд анхаарах ёстой гэж бодож байна. Нэгдүгээрт Үндсэн хуулийн өөрчлөлт хийгдэх ёстой юу хийх бол юунд суурилж өөрчлөх ёстойг ярих хэрэгтэй . Хов живээ хойш тавьцгаая. Хоёрдугаарт бид бүтэц зохион байгуулалтдаа анхаарах ёстой” гэлээ.