Тулгар төрийн 2230, Их Монгол Улс байгуулагдсаны 815, Үндэсний эрх чөлөө, тусгаар тогтнолоо сэргээн мандуулсны 110, Ардын хувьсгалын 100, Ардчилсан хувьсгалын 32 жилийн ойг тохиолдуулан Монгол Улсын Ерөнхийлөгч Х.Баттулга эрхэлсэн ажилдаа амжилт гаргаж, олон жил үр бүтээлтэй ажилласан иргэдэд төрийн дээд одон, медаль гардуулах зарлиг гаргасан.
Энэ дагуу Хөдөлмөрийн хүндэт медаль, Хөдөлмөрийн гавьяаны улаан тугийн одон, Алтангадас одон хүртсэн иргэдийн шагналыг НИТХ-ын дарга Ж.Батбаясгалан, Нийслэлийн Засаг дарга бөгөөд Улаанбаатар хотын Захирагч Д.Сумъяабазар нар гардууллаа.
Шагнал хүртсэн иргэдэд хандаж Нийслэлийн Засаг дарга бөгөөд Улаанбаатар хотын Захирагч Д.Сумъяабазар “Ардын хувьсгалын 100 жилийн босгон дээр төрийн дээд одон, медаль хүртсэн нийт нийслэлийн иргэддээ амьдралд нь сайн сайхан бүхнийг, гэр бүлд нь аз жаргал, эрүүл энхийг хүсэн ерөөе. Нийслэл Улаанбаатар хот их айл. Энэ хотын төлөө хоёргүй сэтгэлээр зүтгэж байгаа та бүхэндээ баярлалаа. Төрөлх хот маань булам бүр цэцэглэн хөгжих болтугай” хэмээсэн юм.
Цагдаагийн ахмад ажилтан Г.Цэрэнханд “Цагдаагийн байгууллагад 30 жил ажилласан. Төрийн одон хүртсэндээ маш их баяртай байна. Тэнгэрт байгаа аав, ээждээ, та бүхэндээ баярлалаа” гэсэн бол UBS телевизийн санхүү эрхэлсэн дэд захирал Б.Нармандах “Би UBS телевизэд 1998 оноос хойш 23 дахь жилдээ ажиллаж байна. Анх ерөнхий нягтлан бодогчоор ажлын гараагаа эхэлж байлаа. Одоо арын албан ажиллахын зэрэгцээ уран бүтээл хийж байгаа. Хөдөлмөр, сэтгэл, зүтгэлийг маань үнэлж, энэ шагналд тодорхойлсон хамт олондоо чин сэтгэлийн талархал илэрхийлье. Ажилчдаа хөгжүүлж, урамшуулж, дэвшүүлж, уран бүтээл хийх нөхцөлийг бүрдүүлж ажилладаг удирдлага, хамт олондоо баярлалаа. Нийслэл хот маань улам бүр хөгжин дэмжиж, Монгол Улс маань мандан бадрах болтугай” хэмээн ярилаа.
НЗДТГ-ЫН ХЭВЛЭЛ МЭДЭЭЛЭЛТЭЙ ХАРИЛЦАХ ХЭЛТЭС