НҮБ-ын Ерөнхий нарийн бичгийн дарга Антонио Гутерриш НҮБ-ын Сэтгүүлчдийн холбоо байгуулагдсаны 70 жилийн ойн арга хэмжээнд оролцон баяр хүргэжээ. Тэрээр дэлхийн улс орнуудаас НҮБ-д суугаа сэтгүүлчид дэлхийн олон газар нутгийн энх тайван, хөгжлийн төлөө гаргасан НҮБ-ын хүчин чармайлтыг уламжлан түгээснээрээ дэлхийн энх тайван, хөгжлийн үйлст бодит оролцогч болж байгаа юм гэжээ.
Мөн Антонио Гутерриш өнөөгийн дэлхий нийтэд хоёр төрлийн салбар эрсдэл ихтэй, нэг нь хэвлэл мэдээллийн сэтгүүлч, нөгөө нь хүмүүнлэгийн болон дүрвэгсдэд тусламж үзүүлэх ажилтнууд болно гэжээ. Бүртгэлээс үзэхэд, өнгөрсөн нэг жилд 81 сэтгүүлч ажлаа гүйцэтгэж яваад нас барж, 200 гаруй сэтгүүлч саатуулагдсан байна. НҮБ-д суугаа сэтгүүлчид, дипломат ажилтан 200 гаруй хүн НҮБ-ын Сэтгүүлчдийн холбоо байгуулагдсаны 70 жилийн ойн арга хэмжээнд оролцжээ.