Боловсрол, соёл, шинжлэх ухаан, спортын сайд Ц.Цогзолмаа өнөөдөр НҮБ-ын Хүн амын сангийн Монгол дахь суурин төлөөлөгч Наоми Китахараг хүлээн авч уулзлаа. Хатагтай Наоми Китахарагийн томилолтын хугацаа дуусч эх орондоо буцах гэж байгаа юм. Тэрээр Монгол Улсад ажиллах хугацаандаа залуучуудын хөгжил, жендерт суурилсан хүчрхийлэлтэй тэмцэх асуудал, ерөнхий боловсролын сургууль, цэцэрлэг, дотуур байрны эрүүл ахуйг сайжруулахад чиглэсэн олон төсөл хөтөлбөрийг БСШУСЯ-тай хамтран хэрэгжүүлсэн билээ.

БСШУС-ын сайд Ц.Цогзолмаа, НҮБ-ын Хүн амын сантай өрнүүлж буй олон жилийн хамтын ажиллагааны үр дүнд сэтгэл хангалуун байгаагаа илэрхийлээд энэхүү хамтын ажиллагааг амжилттай хэрэгжүүлэхэд санаачилга гарган ажиллаж, бүх талаар дэмжлэг үзүүлж, салбарын хөгжилд оруулсан хувь нэмрийг нь өндрөөр үнэлж хатагтай Наоми Китахараг “Боловсролын тэргүүний ажилтан” цол, тэмдгээр шагналаа.

НҮБ-ын Хүн амын сангийн дэмжлэгээр боловсрол, соёл, шинжлэх ухаан, спортын салбарт маш олон төсөл хэрэгжүүлсэн бөгөөд үр дүнг нь хэдийнэ үзсэн. Мөн тодорхой цаг хугацааны дараа үр дүн нь гарах олон ажлыг хамтдаа эхлүүлсэн гэдгийг БСШУС-ын сайд онцолсон. Тухайлбал, олон жил тасарсан эрүүл мэндийн хичээлийн хөтөлбөрийг сэргээж оруулсан нь өөрөө эцэг, эхчүүд болон олон нийтээс талархал хүлээгээд байгаа билээ. Хатагтай Китахарагийн хувьд БСШУСЯ-тай хамтран хэрэгжүүлсэн төслүүдээ дэмжин ажиллахаас гадна НҮБ-ын харьяа байгууллагуудыг идэвхжүүлж, манлайлан ажилласанд нь талархаж байгаагаа Ц.Цогзолмаа сайд илэрхийлсэн юм.

Уулзалтад НҮБ-ын Хүн амын сангийн Монгол дахь салбарын тэргүүн Каори Ишикава байлцсан юм. БСШУС-ын сайд Ц.Цогзолмаа түүнийг НҮБ-ын Хүн амын сангийн Монгол дахь салбарын тэргүүнээр ажиллахаар болсонд баяр хүргэн, тус сантай цаашид олон хөтөлбөр, төслүүд дээр хамтран ажиллана гэдэгт итгэлтэй байгаагаа илэрхийлэв.

Монгол Улсын Их Хурлын гишүүн, Нийгмийн бодлого, боловсрол, соёл, шинжлэх ухааны байнгын хорооны дарга Ё.Баатарбилэг өнөөдөр НҮБ-ын Хүн амын сангийн Монгол дахь Суурин төлөөлөгч, хатагтай Наоми Китахараг нутаг буцаж байгаатай нь холбогдуулан хүлээн авч уулзав. НҮБ-ын Хүн амын сангаас Монгол Улсын нийгмийн эрүүл мэндийн салбарт оруулсан хөрөнгө оруулалтууд үр дүнтэй болсонд баяртай байгаагаа хатагтай Наоми Китахара хэлээд хамтын ажиллагааг өргөжүүлэхэд дэмжлэг үзүүлэн хамтран ажилласан УИХ болон Нийгмийн бодлого, боловсрол, соёл, шинжлэх ухааны байнгын хороонд талархал илэрхийлэв.

Наоми Китахара:

-НҮБ-аас зарим зохион байгуулалтын өөрчлөлтийг хийж, цаашид Монгол Улсад НҮБ-ын Хүн амын сангаас суурин төлөөлөгч суулгахгүйгээр НҮБ-ын Хөгжлийн хөтөлбөрийн Монгол дахь Суурин төлөөлөгч, хатагтай Биата Транкман хариуцан ажиллахаар болсон. Хамтран хэрэгжүүлэхээр төлөвлөсөн төсөл, хөтөлбөрүүдийг Бүгд Найрамдах Социалист Вьетнам Улсын НҮБ-ын Хүн амын сангаар дамжуулан Ази, номхон далайн бүсийн байгууллагад уламжлан шийдвэрлүүлэхээр болсон. Гэхдээ үүнд санаа зовох зүйлгүй. Суурин төлөөлөгч томилогдохгүй ч НҮБ-ын Хүн амын сангийн ажилтнууд ажиллаж байгаа учраас 2019-2021 онд хэрэгжүүлэх төслүүд хэвийн үргэлжилнэ.

Цаашид хүн амын насжилт, эмэгтэйчүүдийн эрхийг хамгаалах, жендерийн тэгш байдал, залуучуудыг хөгжүүлэх, хүүхэд залууст бэлгийн боловсрол олгох, нөхөн үржихүйн эрүүл мэндийн чиглэлд түлхүү анхаарч ажиллахаар төлөвлөсөн. Монгол Улсад Суурин төлөөлөгчөөр ажиллах хугацаандаа Гэр бүлийн хүчирхийлэлтэй тэмцэх, Залуучуудын хөгжлийг дэмжих тухай зэрэг хэд хэдэн хуулийг УИХ-аар батлуулахад хамтран ажиллалаа. Өнгөрсөн онд Улаанбаатар хотноо Ази, Номхон далайн бүсийн орнуудын парламентчдын уулзалт зөвлөлгөөнийг УИХ амжилттай зохион байгуулсан нь олон улсад өөрийн орныг сурталчлах, нөөц боломжоо таниулахад чухал ач холбогдолтой болсон. Хамтын ажиллагааны хүрээнд багагүй асуудал тулгарч байсан ч харилцан ойлголцож, гарц шийдлийг олж ажилласан Та бүхэнд талархал илэрхийлье гэв.