“Бодол санаа бол
хамгийн хүчтэй зүйл, юу ч байсан хийж чадна гэсэн итгэлтэй бай” хэмээн
Австралийн Мельбурн хотын иргэн Ник Вуйчич хэлжээ. Түүний хувьд төрөхдөө л гар,
хөлгүй төрсөн хэдий ч өнөөдөр дэлхийн мянга мянган хүнд амьдрах итгэл, гэрэл
өгч байгаа юм. Уйгагүй хөдөлмөр, хичээл зүтгэлийн үр дүнд эрхтэн бүтэн
хүмүүсийн чадаагүйг бүтээж, өдгөө олон зуун хүнд амьдрах итгэл, эрч хүч
бэлэглэж байгаа талаар нь шуугиж байна.
Энэ удаа Ник
Вуйчичийн “Хүчтэй бай” буюу “Хязгаар үгүй амьдрал” гэсэн номын талаар өгүүлэх
болно. Номыг гартаа барин суух ахуйд хөл гаргүй хэрнээ өөдөөс харан эелдэг
инээмсэглэх залууг хараад “Юун тухай өгүүлэх бол” гэсэн сэтгэгдэл өөрийн эрхгүй
төрөх ажээ.
Номын эхний хэсэг
Ник Вуйчичийн амьдралын гэгээн гэхээсээ гунигт түүхийг өгүүлнэ. Амьдралдаа
гуньж гутарч, архи дарсанд орсон хүмүүсийн тухай бид бишгүйдээ л дуулж байсан.
Тэгвэл уг номыг уншаад эхэлмэгц “Миний гуньж гутрах ч дээ. Өчүүхэн зүйл юм”
гэсэн сэтгэл өөрийн эрхгүй төрнө. Яг энэ хором мөчөөс амьдралд тэмүүлэх итгэл
сэргэх юм. Ямартай ч хар бараан үүл мэт сэтгэл дотор хуралдсан бүхэн нэгээхэн
хоромд салхинд туугдсан хамхуул мэт арилах нь үнэхээр л дэлхийг байлдан
дагуулахаас яахав хэмээн сэтгэхэд хүргэх ажээ.
Ник Вуйчич
багадаа “Би хэзээ ч эхнэртэй болохгүй. Би хэзээ ч үр хүүхэдтэй болохгүй. Болсон
байлаа ч хайртай хүмүүсээ хоёр гараараа тэврэн хайрыг мэдрүүлж чадахгүй. Зөвхөн
үлдсэн энэ амьдралдаа хүн бүхэнд дараа болж хүнд ачаа үүрүүлэх юм байна” хэмээн
боддог байжээ. Өсвөр насныхны дунд бие биеэ шоглох асуудал бишгүйдээ л
тулгардаг. Ник Вуйчичийг энэ явдал тойрсонгүй. Түүний өсвөр насанд үе тэнгийн
найзууд нь охидтой болзоонд явж, цаг хугацааг аз жаргалтай өнгөрүүлж, спортоор
хичээллэж байхад бяцхан Вуйчич спортоор хичээллэх нь бүү хэл хэн нэгний
тусламжгүйгээр бие засч ч чаддаггүй тийм л хүүхэд байжээ. Сургууль дээрээ
ирэхэд хүүхдүүд түүн рүү харан элдвээр хэлж “эрэмдэг, тахир дутуу” хэмээн
шоолно. Үеийнх нь хүүхдүүд гадаа инээлдэн тоглоход тэр гэртээ ганцаараа гунигт
бодолд дарагдан “Бурхан яагаад намайг ийм болгож төрүүлсэн юм бэ” хэмээн нулимс
дуслуулан сууна. “Намайг ийм байдалтай төрүүлсэн нь бурханы буруу. Бурханы
алдаа” хэмээн буруутгадаг байжээ.
Юм бүхэн зөвхөн
түүний өөдөөс эрслэн босож байгаа мэт санагдан дааж давшгүй хүнд ачаанаас үхэж
л салах юм байна гэсэн харуусалт бодолд хөтлөгдөнө. Тэрээр амиа хорлохоор
шийдэн ваннтай усанд орж тэр чигтээ живж л үхье хэмээн сэтгэнэ. Ваннтай усанд
ааваараа өргүүлэн ороод ганцаараа баймаар байгаагаа аавдаа хэлнэ. Хөл, гаргүй
тэрбээр амьсгаагаа түгжин усанд хэвтсэнээр уг номын өрнөл үргэлжлэх агаад
багагүй хугацаанд амьсгал түгжин усанд хэвтэхдээ сэтгэлийн угтаа хайрладаг
эцэг, эх, дүү нар нь түүний шарил дээр ямар их уй гашуутай зогсож байгааг
төсөөлжээ. Ник Вуйчич “Тэд намайг өдий зэрэгтэй болгохын тулд ямар их хүч
хайраар өлгийдсөн билээ. Гэтэл би ийм алхам хийх эрхгүй хүн” хэмээн бодсоноор
түүний амьдралд эргэлт болно. Ник Вуйчичийн энэ агуу түүх түүн шиг шаналж яваа
мянга мянган цохилох зүрхэнд гэрэл гэгээ өгчээ.
Цаг хором бүрт надад,
танд, бид бүгдэд азгүй явдал бишгүйдээ л тохиолддог. Тэр бүртээ өөрийгөө болон
бусдыг буруутган явах шиг том алдаа байхгүй тухай уг номонд өгүүлдэг. Болж
бүтэхгүй, амьдрах итгэл сулрах үед бид “Намайг хайрладаг хүн байгаа шүү” гэсэн
бодлоо гээж болохгүй. Тэр утгаараа бид дэргэдэх бүхий л хүмүүсээ хайраар дутаах
учиргүй. “Хүчтэй бай” номын гол утга нь
“Хээр талаар
морьтой хүн таваргаж л явбал би амьд явна!
Тэр бараанд би
хачин их хайртай!
Хэдэн унага
голын зүлгэнд тоглож л байвал би амьд явна!
Тэр амьтдад би
хачин их хайртай,
Хайраар би
амьдардаг аа
Бие цуг
орчлонд мөнх амьдрах шалтгаантайдаа
Би яагаад ч
үхэхгүй ээ” гэсэн
нэрт сэтгэгч, яруу найрагч Дамдинсүрэнгийн Урианхай абугайн “Мөнхийн шалтгаан”
шүлэгтэй нэгэн сэжмээр холбоотой мэт санагдсаныг нуух юун. Бидний өмнө мөрөн
мэт шуугиж буй энэ амьдралын 10 хувь нь Ник Вуйчичийн анх бодож байсан шиг
бурханы зураг байдаг бол үлдсэн 90 хувийг нь өөрийн хүч, гэнэтийн үйл явдлууд
эзэлдэг байна. Харин үүнд ямар хариу үйлдэл үзүүлэх вэ гэдэг нь хүмүүн биднээс шалтгаалдаг
юм.