Америкийн натурализмын гол төлөөлөгчдийн нэг, нэрт зохиолч Теодор Драйзерын томоохон бүтээлийн нэг болох “Керри эгч” романаас хүргэж байна. 1889 он. Зохиолын гол дүр болох Керри Чикаго дахь эгчийндээ очихоор галт тэргэнд суулаа. Түүний зүрх хүчтэй цохилно. Ядуу тарчиг амьдралд өссөн арван найман настай охин их хотод очиж хүсэл мөрөөдлөө биелүүлж хотын охидтой хөл зэрэгцүүлэн гялалзана гэхээс хөл нь газар хүрэхгүй догдолно. Керри Чикаго дахь эгчийнхээ гэрийн хаягийг тэмдэглэсэн цаасыг байн байн гаргаж харна. Керрид энэ өдөр олон азтай явдал тохионо. Хүсэл мөрөөдлөөр дүүрэн охин галт тэргэнд нэгэн ганган, ихэмсэг залуутай танилцана. Энэ эр нэлээд хөрөнгө чинээтэй. Юм үзэж нүд тайлсан, худалдаа наймаа эрхэлдэг зальжин нөхөр. Түүний ганган, хээнцэр хувцасладаг гол зорилго нь Керри шиг нүд тайлаагүй, хорвоо ертөнцийн үнэн мөн чанарыг бүрэн гүйцэд таниагүй залуу бүсгүйчүүдийг зальжин урхиндаа оруулах. Дрүэгийн энэ удаагийн урхидалт нүдээ олж, амжилттай эхлэв. Залуугийн уран гоё яриа хөөрөөнд автсан Керри хэсэг хугацаанд хамтран амьдарна. Гэвч нэг өдөр хамтран амьдрагчийнхаа найзтай танилцсанаар Керри галт тэргэнд танилцсан зальжин эрээс арай ухаалаг залуу олсондоо баярлана. Шинэ танилынхаа элгэмсэг харьцаа, эелдэг зан аашинд татагдаж нэг л мэдэхэд дотносно. Өнөөх залуу эхнэртэй, бүр хүүхэдтэй. Гэвч шинэхэн хосууд хамаг зүйлийг огоорч өөр нэг хот руу зугтана. Керри гэрээсээ гарсан өдрөөсөө хойш хэрэндээ л тансаг чинээлэг амьдрахыг хичээж, хайр халамжаар ч айхтар дутаж, гансраагүй. Тэр илүү баян чинээлэг болж, үнэтэй тансаг зүйл хэрэглэхийг хүснэ. Өөрийгөө дурласан гэж бат итгэж буй дурлалт залуу нь гэр бүлээ орхин, нэр хүндтэй ажил албаа ч хаяж Керритэй хамт Нью-Йорк явна. Ингэж зугтахдаа мөнгө хулгайлна. Ингээд залуу хэсэг хугацаанд дутагдах гачигдах зүйлгүй сайхан амьдарч байтал эрхэлж буй бизнес нь дампуурна. Энэ мөчид өнөөх элгэмсэг сайхан чанар салхинд туугдаж Керриг дарамталж эхэлнэ. Тэдний харилцаа хүндэрч хоёр тийш болохоос өөр зам үлдсэнгүй. Өнөөг хүртэл эд хөрөнгө, гоёл чимэглэл, тансаг амьдралд шунаж ирсэн Керригийн хувьд хүнд цохилт болов. Харин энэ үед Керригийн нүдийг нэгэн хүн нээнэ. Тэр бол Эмс гэгч боловсролтой, эрдэм мэдлэгтэй залуу юм. Эмс өмнөх залуусыг бодвол ганган чамин хувцасладаггүй.Тансаг сайхан амьдрал ч хөөдөггүй. Бүсгүйчүүдтэй танилцахдаа худлаа ярьж, дүр эсгэдэггүй нэгэн. Энэ нь баян тансаг амьдрал хамгаас чухал хэмээн үзэж ирсэн Керригийн хувьд шинэ ертөнц байлаа. Өнгө мөнгөний хорвоод өөрийгөө хараахан таньж амжаагүй бүсгүйд нээлт байв. Эмс бол эрдэм мэдлэгтэй төдийгүй эмэгтэйчүүдийг ихэд хүндэтгэдэг. Бас бүсгүй хүнийг өөрийн болгох гэж улайран зүтгэдэггүй нэгэн. Энэ чанар нь Керригийн сэтгэлийг улам өөртөө татна.
Керрид түүний хэлсэн үг бүр хүчтэй нөлөөлж, аливааг эргэцүүлэн бодоход хүргэдэг байв. Үнэндээ элдэв гоёл чимэггүй эгэл амьдрал илүү амар амгалан, үнэ цэнтэй гэдгийг Керри ухаарах болно. Эмс Керрид хандан “Хорвоо хүсмээр зүйлээр дүүрэн байдаг ч нэг зэрэг олныг хүсч эрмэлзэж болдоггүй. Тэгэхээр сунгаад ч гар хүрэхгүй юманд сарвайх хэрэг юу байна” гэсэн нь түүнийг амьдралынхаа хамгийн том мөрөөдлийг биелүүлэхэд хүргэнэ. Учир нь Керри нэр алдартай жүжигчин болохыг хүсдэг байлаа. Өөртөө итгэлгүй байсан учраас мөрөөдлөө биелүүлэх зүрх зориг түүнд байгаагүй юм. Бас боломж ч гараагүй хэрэг.
Харин Эмс түүнд мөрөөдлөө биелүүлэх хүч, урам зориг өгөх болов. Ингээд мөрөөдөл биелж алдартай жүжигчин болдог. Энэ мөчид Керри амьдралын утга учрыг мэдрэх болно. Чухамхүү бусдын хөрөнгө мөнгө, тансаг амьдрал түүнийг татаж байснаас тэдгээр залуус татаж байгаагүй юм байна хэмээн Керри ойлгоно.Ухаалаг Эмсийн ачаар Керри жинхэнэ аз жаргалыг хэрхэн мэдрэхийг энэхүү номноос уншаарай.