Нойр булчирхай гэж хэлхсэн үзэм шиг хэлбэртэй жижигхээн эрхтэн эрүүл амьдрахад ямар чухал үүрэгтэйг бид төдийлөн анзаардаггүй.
Өвдөхөөрөө бүрэн эдгэнэ гэж байдаггүй энэ эрхтэн биед орсон өөх тосыг задалдаг липаза гэдэг фермент, сахарыг шимж задлах инсулин гэх дааврыг ялгаруулдаг. Инсулин дутагдахаар чихрийн шижин тусдагийг мэдэхгүй хүн үгүй байх. Төгс эмчлэгддэггүй нь чихрийн шижний гол аюул гэдгийг ч бултаараа мэднэ. Сахартай хүмүүс инсулин гэх үнэтэй, тэр бүр олдоод байдаггүй тариа хийлгэдэг дээ. Нойр булчирхай нь инсулинээ ялгаруулж чадахгүй болтлоо “тамирдсан” учраас тэр. Нэг харамсалтай зүйл хэлэхэд нойр булчирхайн өвчин нь хүндэрсэн хүн хэдхэн сар л амьдардаг гэж эмч нар сануулдаг. Мэдээж заавал ийм байдалд хүрэх албагүй.
Эрүүл хоолны энгийн дүрэм барихад л энэ өвчнөөр шанална гэсэн айдасгүйгээр амьдарч болно. Өдөрт гурван цагийн зайтай таван удаа хооллох, сахар, цардуул, тос ихтэй хүнснээс аль болох татгалзах, өдөрт ядаж хоёр литр цэвэр ус тогтмол ууж занших гэсэн хялбархан дэг барихад энэ өвчнөөр шаналахгүй удаан амьдрах бүрэн боломжтой.
Нойр булчирхайгаар өвдөхгүй байхад хэрэгтэй арван хүнсийг хоол судлаач, эмч нар нэрлэжээ. Тэд нэрс, цэцэгт байцаа, сармис, улаан усан үзэм, мөөг, бууцай, амтат төмс, дүпү, улаан лооль, таргийг хүнсэндээ сонгохыг зөвлөж байна. Цэцэгт байцаанд гэхэд л нойр булчирхайн үрэвслээс сэргийлэх бодис агуулагддаг, бууцай, төмөр, В витаминаар баялаг гэж ирээд яривал бүгд л тус тусдаа чухал үүрэгтэй юм билээ.