НИТХ-ын хуралдаан үргэлжилж байна. Ардчилсан намын бүлгээс нэг цагийн завсарлага авсан бөгөөд тооллогын комисс батлах эсэх асуудал дээр маргаан үүсч, ийнхүү Ардчилсан намын бүлэг нэг цагийн завсарлага авсан байсан юм.
Энэ үеэр төлөөлөгч Э.Бат-үүл “Хуралдаан даргалж чадахгүй байгаа Б.Батнасанг өөрчилье. Бүлгийн дарга улс төрийн зорилгоор санал хураах гэж байгааг бид дэмжих юм уу. Бүр ичгүүргүй мэдээлэл хийдэг боллоо” гэв. Тэрбээр хурал даргалагчийг өөрчлөх горимын санал орууллаа. Хурлыг даргалагч Б.Батнасан “Дэгийн дагуу хурлыг явуулах гэж хичээлээ. Би санал хэлэх нэрс аваагүй байхад та нар дайраад байгаа. Би дэгийн дагуу удирдаад явж байна гэж бодож байна” гэсэн тайлбарыг өглөө.
НИТХ-ын хуралдаанаар Хотын даргад өрсөлдөгчдийн санал хураалтыг зохион байгуулах комиссыг томилох эсэх асуудлыг хэлэлцэх гэж байсан ч МАН-ын бүлгийн зүгээс дахин нэг цагийн завсарлага авлаа.
МАН-ын бүлгийн дарга Р.Дагва нэг цагийн завсарлага авах шалтгаанаа ийн тайлбарлалаа. Тэрбээр “Тооллогын комисс нийтдээ гурван субьектээс арван хүний нэр дэвшүүлсэн. Арван нэр дотор нэг нэр хоёр хүний саналаас гараад давхцсан. Давхцсан болохоор нийтдээ есөн хүний нэр тооллогын комисст нэр дэвшээд байгаа юм. Сая таван хүний нэр дэвшсэн асуудал унасан учраас цаана нь дөрвөн хүний нэр үлдээд байна. Толлогын комиссын гишүүдийн тоо нь тав. Тийм учраас нэг цагийн завсарлага авч байна.” хэмээв. Өнөөдрийн хуралдаанаар нийтдээ АН хоёр, МАН нэг удаа, нийтдээ гурван удаагийн нэг цагийн завсарлага аваад байна.