Удаан үргэлжлэн орж буй борооны улмаас нийслэлийн авто замууд болон зарим орон сууцны автомашины зогсоолууд усанд автаад байна. Тодруулбал, Нийслэлийн Баянзүрх дүүрэгт байрлах “E mart” сүлжээ дэлгүүрийн орчмын замууд усанд автаж, хүмүүс төдийгүй автомашинууд хөдөлгөөнд оролцоход хүндрэлтэй нөхцөл байдал үүсээд байгаа аж. Мөн “River garden” орон сууцны B1 давхарт байрлах авто зогсоол усанд автсан бол Баянгол дүүргийн III хороо, Нарны замын хойд хэсэгт орших авто замууд усанд автаж, автомашины хамар давахуйц их хэмжээний ус тогтсон байгаа аж. Одоогоор “Баянмонгол” хороолол, “Хурд” хотхон болон “Гэгээнтэн” цогцолбор орчмын төв болон туслах замууд усанд автсан байна.
Албаны эх сурвалжийн мэдээлж байгаагаар өчигдөр Нийслэлийн Баянзүрх дүүргийн 20 дугаар хороо, “Монгол шилтгээн”-ий урд Туул голын усанд таван хүн живэх гэж байсныг Нийслэлийн Онцгой байдлын аврах ангийн таван алба хаагч таван км замд эрэн хайх ажиллагаа хийж, аварчээ.
З.СУВД
